Thu Hilhkikna 9

 

Topa in Kanaan Minamte Susia Ding

1-2“Israel-te aw, za un; note sangin tamzaw-in a thahatzaw minamte, lianin van banin kulhpi a kiciangto khuapite, na theihsa uh mi ahi a pum lian a tun sang Anak mite, ‘Anak mite, kua in dozo ding ahi hiam?’ a kicih na zak ngei mite uh a suankhia dingin Jordan a kantan ta ding na hi uh hi. 3Tua ahih ciangin, a kangtum thei mei bangin note' mai-ah a paipa pen Topa na Pasian uh ahihna thu tuni-in thei un. Amah in note' mai-ah amaute susia-in, amaute zogawp ding hi. Tua ahih ciangin Topa in note tungah hong ciamsa bangin amaute hawlkhia-in manlangin na siamangsak ding uh hi.

4“ Topa na Pasian un note mai panin amaute a nawhkhiat khit ciangin, na lungsim uhah, ‘Hih leitang a luah dingin Topa in hong paipihna pen komau' thumanna hang ahi hi,’ ci kha kei un. Topa in na mai uhah amaute a hawlkhiatna pen hih minamte' gitlohna hang hizaw hi. 5Na thumanna hang uh ahi a, na lungsim manna hang uh tawh ahi zongin amau' leitang a luah ding na hi kei uh hi. Topa na Pasian un na mai panun amaute a hawlkhiatna pen hih minamte' gitlohna hang leh Topa in na pu na pate uh Abraham, Isaac, leh Jakob tungah a thuciamna kammal a kipsak theihna ding ahi hi.

6“Tua ahih ciangin note' thumanna hangin Topa na Pasian un na tan' dingun hih leitang hoih note tungah hong pia ahihlohna thei un. Bang hang hiam cih leh note pen lungsim khauh mi na hi uh hi.

Horeb-ah Israel-te' Lehdona

(Paikhiatna 31:18—32:35)

7“ Topa na Pasian uh sehnel gamah phinin na hehsakna uh phawk un la, mangngilh kei un. Egypt gam panin na paikhiat ni uha kipan hih lai na tun' dongun Topa langpan'in na lehdo uh hi. 8Horeb mual nangawnah a hehna dingin Topa na phin uh a, note' tungah Topa heh a, amah in note hong susia dektak hi. 9 Topa in note tawh a bawl thuciamna suangpeekte a sang dingin mualtungah ka paitoh lai-in, mualtungah sun sawmli leh zan sawmli sung ka om a, an nelo, tui dawnloin ka om hi. * 10Pasian' khut tawh a kigelh suangpeek nihte kei tungah Topa in hong pia hi. Kikhop ni-in mei sung panin note tungah Topa in hong gensa kammal khempeuh tua suangpeekte tungah om hi. 11Sun sawmli leh zan sawmli a cin' ni-in kiciamna suangpeek nihte Topa in kei hong pia hi.

12“Tua ciangin Topa in kei kiangah, ‘Kithawi in la, hih lai panin paisuk mengmeng in. Bang hang hiam cih leh Egypt panin na paikhiatpih mite a sia-in gamta khin uh hi. Amaute ka thupiakna panin kiheikhia pak uh a, amaute-a' dingin a kisung milim khat bawl khin uh hi,’ hong ci hi.

13“Tua thamloin Topa in kei kiangah, ‘Hih mite ka mu khin a, a lungsim khauh mite ahi hi. 14Amaute susia-in mun khempeuh panin amaute' min ka phiat theihna dingin kei guak hong omsak in. Amaute sangin a vanglianzaw, a tamzaw minamin nang kong bawl ding hi,’ hong ci lai hi.

15“Tua ahih ciangin kihei-in mualtung panin kong paisuk a, mei in mual kangin na kuang hi. Kiciamna suangpeek nihte ka khut nihte sungah om hi. 16Tua ciangin ka khuadak leh, Topa na Pasian tung uhah na khial khin takpi uh a, a kisung bawngno milim amaute-a' dingin na bawl uh hi. Topa in note hong thupiakna panin na kiheikhia pak uh hi. 17Tua ahih ciangin suangpeek nihte la-in ka khut nihte' sung panin lawnin note' muhna-ah ka sukham hi. 18Tua ciangin a masa-a bangin sun sawmli leh zan sawmli sung Topa' mai-ah kunin ka om a, ama hehna dingin phinin, Topa' muhna-ah a sia gamtatna tawh note' khialhnate khempeuh hangin an nelo, tui dawnloin ka om hi. 19Bang hang hiam cih leh note' tungah Topa' hehna leh a lungkim hetlohna, note susia dingin a kithawina hangin ka lau hi. Ahih hangin tua hunin zong Topa in kei' thu hong ngai hi. * 20Aaron' tungah Topa heh mahmah a, amah susia dingin kithawi a, tua hun mahin Aaron-a' ding zong thu ka ngen hi. 21Tua ciangin note' khialhna, na bawlsa uh bawngno, mei tawh halin sukhamin, leivui bangin a neel dongin ka gawizan hi. Tua ciangin mualtung panin a hong luangsuk lui sungah a vuite ka lawn hi.

22“Taberah, Massah, leh Kibrothhattaavah munte-ah zong Topa phinin na hehsak uh hi. * 23 Topa in Kadeshbarnea panin note hong sawlin, ‘Paito un la note kong piak leitang luah un,’ hong cih lai-in Topa na Pasian uh hong thupiakna nialin, amah umloin, ama aw na ngai kei uh hi. * 24Note kong theih ni-a kipan Topa na nial uh hi.

25“Tua ahih ciangin Topa in note ka susia ding ci ahih manin hih sun sawmli leh zan sawmli sung Topa' mai-ah kunin ka om hi. 26 Topa' tungah thu ka ngen a, ‘Topa Pasian aw, nangmah in na liatna tawh na hotkhiatsa, na vangliatna tawh Egypt panin na paikhiatpih na mite leh na luahte susia kei in. 27Na nasem Abraham, Isaac, leh Jakob phawk in la, hih mihingte' lungsim khauhna hita leh a gitlohna uh hita leh a khialhna uh hita leh thusim kei in. 28Tua bang hi kei leh kote nong paikhiatpihna gam mite in, “ Topa in amaute tungah a ciamsa leitangah amaute paipih zoloin, amah in amaute mudah ahih manin, sehnel gamah amaute a that dingin paikhiatpih hi,” ci khading uh hi. 29Bang hang hiam cih leh amaute pen na vangliatna leh na thahatna tawh na paikhiatpih na mihingte leh na luahte ahi hi,’ ka ci hi.