Thu Hilhkikna 6

 

A Thupi Thupiakna

1-2“Tu-in, luah dinga na paina gam uhah na zuih dingun, note leh na tapate uh leh na suanlekhakte un Topa note' Pasian' thukhamte leh a thupiakte na zuihna uh tawh amah na zahtak theihna dingun, Topa na Pasian un na nuntak tawntung uh na zuih dingun kei a hong hilh sawnsak thute pen hih thupiakna, thukhamte, leh ngeina kipte ahi hi. Hihte pen na khan' uh a sau theihna ding ahi hi. 3Tua ahih ciangin Israel-te aw, note nuamsa-in, Topa, na pate uh Pasian in note tungah hong ciamsa bangin bawngnawi leh khuaizu a luan'na gamah tampi pha-in na khan' theihna dingun hih thute za un la, na zuih ding uh ngaihsun un.

4“Israel-te aw, za un: Topa i Pasian, Topa khat bek ahi hi. * 5 Topa note' Pasian, na lungsim khempeuh uh, na nuntakna khempeuh uh, leh na thahatna khempeuh uh tawh na it ding uh hi. * 6Tuni-a no kong piak hih thute na lungsim uhah om ding hi. 7Na tate uh tungah limtakin na hilh ding uh a, na innsung uhah na tut uh ciang, lampi-ah na pai uh ciang, na lup ciang uh leh na thawh ciangun tua thute na gengen ding uh hi. 8Na khut tung uhah lim dingin tuate na hen ding uh a, na mitte uh kikalah tuate pen talsuante bang hi ding hi. 9Na inn kongkhak khuam tung uh leh na kongpi uh tungah tuate na gelh ding uh hi. *

Thu Man'lohkhak ding Hilhkholhna

10“ Topa na Pasian un note piak dingin na pate uh Abraham, Isaac, leh Jakob tungah a ciam, note' phuh loh a lian a hoih khuapite, * 11note' kholloh na hoih khempeuh tawh a kidim innte, note' bawl loh tuibem, note' suan loh leengguite, leh oliv kungte a omna leitangah hong paipihin, note in ne-in na kham uh ciangin, 12salsuahna Egypt leitang panin hong paikhiatpih Topa na mangngilh khaklohna ding uh kidawm un. 13 Topa na Pasian uh na zahtak ding uh hi. Ama na bek na sem ding uh a, ama min tawh na kiciam ding uh hi. * 14Note' kiima om mite' pasian-te ahi pasian dangte' nung na zui kei ding uh hi; 15bang hang hiam cih leh note' lakah a om Topa na Pasian uh a aam Pasian ahi hi. Tua bang hi kei leh note' tungah Topa na Pasian uh hong hehin, lei maitang panin note hong susia ding hi.

16“Massah munah amah na ze-et uh bangin Topa na Pasian uh na ze-et nawn kei ding uh hi. * 17Amah in note hong thupiaksa ahi Topa na Pasian un hong thupiakte khempeuh na zui ding uh hi. 18-19 Topa' hong ciamsa bangin note' mai panin na langte khempeuh uh nawhkhiatna tawh na pu na pate uh tungah piak dingin Topa in a ciamsa leitang hoih note in na luah theihna ding uh leh note na nopsak theihna dingun Topa' muhna-ah a man leh a hoih nate na sem ding uh hi.

20“Hong tung ding hunah na tapate un, ‘ Topa i Pasian in note hong piak hih thute, bang a cihnopna ahi hiam?’ ci-in hong dot uh ciangin 21na tapate uh kiangah, ‘Eite pen Egypt gam sungah Faro' silate ihi a, Topa in Egypt panin a vangliatna tawh hong paikhiatpih hi. 22 Topa in eite' muhna-ah a lian a nasia lim leh na lamdangte Egypt mite leh Faro leh a uliante khempeuh tungah lak hi. 23Amah in i pu i pate tungah piak dinga a ciam leitangah hong paipihin, eite hong piak theihna dingin tua lai panin eite hong paikhiatpih hi. 24Tuhuna bangin i nuntak theihna dingin amah in eite' hoih tawntung ding a deihna-in, Topa i Pasian zahtakin hih thukhamte khempeuh i zuih ding Topa in thu hong pia hi. 25Amah in eite hong thupiak bangin Topa i Pasian' mai-ah hih thupiakte khempeuh limtakin zui lehang eite-a' dingin thumanna hi ding hi,’ na ci ding uh hi.