Thu Hilhkikna 20

 

Gal tawh kisai Ngeinate

1“Na langte uh a do dingin pai-in a sakolte, a leengte, leh a galkapte uh nomau-a' sangin a tamzaw-in na muh uh hangin amaute na kihta tuan kei ding uh hi. Bang hang hiam cih leh Egypt gam panin note a hong paikhiatpih Topa na Pasian uh note tawh hong om hi. 2Gal nai na tun' uh ciangin siampipa a mai-ah hong pai-in mite kiangah thu genin 3amaute kiangah, ‘Israel-te aw, za un. Tuni-in na langte uh a do dingin na nai uh hi. Na lungsim uh lausak kei un. Lau kei un, ling kei un, amaute kihta kei un. 4Bang hang hiam cih leh note tungah gualzawhna a hong pia ding, na langte uh hong dosak dingin note tawh hong kuan khawmpa pen Topa na Pasian uh ahi hi,’ ci ding hi.

5“Tua ciangin uliante in mite kiangah thu genin, ‘Inn thak lam khinin a ap nailo kua om na hi uh hiam? Gal sungah amah si-in midang khat in a inn ap khading ahih manin a inn-ah ciahkik hen. 6Leenggui lo kho khinin a gah a ne nailo kua om na hi uh hiam? Gal sungah amah si-in midang khat in a gah ne khading ahih manin a inn-ah ciahkik hen. 7A zi dingin lawm dong khinin a la nailo kua om na hi uh hiam? Gal sungah amah si-in midang khat in tua numei la khading ahih manin a inn-ah ciahkik hen,’ ci ding uh hi.

8“Uliante in mite kiangah thu genthuah lai-in, ‘A lau, a lungsim meidawi kua om na hi uh hiam? A lawmte meidawilawh khading ahih manin a inn-ah ciahkik hen,’ ci ding uh hi. 9Uliante in mite kiangah thugen a man khit uh ciangin mite a makai ding kiseh ding hi.

10“A do dingin khuapi khatpeuh na nai uh ciangin kilemna ding thu gen masa un. 11Note hong dawn'na pen kilemna ding lam hi-in note kongpi hong hon' leh, tua sunga om mi khempeuh in note-a' dingin aana tawh na semin, na na uh hong sepsak ding uh hi. 12Ahih hangin note tawh kilemna hong bawlloin note hong do leh, note in tua khua na umcih ding uh a, 13 Topa na Pasian un note' khutsungah hong piak ciangin pasal khempeuh namsau tawh na that ding uh hi. 14Ahih hangin numeite leh naupangte, ganhingte, khua sunga na dang khempeuh, a kinusiate khempeuh note-a' dingin na la ding uh a, Topa na Pasian un note hong piak ahi na langte uh vante na tang ding uh hi. 15Hih nai-a om minamte' khuapi a hilo, note kiang panin a gamla khuapi khempeuh tungah tu-a bangin na hih ding uh hi.

16-18“Ahih hangin, amau' pasian-te a biakna uhah a hih uh a kihhuai gamtatnate khempeuh note hong hilh theihlohna ding leh tua bangin Topa na Pasian uh tungah na khialh theihlohna dingun, Topa na Pasian un luah dingin note' tungah hong piak hih mite' khuapi sungah mi khempeuh na hingkhawi kei ding uh a, Topa na Pasian un hong thupiaksa bangin Hit mite leh Amor mite, Kanaan mite leh Perez mite, Hiv mite leh Jebus mite, a vekpi-in amaute na susiamang ding uh hi.

19“Khuapi khat na lak theihna dingun do-in sauveipi na umcih uh hangin hei zatna tawh a singgah kungte na susia kei ding uh hi. A gahte na ne thei ding uh a, ahih hangin a kungte na phuk kei ding uh hi. Gamlaka om singkungte, note' sukgawp dingin na gal uh hi zenzen ahi hiam? 20Nek dinga kizanglo singkung hi, ci-in na theih teng bek uh note hong do khuapi a tuk mateng umcihna-in na zat dingun na phuk thei ding uh hi.