Marka 9

 

1Tua ciangin Jesuh in a thugen zomlai a, “Hih lai-a a om mi pawlkhatte a sih ma-in vanglianpi tawh Pasian' Ukna hong tung taktak ding ahihna thu phawk un,” a ci hi.

Mel Kikheelna

(Matthai 17:1-13; Luka 9:28-36)

2Tua zawh ni guk khit ciangin Jesuh in Peter, James, leh Johan-te samin amauteng guak mualtung khatah a paipihto hi. Amaute' muhtangpi mahin Jesuh a mel hong kikheel a, 3leitunga puansawpte kuamah in a paksak zawhloh dong ding zahin a puante pakin a tee hi. 4Tua lai-ah Elijah leh Moses hong omin, Jesuh tawh a kiho a mu uh hi. 5Peter zong hong pau-in Jesuh kiangah, “Sia aw, hih lai-a i om, nuam mahmah hi. Nang-a' ding buk khat, Moses-a' ding buk khat, Elijah-a' ding buk khat kong lamsak ding uh hi,” a ci hi. 6Amah leh a lawmte naklau mahmah uh ahih manin a cih ding mel a theihloh man ahi hi. 7Meii hong kai-in a liim in amaute hong liah a, tua meii sung panin aw khat hong gingin, “Hihpa, ka it ka Tapa ahi hi; ama thu na ngai un,” a hong ci hi. * * 8A kiim a pam a khuadak uh leh Jesuh simloh kuamah dang na om nawnlo hi.

9Mualtung panin a paisuk kawmun Jesuh in amaute kiangah, “Sihna panin Mihing Tapa a thawhkik matengin hih na muhte uh kuama kiangah gen kei un,” ci-in a kham hi. 10Ama cih mah bangin im uh a, ahi zongin, “Sihna panin thokik,” a cih bang a cihnopna hi ding ahi hiam, ci-in a lungsim sung uhah a ngaihsun uh hi. 11Tua ciangin Jesuh kiangah, “Bang hangin Thukham hilh siate in, Elijah hong pai masa ding, ci uh ahi hiam?” ci-in a dong uh hi. * 12Jesuh in, “Na khempeuh a bawlkhol dingin Elijah hong pai masa takpi hi. Mihing Tapa in gimna tampi thuakin simmawhna ngah ding hi, ci-in Lai Siangtho in gen hilo ahi hiam? 13Ahi zongin ke'n kong cihin-ah, Elijah hong paikhin takpi a, Lai Siangtho in ama thu a gensa mah bangin mi pawlkhatte in a ututun amah a bawl uh hi,” ci-in a dawng hi.

Jesuh in Dawivei Naupang Damsak

(Matthai 17:14-21; Luka 9:37-43)

14Nungzui dangte' omna-ah a tun'kik uh ciangin tua lai-ah mi tampi tak na om uh hi. Thukham hilh sia pawlkhatte leh nungzuite thu na kisel uh hi. 15Mihonte in Jesuh a muh phetun lamdangsa-in ama kiangah va tai-in a hopih uh hi. 16Jesuh in a nungzui dangte kiangah, “Amaute tawh bang thu kisel na hi uh hiam?” ci-in a dong hi.

17Mihon lak panin mi khat in hong dawng a, “Sia aw, ka tapa in dawi vei-in pau theilo ahih manin nangma kiangah kong paipih hi. 18Dawi in amah a mat simin leilak den'na a, a cilphuan bua-in a ha gawi-in kongkawcip hi. Na nungzuite in dawi hong hawlkhiatsakna ding ka ngen a, ahi zongin hawlkhia theilo uh hi,” a ci hi.

19Jesuh in amaute kiangah, “Upna neilo mite aw, note bang tanvei hong ompih ding a, bang tanvei hong kikholhpih ding ka hi hiam? A naupang hong paipih un,” a ci hi. 20Amaute in zong Jesuh kiangah a naupang hong paipih uh hi. Dawi in Jesuh a muh phetin naupang kongkawsak ahih manin leilakah pukin kikhuk a, a cilphuan a bua hi. 21Jesuh in, “A natzawh bang tanvei sawtta ahi hiam?” ci-in a pa kiangah a dong hi. “A neutunga kipan ahi hi. 22A sihna dingin meikhuk sung leh tuisungah tamveipi puksakzo hi. Na hihtheih leh kote hong hehpih in la hong huh in,” ci-in a dawng hi. 23Jesuh in, “Bang hangin na hihtheih leh, ci na hi hiam? A umte-a' dingin na khempeuh hithei hilo ahi hiam?” a ci hi. 24Thakhatin naupang' pa kiko a, “Ka um hi; ka upna a kicin'na dingin hong huh in,” a ci hi. 25Mihonte amau kiangah a hong kikhawm dingin a hong taina uh Jesuh in a muh ciangin, “A pau theilo, a bilngong dawi aw, hih naupang sung pan paikhia in la, tumkik ngei nawn kei in,” ci-in a taii hi. 26A dawi nakpi takin kiko-in naupang a kongkawtsak khit ciangin a taikhia hi. Naupang pen misi tawh kibangin omcip ahih manin mi khempeuh in, “Si ta hi,” a ci uh hi. 27Ahi zongin Jesuh in naupang a khutin lenin a phongttoh leh a ding hi.

28Innsungah Jesuh a tumkhit ciangin a nungzuite in, “Bang hangin kote in dawi hawlkhia theilo ka hi uh hiam?” ci-in a dongsim uh hi. 29“Thungetna simloh a dang in hih bangte hawlkhia theilo hi,” ci-in Jesuh in a dawng hi.

Jesuh in A Sihding Genkholkik

(Matthai 17:22-23; Luka 9:43-45)

30Tua lai panin dingkhia-in Galilee gamsung nawkin pai uh a, ahi zongin mite' theihding Jesuh a ut kei hi. 31Bang hang hiam cih leh a nungzuite kiangah thu hilh a, “Mihing Tapa, mihingte' khutsungah kipia-in amaute in that ding uh a, ahi zongin ni thum khit ciangin hingkik ding hi,” a ci hi. 32A nungzuite in hih ama thuhilhna theilo uh a, ahi zongin amah dong ngamlo uh hi.

Kua Lianpen Hiam?

(Matthai 18:1-5; Luka 9:46-48)

33Tua ciangin Kapernaum khua tung uh a, innsungah a lutkhit uh ciangin a nungzuite kiangah, “Lampi-ah bang thu kisel na hi uh hiam?” ci-in a dong hi. 34Kua lianpen ihi hiam, ci-in lampi-ah amau khatlekhat kisel uh ahih manin kuamah in dawng ngamlo uh hi. * 35Tua ciangin Jesuh tu a, a kiangah nungzui sawmlenihte samin, “Mi khat peuhpeuh a lianpen a suahnop leh a neupen suak photin mi khempeuh' nasem hi masa ding hi,” a ci hi. * 36Tua ciangin Jesuh in naupang khat la a, amaute laizangah paipihin a ang-ah tawi a, 37“Keima hangin hih bang naupangno khat a limbawl mi in kei hong limbawl hi a, kei hong limbawl mi in kei hong limbawl hiloin kei hong sawlpa a limbawl ahi hi,” a ci hi. *

Ei Hong Langpanglote I Pawl Hi

(Luka 9:49-50; Matthai 10:42)

38Johan in, “Sia aw, nangma min zangin dawi a hawlkhia mi khat ka mu uh hi. Amah, ei' pawl hilo ahih manin ka kham uh hi,” a ci hi. 39“Amah kham kei un. Keima min zangin na lamdang a bawl mipa in keimah gensiat tawh thuahpah cih om theilo ding hi. 40Eite hong langpanglo peuhmah i pawl ahi hi. * 41Khrih pawl na hihna hangun tui hai khat hong suah mi peuhmah in thaman ngah hamtang ding ahihna phawk un,” ci-in Jesuh in a gen hi. *

Khialhna ding Ze-etnate

(Matthai 18:6-9; Luka 17:1-2)

42Jesuh in, “Mi khatpeuh in kei hong um hih naupangno khat a khialsak ding ahih leh a ngawngah an gawina suang lianpi khat kikhihin tuipi sungah kikhia leh ama-a' dingin hoihzaw thampek hi. 43Tua ahih manin na khut in hong khialhsak leh sattan in. Mei a mih ngeilohna hell khuk sungah khut kim tawh na lut sangin khut langkhat bui-in nuntakna sungah lut lecin nang-a' dingin hoihzaw hi. * 44(Tua lai-ah thante si ngeilo a, a mei zong mit ngeilo hi.) 45Na khe in hong khialhsak leh sattan in. Khe kim nei-in hell sungah hong kikhiat sangin khe langkhat bui-in nuntakna sungah lut lecin nang-a' dingin hoihzaw hi. 46(Tua lai-ah thante si ngeilo a, a mei zong mit ngeilo hi.) 47Na mit in hong khialhsak leh khelkhia in. Mit kim tawh hell khuk sungah hong kikhiat sangin mit langkhat taw-in Pasian' Ukna sungah om lecin nang-a' dingin hoihzaw hi. * 48Tua hell khuk sungah thante si ngeilo a, a mei zong mit ngeilo hi. * 49Bang hang hiam cih leh biakpiakna sa pen ci a kisawh ciangin Pasian' san'theih a suah bangin ze-etna haksa thuakzawhna in Pasian' san'theih hong suaksak ding hi. 50Ci hoih hi; ahi zongin a alna mang leh bangci alsakkik theiding na hi uh hiam? Note in ci al bangin hoihna nei un la, khatlekhat kilem un,” a ci hi. *