Marka 10

 

Kimakna Thu Jesuh' Genna

(Matthai 19:1-12; Luka 16:18)

1Tua lai panin Jesuh dingkhia-in Judea gam leh Jordan Gun gal gam tengah a pai hi. Ama kiangah mihon tampi hong kikhawmkik uh a, a hilh ngeisa bangin amaute tungah thu a hilh hi.

2Farisi mi pawlkhat hong pai uh a, amah a mawhsak theihna ding uh a deihna-in, “Mi khat in a zi a mathei ding mah ahi hiam?” ci-in a dong uh hi. 3Jesuh in, “Moses in bang thu hong pia ahi hiam?” ci-in a dot ciangin amaute in, 4“Moses in kimakna lai gelhsakin masak thei hi,” ci-in a dawng uh hi. * 5Jesuh in amaute kiangah, “Note, hilhzawhin omlo na hih manun Moses in hih ngeina a bawl ahi hi. 6Ahi zongin pian'cil lai-in, ‘Pasian in numei leh pasal a bawl hi. * 7Tua ahih manin pasal in a nu leh a pa nusia-in a zi tawh kigawm ding a, 8amau nihte pen pumkhat bang ahi ding uh hi,’ na kici hi. Tua ahih manin amaute nih hi nawnloin khat hita uh hi. * 9Tua ahih manin Pasian' gawmsa mite, kuamah in khen kei ta hen,” a ci hi.

10Innsungah a tumkhit uh ciangin nungzuite in hih thu tawh kisai Jesuh kiangah a dongkik uh hi. 11Amah in, “A zi ma-a numei dang tawh a teng mi peuhmah a zi a palhngulh ahi hi. 12A pasal ma-a pasal dang tawh a teng mi peuhmah in zong a pasal a palhngulh ahi hi,” a ci hi. *

Jesuh in Naupangnote Thupha Pia

(Matthai 19:13-15; Luka 18:15-17)

13Mi pawlkhat in a naupangte uh Jesuh in a lawn'sak ding deih uh ahih manin hong paipih uh a, ahi zongin a nungzuite in na kham uh hi. 14Jesuh in tua thu a phawk ciangin a heh suak a, a nungzuite kiangah, “Naupangte kham kei un la, ka kiangah hong paisak un. Bang hang hiam cih leh Pasian' Ukna sungah hih bang mite a om ahi hi. 15Hih naupangno khat' man' bangin Pasian' Ukna a manglo mi peuhmah Pasian' Ukna sungah omlo ding ahihna thei un,” a ci hi. * 16Tua ciangin naupangnote la-in a ang-ah tawi a, a tung uhah a khut nga-in thupha a pia hi.

Mi Haupa

(Matthai 19:16-30; Luka 18:18-30)

17Jesuh in a khualzinna a zom dingin a paikhiat ding laitakin mi khat hong tai-in a mai-ah hong khukdin' a, “A dik siapa aw, nuntak tawntungna ka ngahna dingin bang hih ding ka hi hiam?” a ci hi. 18Jesuh in, “Bang hangin kei midik hong ci na hi hiam? Pasian simloh kuamah a diktatzo omlo hi. 19Mi that kei in; numei tungah mawh kei in; mi' neihsa gu kei in; mi khem kei in; na nu na pa zahtak in, cihna thukhamte theilo na hi hiam?” a ci hi. * 20Amah in, “Sia aw, ka neutunga kipanin hih thukhamte khempeuh ka zuikhin hi,” a ci hi. 21Tua ciangin Jesuh in itna tawh tua mipa enin, “Na khat bek na kisam lai hi. Pai in la, na neih khempeuh na zuak khit ciangin mizawngte tungah na sumkhotte va pia in. Tua hi leh vantungah sum na hau ding hi. Tua khit ciangin ka nung hong zui in,” a ci hi. 22Tua mipa mihau khat ahih manin hih thu a zak ciangin, maikhingin a dahsa-in a paikhia hi.

23Jesuh in a kiima om a nungzuite enin amaute kiangah, “Pasian' Ukna sungah mihaute a lutding uh bangzah takin haksa ahi hiam?” a ci hi. 24Nungzuite in hih thu a zak uh ciangin lamdangsa uh a, ahi zongin Jesuh in a thugen zomlai-in, “Tate aw, Pasian' Ukna sungah lutding bangzah takin haksa ahi hiam? 25Pasian' ukna sungah mihau khat a lutding sangin phim bilvang sungah kalaoh khat a lutding baihzaw lai hi,” a ci hi. 26Tua ciangin amaute in lamdangsa mahmah uh a, “Tua bang hi leh kua in hotkhiatna ngahzo ding ahi hiam?” a ci uh hi. 27Jesuh in amaute enin, “Mihingte-a' dingin hi zolo mah hi; ahi zongin Pasian-a' dingin ahi mawh thu hilo hi; Pasian-a' dingin na khempeuh hithei hi,” a ci hi.

28Tua ciangin Peter in ama kiangah, “Ko zong na khempeuh nusia-in nang kong zui uh hi,” ci-in a gen ciangin 29Jesuh in amaute kiangah, “Hi mah hi; ke'n kong cihin-ah, keima hang leh lungdamna thu hangin a inn, a sanggam pasalte, a sanggam numeite, a nu, a pa, a tate, leh a leitang, khat peuhmah a nusiate in 30tukhang hunin a zah za khat innte, sanggam pasalte, sanggam numeite, nute, tate, leitangte ngahding uh a, bawlsiatna zong ngahding uh hi. Hong tungding hunah zong nuntak tawntungna ngahlai ding uh hi. 31Ahi zongin tuhun laitakin a lian ahi mi tampite tua hun ciangin a neu hi ding uh a, tuhun laitakin a neu ahi mi tampite a lian hi ding uh hi,” a ci hi. *

Jesuh in A Sih ding A Thumveina Genkhol

(Matthai 20:17-19; Luka 18:31-34)

32Jerusalem khua manawhin a paitoh laitakun a nungzuite mai-ah Jesuh na ma pai hi. A nungzuite patau uh a, amaute a zui mihonpite zong a lau uh hi. Jesuh in nungzui sawmlenihte tuamsap kik leuleu a, ama tunga piangding thute genin, 33“Na ngai un. Tu-in Jerusalem khua-ah a paito ding ihi hi; tua lai mun panin siampi liante leh Thukham hilh siate' khutsungah Mihing Tapa kipia ding hi. Amaute in a sihna dingin thu a khen khit uh ciangin Gentail mite' khutsungah a ap ding uh hi. 34Tua mite in amah simmawh bawlin, cilphihin, satin a that ding uh hi. Ni thum khit ciangin amah thokik ding hi,” a ci hi.

James leh Johan Ngetna

(Matthai 20:20-28)

35Tua laitakin Zebedi' tapa James leh Johan in Jesuh hong naih uh a, “Kong nget peuhpeuh uh nong vaihawmsak ding ka deih uh hi,” a ci uh hi. 36Jesuh in, “Bang kong vaihawmsak ding deih na hi uh hiam?” ci-in a dot ciangin 37amaute in, “Minthangin kumpi tokhom tungah na tut ciangin na taklamah khat, na veilamah khat hong tusak lecin ka ut uh hi,” a ci uh hi. 38Ahi zongin Jesuh in, “Note in na hong nget uh na thei kei uh hi. Keimah in ka thuakding gimna note in thuakzo ding a, ka kiphumna ding gimna-ah kiphumzo ding na hi uh hiam?” ci-in a dot ciangin * 39amaute in, “Ka hizo ding uh hi,” ci-in a dawng uh hi. Tua ciangin Jesuh in amaute kiangah, “Keimah in gimna ka thuakding mah bangin na thuak takpi ding uh a, ka thuakding kiphumna zong na thuak takpi ding uh hi. 40Ahi zongin ka taklama tut ding leh ka veilama tut ding pen kei' hong piaktheih hilo a, a tu dingin Pasian in a vaihawmsaksate-a' ding ahi hi,” a ci hi.

41Hih a kihona uh thu, nungzui dang sawmte in a zak uh ciangin James leh Johan tungah a heh suak uh hi. 42Ahi zongin Jesuh in amaute samin, “Leitung mi a ukte in mite tungah aana nei-in, mi a makaite in thuneihna tawh a ukna thu na thei uh hi. 43Ahi zongin note lakah tua bangin hilo ding hi. Note lakah a lian nuam khat peuhpeuh, adangte khempeuh' nasem hi ding a, * 44a makai ahi nuam khat peuhpeuh, adangte khempeuh' sila hi ding hi. * 45Bang hang hiam cih leh Mihing Tapa zong, midangte ama na a semsak dingin a hong pai hilo hi. Midangte' na a sem ding leh mi tampi a tatkhiatna ding ama nuntakna a pia dingin a hong pai ahi zaw hi,” a ci hi.

Mittaw Bartimias in Khua Mukik

(Matthai 20:29-34; Luka 18:35-43)

46Tua ciangin Jerikho khua a tung uh hi. Tua khua panin a nungzuite leh mihonpite tawh a paikhiat laitakun, Timias' tapa a mittaw khutdawhin a ngen Bartimias, lampi gei-ah na tu hi. 47Nazareth khuami Jesuh ahihna thu a theih ciangin nakpi takin awng a, “David' suan Jesuh aw, kei hong hehpih in,” a ci hi.

48A kiima om mihonte in amah taii-in, a paulohna dingin a kham uh hi. Ahi zongin amah nakpi takin awngzaw semsem a, “David' suan aw, kei hong hehpih in,” a ci hi. 49Tua ciangin Jesuh khawlin a nungzuite kiangah, “Va sam un,” a ci hi. Amaute in mittawpa samin ama kiangah, “Na lung nuamsak in; ding in; amah in nang a hong sam hi,” a ci uh hi.

50Amah in zong a puan lawnkhia a, dingto pahin Jesuh kiangah a pai hi. 51Jesuh in, “Bang kong hihsak ding deih na hi hiam?” ci-in a dot ciangin mittawpa in, “Sia aw, khua ka mukik thei nuam hi,” a ci hi. 52Tua ciangin Jesuh in, “Na ciah thei ta ding hi; na upna in nang hong damsakzo hi,” a cihkhit phetin amah in khua mukik theipah a, tua a paina lampi-ah Jesuh' nung a zui hi.