Marka 2

 

Jesuh in Khutlekhezaw Mi Khat Damsak

(Matthai 9:1-8; Luka 5:17-26)

1Tuazawh ni tawmkhat khit ciangin Kapernaum khua-ah Jesuh hong paikik a, inn-ah a omna thu hong kitheithang hi. 2Mi tampi tak hong kikhawm uh ahih manin innsung khempeuh, kongkhak pualam nangawnah mi a dim hi. Jesuh in amaute kiangah Pasian' thu hilhin a om laitakin, 3mihing li in Jesuh kiangah khutlekhezaw mi khat a paipih dingin hong pua uh hi. 4Ahi zongin mihonpi kinehlua ahih manin Jesuh kiangah paipih theilo uh hi. Tua ahih manin Jesuh' omna san inn tungkhum hongletin, a lupna pheek tawh a mipa a khaisuk uh hi. 5Jesuh in hih mite' up mahmahna thu a muh ciangin khutlekhezaw mipa kiangah, “Ka ta aw, na mawhnate hong kimaisak hi,” a ci hi.

6Tua lai-ah a om, Thukham hilh siate pawlkhat in a lungsim sung uhah, 7“Bang hangin hih mipa, Pasian tawh a kikim bangin kingaihsunin hih bangin pau ngam ahi hiam? Pasian simloh kuamah in mawhna maisak theilo hi,” ci-in a ngaihsun uh hi.

8Jesuh in a lungsim sung uha amau ngaihsutna theipah ahih manin amaute kiangah, “Bang hangin tua bangin ngaihsun na hi uh hiam? 9Hih khutlekhezaw mipa kiangah, ‘Na mawhna hong kimaisak khin hi,’ cih ding leh, ‘Tho-in na lupna pheek la in la pai dih in,’ cih ding koi baihzaw ahi hiam? 10Ahi zongin Mihing Tapa in leitungah mawhmaisak theihna ding thu nei hi, ci-in na theihna dingun kong lak ding hi,” a ci hi. Tua ahih manin khutlekhezaw mipa kiangah, 11“Tho-in na lupna pheek la in la, na inn-ah ciah in,” a ci hi.

12Tua mipa zong amaute khempeuh' muhin tho a, a lupna pheek la-in a paikhia pah hi. Amaute khempeuh in lamdangsa mahmah uh a, Pasian phatin, “Hih bang mahmah i mu ngei nai het kei hi,” a ci uh hi.

Levi A Kisapna

(Matthai 9:9-13; Luka 5:27-32)

13Tua ciangin Galilee Tuili gei-ah Jesuh a paikik hi. Ama kiangah mihonpi hong pai uh a, Jesuh in tua mihonte thu a hilh hi. 14Tua bangin a paina-ah Alfeas tapa Levi, a siahdon'na zumah tu-in a om a mu hi. Jesuh in ama kiangah, “Kei hong zui in,” a ci hi. Levi zong dingin Jesuh' nung a zuipah hi.

15Tua nung ciangin Jesuh in Levi' inn-ah an a va ne hi. Siahdong mi tampi leh thukham a khial mi tampite in Jesuh zui uh a, amaute tampi in Jesuh leh a nungzuite tawh an a nekhawm uh hi. 16Hih thukham khialte leh siahdongte tawh Jesuh in an a nekkhopna Farisi mite sung panin Thukham hilh siate pawlkhat in a muh uh ciangin a nungzuite kiangah, “Bang hangin hih bang mite tawh an nekhawm ahi hiam?” ci-in a dong uh hi.

17Jesuh in hih thu a zak ciangin amaute kiangah, “Cidamte in siavuan kisamlo uh a, cina mite bek in kisam uh hi. Mite in a zahtak mihoihte a kisikna dingun a sam dingin a hong pai ka hi kei a, mite in a pampaih mite a kisikna dingun a sam dingin a hong pai ka hi hi,” a ci hi.

Antan'na Thudotna

(Matthai 9:14-17; Luka 5:33-39)

18Tua hun laitakin Tuiphumpa Johan' nungzuite leh Farisi mite in an a tang uh hi. Jesuh kiangah mi pawlkhat hong pai-in, “Bang hangin Tuiphumpa Johan' nungzuite leh Farisi mite' nungzuite in an tang uh a, nangma nungzuite in tanglo se ahi uh hiam?” ci-in a dong uh hi.

19Jesuh in, “Mo pawi a siim mite in an nelo dingin um na hi uh hiam? Zineipa tawh a omkhawm sung uh an neloin omlo ding uh hi. 20Ahi zongin amaute kiang panin zineipa a kipaikhiatpih hun hong tung ding a, tua hun a tun' ciangin an neloin a om ding uh hi.

21“Kuamah in puantungsilh lui phopna dingin a ton nailo puanbek a thak zang ngeilo hi. Zang zenzen leh a puanbek thak in a puan lui balkek ding a, a vang golzawsop ding hi. 22Kuamah in savun um lui sungah leenggahzu a thak thun ngeilo hi. Thun zenzen leh leenggahzu in savun um phukham ding a, a leenggahzu leh a savun um, a nih tuakin a kisia suak ding hi. Tua ahih manin leenggahzu thak koihna dingin savun um thak kizang hi,” ci-in a dawng hi.

Nungzuite in Sabbath ni-in Mangbuhvui Zut

(Matthai 12:1-8; Luka 6:1-5)

23Khatvei, Sabbath ni khatin Jesuh leh a nungzuite, mangbuh lo nawkin a pai uh hi. A paikawmun a nungzuite in mangbuhvui a zut uh hi. * 24Tua ahih ciangin Farisi mite in Jesuh kiangah, “Bang hangin Sabbath ni-in gamtatloh dingpi, na nungzuite gamta uh ahi hiam?” a ci uh hi.

25Jesuh in, “David in annek ding a kisap laitakin a gamtatna thu sim ngeilo na hi uh hiam? Amah leh a mite a gilkial uh hi. 26Tua ahih ciangin Pasian' biakinn sungah lutin Pasian biakna-a a kipia anlumte a ne uh hi. Abiathar in siampi lianpen a sep laitakin hih thu piang hi. I Thukham tawh kizui-in ci lehang, hih anlumte pen siampite bek in a nektheih ding hinapi-in David in ne-in, a mite nangawn a pia lai hi,” ci-in a dawng hi. * *

27Tua ciangin Jesuh in, “Sabbath ni, mihingte' phattuamna dingin a kibawl hi a, mihing pen Sabbath ni a phattuamna dingin a kibawl hilo hi. 28Tua ahih ciangin Mihing Tapa pen Sabbath ni nangawn a ukpa ahi hi,” ci-in a thugen a khum hi.