Marka 6

 

Nazareth khua-ah Jesuh Kisanglo

(Matthai 13:53-58; Luka 4:16-30)

1Tua lai panin ama pian'na khua Nazareth-ah Jesuh pai a, a nungzuite in a zui uh hi. 2A Sabbath ni ciangin kikhopna inn-ah thu a hilh hi. Ama thuhilh a za mi tampite in lamdangsa-in, “Hihpa in hih thute koi panin a ngah ahi hiam? Hihpa tungah a kipia pilna a bang pilna ahi hiam? Bangci-in na lamdang hici bawltheih ahi hiam? 3Amah khutsiampa hilel a, Mary' tapa hilo ahi hiam? James, Josef, Judas, leh Simon-te' u hilo ahi hiam? A nau numeite zong hih lai mah-a om hilo ahi uh hiam?” a ci uh hi. Tua hi a, amah sangzolo uh hi.

4Tua ciangin Jesuh in amaute kiangah, “Kamsang khat pen, ama khua, ama behte, leh ama innsung longal-ah kizahtakin pahtawina a ngah hi,” a ci hi. * 5Tua hi a, cina tawmkhatte tungah khut nga-in a damsak cih simloh, tua lai-ah na lamdang lian bawl theilo hi. 6Amaute in amah a uploh manin lamdang a sa mahmah hi.

Tua ciangin tua kiima om khuaneute-ah thuhilhin a pai kawikawi hi.

Sawmlenihte A Kisawlna

(Matthai 10:5-15; Luka 9:1-6)

7Jesuh in sawmlenihte sam a, amaute tungah dawi hawlkhiatna ding vangliatna pia-in, amaute nih nihin a sawlkhia hi. 8Amaute kiangah, “Ciangkhut simloh, na khualzinna uhah bangmah keng kei un. An ahi a, ip ahi a, sum ahi zongin keng kei un. 9Khedap bulh un la, ahi zongin puanak nih silhthuah kei un. 10A zin dingin a hong deih inn khat peuhpeuhah tung un la, tua khua panin na paikhiat mateng uh tua inn mahah om paisuak un. 11Na paina uh khua khatpeuh in note hong sangloin, na thuhilhna uh hong ngaihnop kei uh leh, tua khua nusia-in, na khe uha leivui bangte sin'san un. Tua pen amaute-a' dingin hilhkholhna ahi hi,” ci-in a vaikhak hi. * *

12Tua ahih ciangin amaute kuankhia uh a, mite a mawhna panun a kisikna dingun thu a hilh uh hi. 13Dawi tampi hawlkhia uh a, cina mi tampi sathau zutin a damsak uh hi. *

Tuiphumpa Johan A Sihna

(Matthai 14:1-12; Luka 9:7-9)

14Kumpi Herod in Jesuh thu a kigengenna thu a za hi. Mi pawlkhat in, “Tuiphumpa Johan, sihna panin hingkik hi. Tua ahih manin hih vangliatnate nei hi,” a ci uh hi. 15Ahi zongin a dangte in, “Elijah hi,” ci uh a, pawlkhat leuleu in, “Tanglai-a kamsangte mah bangin kamsang khat hi,” a ci uh hi. * 16Herod in Jesuh' nasepnate a zak ciangin, “A lutang ka tankhiat sak Johan hong hingkik hi,” a ci hi. 17-18Bang hang hiam cih leh Herod in a nau Filip' zi Herodias a ten'pihna hangin Johan in Herod kiangah, “Na naupa' zi na ten'pih ding ngeina hilo hi,” ci-in gen zelzel ahih manin Herodias a heh suak a, galkapte in Johan manin thong sungah a khiatna dingin Herod a vaihawmsak hi. * 19Tua ahih manin Herodias in Johan mudahin thatnuam a, ahi zongin that zolo hi. 20Bang hang hiam cih leh Johan pen a thuman mihoih khat hi, ci-in Herod in ngaihsun ahih manin amah zahtakin siatna a thuakna ding panin hu hi. Ama thugente in a lungsim nuamlosak hi; ahi zongin a thugen zanuam veve hi.

21Ahi zongin a tawpna-ah Herodias in hunhoih ngah hi. Herod a suah ni hun a tun' ciangin kumpi uliante, galkapmangte, leh Galilee gamsunga om ulian khempeuh-a' dingin pawi a kham hi. 22Tua pawi bawlna sungah Herodias' tanu hong pai-in hong laam a, Herod leh a leenglate khempeuh lungdam mahmah uh hi. Tua ahih ciangin kumpipa in, “Bang deih na hiam; na deih peuhpeuh kong pia ding hi,” a ci hi. 23Amah in kamciam pia a, “Ka kumpi gam phelkhat ciangdong nangawnin, nong nget peuhpeuh kong piakna ding kong kiciam hi,” a ci hi.

24Tua ahih ciangin tua numeino va paikhia-in a nu kiangah, “Bang ngen ding ka hi hiam?” ci-in a va dong hi. A nu in, “Tuiphumpa Johan' lutang ngen in,” ci-in a dawng hi. 25Numeino zong kumpipa kiangah hong paikik pahin, “Kuangdai khat sungah Tuiphumpa Johan' lutang nong piakpah ding ka deih hi,” a va ci hi.

26Hih thu a zak ciangin kumpipa dah mahmah hi. Ahi zongin a kiciamnasa hang leh a leenglate' maitang a zahtakna hangin nial ngamlo hi. 27Tua ahih ciangin Johan' lutang a hong paipihna dingin galkapte khat a sawlpah hi. Amah zong pai-in thong sungah Johan' lutang tankhia a, 28kuangdai khat sungah a lutang hong paipihin numeino tungah a pia hi. 29Johan' nungzuite in hih thu a zak uh ciangin hong pai-in a luanghawm la uh a, hanah a vui uh hi.

Tul Nga Vakna

(Matthai 14:13-21;Luka 9:10-17; Johan 6:1-15)

30Tua khit ciangin Jesuh kiangah sawltakte hong ciahkik uh a, a sepna khempeuh uh leh a thuhilhna khempeuh uh a zasak uh hi. 31Mi a ciah leh a kuan kiphamat uh ahih manin Jesuh leh a nungzuite in annekna ding hun nangawn nei manlo uh hi. Tua ahih manin Jesuh in, “Ei guak i om theihna ding mun khatah paikhia ni; tua lai-ah na tawlnga thei ding uh hi,” a ci hi. 32Tua ahih ciangin gunkuang tuangin gamdaihna mun a zuan dingin a pai uh hi.

33Ahi zongin a paikhiatlam uh leh amaute ahihlam uh, mi tampi in thei uh ahih manin khuapi khempeuh panin a hong pai mite, lei lam tawnin na pai uh a, Jesuh leh a nungzuite a tun' ma-in a na ma tun' uh hi. 34Jesuh, tuigei a tun' ciangin mi tampi a na omkhin mu a, amaute, a cing omlo tuute tawh kibang sa ahih manin a khasiat mahmah hi. Tua hi a, amaute thu tampi tak a hilh hi. * 35Nitak lam ciangin a nungzuite in Jesuh kiangah, “Tu-in nitak hita a, hih lai mun lah gamlak ahi hi. 36Hih kiima om khuate-ah amaute pai-in a annek ding uh a leina dingun hih mihonte sawlkhia in,” a ci uh hi. 37Ahi zongin Jesuh in, “Amaute' nekding bangkhat peuhpeuh pia un,” a ci hi. A nungzuite in, “Ngun peek za nih tawh anlum va lei-in amaute' nek dingin pia ding ka hi uh hiam?” ci-in a dong uh hi. 38Tua ciangin Jesuh in, “Anlum bangzah nei na hi uh hiam, va en dih un,” a ci hi. Amaute in, “Anlum nga leh ngasa tawn nih om hi,” ci-in a hong genkik uh hi.

39Tua ciangin Jesuh in, “Mihonte a pawl a pawlin khen un la, lopa hing tungah tusak un,” a ci hi. 40Tua ahih manin mihonte zong pawlkhatah za, pawlkhatah sawmnga, cih bangin a honhonin a gualtut uh hi. 41Tua ciangin Jesuh in a anlum nga leh a ngasa tawn nihte la a, vantung lam ento-in Pasian tungah lungdamna a ko hi. A anlumte balnen a, mite tungah a piak dingin nungzuite a pia hi. Tua mah bangin ngasa tawn nihte zong amaute khempeuh a hawmsak hi. 42Amaute khempeuh in ne-in a kham uh hi. 43Tua ciangin nungzuite in a kikhamval anlum leh ngasa khawm uh a, paipel sawmlenih a dim hi. 44Tua an a ne mi sung panin pasal cingteng tul nga a pha hi.

Jesuh, Tui Tungah Pai

(Matthai 14:22-33; Johan 6:16-21)

45Tua khit phetin Jesuh in a nungzuite gunkuangah tuangsakin, a galkhata om Bethsaida khua-ah mapaisak a, amah in mihonte a khua ciatah a ciah dingin a sawl hi. 46Amaute tawh a kikhen khit ciangin thungen dingin mualtungah a kahto hi. 47Khuamial ciangin tui laizang dong gunkuang tungta a, Jesuh ahih leh leitungah amah guakin omlai hi. 48Huih in a nungzuite lehmut ahih manin gunkuang hot zoloin haksa a sakna thu uh Jesuh in a thei hi. Tua hi a, zingsang lam nai thum pan nai guk kikal khawngin a nungzuite kiang lamah tuitung tawnin Jesuh a pai hi. Amaute a khengsuak ding bangin pai a, 49ahi zongin a nungzuite in tuitunga mi pai a muh ciangun, “Sikha hi,” ci-in ngaihsun uh ahih manin a awngkeek gawp uh hi. 50Bang hang hiam cih leh amah a muh uh ciangin lau mahmah uh hi. Ahih hangin Jesuh in thakhatin amaute hopihpah a, “Lungnuamin om un. Keimah ka hi hi; lau kei un,” a ci hi. 51Tua ciangin amaute omna gunkuang tungah Jesuh kahto a, huihpi zong a daipah hi. Nungzuite in lamdang a sa mahmah uh hi. 52Bang hang hiam cih leh lungsim navaklo uh ahih manin anlum tawh kisai thupiang tel theilo uh hi.

Gennesaret gamah Jesuh in Cina Damsak

(Matthai 14:34-36)

53Tui a kantan khit uh ciangin Gennesaret gam tung uh a, tuigei-ah a gunkuang uh a khih uh hi. 54Gunkuang panin a paikhiat khit phetun mite in Jesuh ahihlam a theipah uh hi. 55Tua gamsung tengah mite tai kawikawi uh a, Jesuh om hi, ci-in a kigenna mun peuhpeuhah cinate a lupna pheek uh tawh hong pua uh hi. 56Khuapi, khuaneu, leh khuakehtea a paina khempeuhah, mite in mihon kikhopna munah cinate hong pua uh a, a puanmongteep beek a lawn'sakna ding deihin Jesuh kiangah a thum uh hi. A puanmongteep a lawngkha mi khempeuh cidam pahpah uh hi.