Thu Hilhkikna 22

 

1“Na mipihte' bawngtal ahi a, a tuu ahi zongin a gammang na muh uh leh huhloin na om kei ding uh hi. A neipa kiangah na ciahpih kik ding uh hi. 2Amah na veng nai uh hilo a, a nei na theih kei uh leh, na inn uhah a gan ciahpihin a neipa in hong zon' mateng na kem ding uh a, hong zon' ciangin na piakik ding uh hi. 3Tua bangin a la, a puan, a mangsa na muh, na mipihte' na a mang khat peuhpeuh na hih ding uh a, huhloin na om kei ding uh hi.

4“Na mipihte' la ahi a, a bawngtal ahi zongin lam gei-ah a kia na muh uh leh, tuate huhloin na om kei ding uh a, tuate phottohsak kikna tawh na huh ding uh hi. *

5“Numei in pasal puan khat peuhpeuh silhlo ding a, pasal in zong numei puan silhlo ding hi. Bang hang hiam cih leh hih bangin a gamta peuhmah Topa na Pasian uh tungah a kihhuai ahi hi.

6“Vasabu khat, sing tung ahi a, leilakah ahi zongin, a no ahi a, a tui ahi zongin omin, a pi in a no a ompih ahi a, a op ahi zongin na muh khak zenzen uh leh, a pi pen a no tawh na la khawm kei ding uh hi. 7A pi na khah ding uh a, a no na la thei ding uh hi. Hih bang gamtatna pen na nopsakna ding uh, sauveipi na nuntak theihna ding uh ahi hi.

8“Na inn tung panun mi khat kia-in mi sihna hanga mawhna na innsung uhah na tun'sak khaklohna dingun inn thak na lam uh ciangin na innkhumzang uhah tangban na khung ding uh hi.

9“Na leenggui lo uhah khaici nam nih na vawh kei ding uh hi. Vawh le-uh cin na vawh uh an leh na leenggui lo uhah a piang khempeuh a nin suak ding hi.

10“Bawngtal khat leh la khat tawh lo na khokhawm kei ding uh hi.

11“Samul leh khau a kigankhawm puan na silh kei ding uh hi. *

12“Na puanza uh kiu lite tungah puanmongteep na bawl ding uh hi. *

Siangthona tawh kisai Ngeinate

13“Mi khat in zi la-in, amah a luppih khit ciangin amah mudahin, 14a zumhuai gamtatna tawh tuanu mawhsakin, ‘Keimah in hih numei ka la a, amah tawh ka lupkhop ciangin ama sungah nungakna lim ka mu kei hi,’ cihna tawh tuanu tungah minsia a tut leh, 15tua numei' nu leh a pa in a tanu uh' nungakna lim a kilatna puan lakhia-in upate kiang kongpi-ah paipih ding uh hi. 16Numei' pa in upate kiangah, ‘Hih mipa tungah a zi dingin ka tanu ka pia a, amah in deih nawnlo a, 17“Na tanu' sungah nungakna lim ka mu kei hi,” cihna tawh a zumhuai-in amah mawhsak hi. Ahi zongin hihte pen ka tanu' nungakna a kilatna limte ahi hi,’ ci-in a puan lak ding hi. Amaute in khua upate mai-ah a puan phah ding uh hi. 18Tua ciangin tua khua upate in tua mipa la-in sat ding uh hi. 19Amaute in ngun shekel za khat liausak ding uh a, a numei' pa' tungah tuate pia ding uh hi. Bang hang hiam cih leh amah in Israel nungak tungah minsia tun' hi. Tua ciangin a numei pen ama zi mah hi ding a, a nuntak laiteng tuanu ma theilo ding hi.

20“Ahih hangin a mawhsakna thumanin, numei sungah nungakna lim a kimuh kei takpi leh, 21amaute in a pa' inn kongah a numei paipih ding uh a, ama khuapi pasalte in suang tawh amah denglum ding uh hi. Bang hang hiam cih leh amah in a pa' inn sungah paktat gamtatna tawh Israel sungah haina tun' hi. Tua bangin note' lak panin siatna na siangsak ding uh hi.

22“Mi khat, midang khat' zi tawh a lumkhawm a kimuh leh, numei tawh a lumpa leh a numei, a nih tuakun kithat ding hi. Tua bangin Israel sung panin siatna na siangsak ding uh hi.

23“A kidongsa nungak khat om a, mi khat in khuapi sungah tuanu tuakin amah tawh a lupkhop leh, 24tua khuapi kongpi-ah amaute gel na paipih ding uh a, a numei khuapi sungah a om hinapi-in mi' huhna ngen dingin a kiko lohna hang leh, tua pasal in a vengpa' zi a va suksakna hangin, suang tawh a nihun na denglum ding uh hi. Tua bangin note' lak panin siatna na siangsak ding uh hi.

25“Ahih hangin mi khat in a kidongsa nungak khat gamlakah tuakin, mipa in tuanu buanin a luppih leh, tua numei tawh a lum mipa bek kithat ding hi. 26A numei' tungah bangmah na hih kei ding uh hi. Numei' tungah sihna ding mawhna omlo hi. Bang hang hiam cih leh hih thu pen mi khat in a vengpa do-in a thah tawh kibang hi. 27Hih mipa in gamlakah numei hih ahih manin, a kidongsa numei in huhna ngen dingin a kiko hangin amah a hon ding kuamah omlo hi.

28“Mi khat in a kidong nailo nungak khat tuakin, tua numei buanin luppih a, amaute gel a kimuh leh, 29numei tawh a lumpa in nungak' pa tungah ngun shekel sawmnga pia ding a, tua numei ama zi hi ding hi. Bang hang hiam cih leh amah in a numei va su khin hi. A nuntak laiteng tua numei ma theilo ding hi. *

30“Mi khat in a pa' zidangte ten'pihlo ding a, a pa-a' ahi numei tawh mawhlo ding hi. *