Thupatna

Thu Hilhkikna laibu sungah, Israel mite sau veipi khual a zin khit uh ciangin Kanaan gam a lut ma diak, Moab gam sungah a om laitakun Moses in Israel mite tungah a thugente a ban banin kigelh hi.

Hih laibu sungah a kiciamteh a thupi pawlkhatte hih a nuai-a bang ahi hi.

1. Moses in a beisa kum sawmli sunga thupiang liante genkik hi. Pasian in gam sungah amaute a makaihna thu a phawkna ding uh leh Pasian' tungah citakin a thu a man'na ding uh hanthawn hi.

2. Moses in Thupiak Sawmte genkik a, thupiak masa pen a khiatna bulphuhin Topa bek a biak ding uh hanthawn hi. Tua ciangin amaute tungah piak dingin a kiciamna gamah a om uh ciangin a zuih ding uh ngeina tuamtuamte a genkik leuleu hi.

3. Pasian in amaute tawh thuciamna a bawlna a khiatna thu, Moses in mite phawksak kik a, tua thuciamna a letkipna dingun a hanthawn hi.

4. Moses zomah Pasian' mite a makai dingin Joshua kiseh hi. Pasian' cihtakna thu phawkna bawlin la khat sa uh a, Israel minamte tungah thupha a piak khit ciangin Jordan Gun nisuahna lama om Moab gam sungah Moses a si hi.

Hih laibu in a bulphuh thu: Pasian in itin a teel a mite honkhia-in thupha pia ahih manin a mite in zong hih thu phawkin, amaute nungta-in thupha a ngah paisuakna dingun Pasian itin a thu a man' ding uh deihna ahi hi.

Hih laibu sungah a thupi pen mun, 6:4-6 sung hi a, Topa Jesuh in thupiak khempeuh lakah a lian pen a cih, “Topa note' Pasian na lungsim khempeuh uh, na nuntakna khempeuh uh leh na thahatna khempeuh uh tawh na it ding uh hi,” a cihna ahi hi.

Tom Lakna
Moses' thugen masakna    1:1—4:49
Moses' thugen nihna    5:1—26:19
         a. Thupiak Sawmte    5:1—10:22
         b. Thukham, ngeina, leh hilhkholhnate    11:1—26:19
Kanaan gam lutna ding zia hilhna    27:1—28:68
Thuciamsa kiciam pha kik    29:1—30:20
Moses' thugen tawpna    31:1—33:29
Moses' sihna    34:1-12

Thu Hilhkikna 1

 

Israel-te' tungah Topa' Moses in Horeb-ah Sutkik

1Hihte pen Jordan galkhat gamlak, Suf galkhat Arabah gamsung, Paran leh Tofel, Laban, Hazeroth leh Dizahab kikalah Moses in Israel-te khempeuh tungah a gen thute ahi hi. 2Tua mun pen Horeb panin Seir Mual tawnin Kadeshbarnea lamah ni sawm leh ni khat paina ahi hi. 3-4Heshbon gamah a teng Amor kumpipa Sihon, leh Ashtaroth leh Edrei gamah a teng Bashan kumpipa a zawh khit ciangin, a kum sawmlina, kha sawm leh kha khatna, a ni masa ni-in, amaute' tungah thupiakna-in Topa in ama tungah a piak bangbangin Moses in Israel mite tungah a gen hi. * 5Moab gam Jordan galkhatah Moses in hih thu gentel a,

6“Horeb gam sungah Topa i Pasian in eite' kiangah, ‘Hih mualah sauvei na om khinzo uh hi. 7Kithawi-in na khualzin uh kipan kik un la, Amor mite' mualtung gam leh Arabah kiim, mualtung gam, lei niamna gam, Negeb gam khempeuh, leh Kanaan mite' gam tuipi gei leh Lebanon, gun golpi ahi Eufratis gun dongin pai un. 8En un, note' mai-ah leitang ka koihzo hi. Pai un la, Topa in na pate uh Abraham, Isaac, Jakob, leh amau' nunga a suanlekhakte uh tungah piak dingin a ciam leitang luah un,’ hong ci hi.

Thukhente a Kisehna

(Paikhiatna 18:13-27)

9“Tua hun laitakin note kiangah, ‘Kei guak bek in note kong enzo kei ding hi. 10 Topa na Pasian un note tampi hong phasakzo hi. En un, note tuhunin vantung aksite zahin tampi na pha uh hi. 11 Topa, na pate uh Pasian in tu-a zah tulin note hong bawl hen la, note tungah hong ciamsa bangin thupha hong pia ta hen! 12Kei guak in note' thu kineihnate sian'sakna ding tavuan lianpi bangci puakzawh ding ka hi hiam? 13Na minam uh tawh a kizui-in a pil, thuthei, thuphawksa mite teel un la, note' lutangin amaute ka koih ding hi,’ kong ci hi. 14Note in, ‘Nangma hong gen thu pen kote-a' dingin hoih hi,’ ci-in nong dawng uh hi. 15Tua ahih ciangin na minam lutang uh ahi, a pil thu phawksa mite ka la a, note' tungah lutangin a tul uk, a za uk, a sawmnga uk, a sawm ukte, leh uliante na minam khempeuh sung uhah ka koih hi.

16“Tua hun laitakin na thukhente uh ka thuhilh a, ‘Na sanggamte uh thu neihte za un la, mi khat leh a sanggampa ahi a, amah tawh a om khualmipa tawh ahi zongin thu a mantakin khen un. 17Thukhenna-ah angvan na nei kei ding uh hi. A neu leh a liante a kibangin a thu na ngai ding uh a, maitang zahtak tuam na nei kei ding uh hi. Bang hang hiam cih leh thukhenna pen Pasian-a' ahi hi. Note-a' dingin a haksa lua thute kei kiangah nong paipih ding uh a, keimah in tua thu ka za ding hi,’ ka ci hi. 18Amaute' hih ding na khempeuh tua hunin amaute kiangah thu ka pia hi.

Kadeshbarnea panin Thukante Kisawlkhia

(Gamlak Vakna 13:1-33)

19“Tua ciangin Horeb gam panin i dingkhia a, Topa i Pasian in hong thupiak bangin Amor mite' mualtung gam zuatna lamkalah note' muhsa a lian a lauhuai sehnel gam i nawk khit ciangin Kadeshbarnea i tung hi. 20Tua ciangin note' kiangah, ‘ Topa i Pasian in eite hong piak Amor mite' mualtung gam na tung khin uh hi. 21En un, Topa na Pasian un note' mai-ah leitang koihzo hi. Topa, na pate uh Pasian in note tungah hong gensa bangin paito-in luah un. Lau kei un la, lungkia kei un,’ kong ci hi.

22“Tua ciangin na vekpi-un ka kiangah nong pai uh a, ‘Eite-a' dingin gam va enin, i paitohna ding lampi leh i zuat ding khuapite hong genkik thei ding eite' mai-ah mi sawl ni,’ nong ci uh hi.

23“Tua thu hoihtuak ka sa a, minam khatah khat, note mi sawmlenih kong la hi. 24Amaute kithawi-in mualtung gamah paito uh a, Eshkol kuamah pai-in va en uh hi. 25Amaute in tua gam singgah pawlkhat a khutun hong tawi-in i kiangah hong tun'pihsuk uh a, amaute in eite kiangah thu hong zasak kikin, ‘ Topa i Pasian in eite hong piak gam pen leitang hoih ahi hi,’ hong ci uh hi.

26“Ahi zongin note paito nuamloin, Topa na Pasian un hong thupiak na nial uh hi. * 27Na puanbukte uh sungah na phun uh a, ‘ Topa in eite hong mudah ahih manin eite a hong susia ding Amor mite' khutsungah hong pia dingin Egypt gam panin eite hong paikhiatpih hi. 28Koi lai-ah paito ding ihi hiam? I sanggamte in i lungsim hong siasak khin uh a, “A mite ei sangin lianzaw-in sangzaw uh hi. A khuapite lianin van banin ki-um hi. Tua thamloin Anak mite tua munah ka mu uh hi,” hong ci uh hi,’ na ci uh hi.

29“Tua ciangin note kiangah, ‘Lau kei un la, amaute kihta kei un. 30-31Egypt gam sungah note' mit muhah a hih bangin, mi khat in a tapa a puak bangin hih mun na tun' matengun lam tawntungah Topa na Pasian un note hong puak na muhsa uh sehnel gama mah bangin, note' mai-ah a pai Topa na Pasian un note-a' dingin hong dosak ding hi,’ kong ci hi. * 32-33Ahi zongin hih bang thu om hinapi-in, na puanbuk lamna mun ding uh hong lak ding leh na paina ding lampi uh hong lak dingin zanin mei, sunin meii tawh note' mai lampi-ah a pai Topa na Pasian uh note in na um kei uh hi. *

Israel-te' tungah Pasian' Gimpiakna

(Gamlak Vakna 14:20-35)

34“ Topa in note' thu hong za a, a heh suakin kiciam a, 35-36‘Hih a gilo khang mite khat beek in, na pate uh tungah piak dinga ka ciam gam hoih na mu kei ding uh a, Jefunneh' tapa Kaleb bek in tua gam mu ding hi. Amah in a lungsim khempeuh tawh Topa zui ahih manin amah leh a tate tungah ama totsa leitang ka pia ding hi!’ a ci hi. * 37Note' hangin kei tungah zong Topa heh a, ‘Nang zong tua gamah na pai kei ding hi. 38Nun' tapa Joshua, nangma mai-ah a dingpa lut ding hi. Amah hanthawn in; bang hang hiam cih leh amah in Israel mite tua gam luahsak ding hi.

39“Tua thamloin galte' mat suak ding hi, na cih uh na taneute uh leh, tuhun laitakin a sia leh a pha a khenthei nailo na tate uh, tua gamah pai ding a, amaute tungah tua gam pia-in, amaute in tua gam luah ding uh hi. 40Ahih hangin note ahih leh, kihei un la, San Tuipi lam manawhin sehnel gamah pai un,’ hong ci hi.

Hormah-ah Israel-te' Lelhna

(Gamlak Vakna 14:39-45)

41“Tua ciangin note in kei nong dawng uh a, ‘ Topa' tungah ka khial khin uh hi. Topa i Pasian in hong thupiak bang teekteekin paito-in i do ding hi,’ nong ci uh hi. Na milipun na galhiam uh tawh na kithawi uh a, mualtung gamah paitoh ding na baih ngaihsut uh hi.

42“Tua ciangin Topa in kei kiangah, ‘Amaute kiangah gen in: Note lakah kei omlo ka hih manin kuanto kei un la, do kei un. Tua bangin kuanto le uh cin na galte uh na lel ding uh hi, ci in,’ hong ci hi. 43Tua ahih ciangin note kiangah kong gen a, note in na ngai nuam kei uh hi. Topa' thupiakna na nial uh a, mualtung gamah na kuanto hamtang uh hi. 44Tua ciangin tua mualtung gamah a teng Amor mite hong kuanin, Seir gam Hormah ciangdongah khuai bangin hong delhin hong zo uh hi. 45Note hong ciahkikin Topa' mai-ah na kap uh hi. Ahih hangin Topa in na aw uh hong ngailoin, a bil zong hong ngatlo hi. 46Tua ahih ciangin tua thu hangin ni tampi sung Kadesh munah na om uh hi.