Marka 14

 

Makaite in Jesuh Thahsawm

(Matthai 26:1-5; Luka 22:1-2; Johan 11:45-57)

1Paisan Pawi leh Silngo Sawhloh Anlum Pawi a tun' ma ni nih ni-in siampi liante leh Thukham hilh siate in Jesuh simmatin a thahtheihna ding uh lampi a zong uh hi. * 2Ahi zongin, “Mihonpite hong buai khading ahih manin hih pawi hun sungin hih kei ni,” a ci uh hi.

Bethany khua-ah Jesuh Sathau Kinilh

(Matthai 26:6-13; Johan 12:1-8)

3Bethany khua-ah, miphak ahi ngei Simon' inn-ah Jesuh in an a nek laitakin, numei khat in a manpha mahmah nard paknamtui citak suangngo thawl dimin a om khat hong tawi a, a suangngo thawl sukhamin Jesuh' lu tungah a paknamtui a sungsuk hi. * 4Tua lai-a om mi pawlkhat a heh suak a, “Bang hangin hih paknamtui mawk beisak ahi hiam? 5Kizuak leh ngun peek za thum val kikhawng ding a, a sum mizawngte tungah kipia thei ding hi,” ci-in nakpi takin tua numei a mawhsak uh hi.

6Ahi zongin Jesuh in, “Bangmah cihse kei un! Bang hangin nawngkaisak na hi uh hiam? Amah pen a kilawm a hoihin kei tungah hong gamta hi. 7Mizawngte ahih leh note tawh omkhawm tawntung ding a, na huhnop hun peuhpeuhun na huh thei ding uh hi. Ahi zongin kei pen note tawh kong omkhawm tawntung kei ding hi. * 8Amah in ka luang a kivuina dingin paknamtui a hong ma nuhkhol hi a, a hihtheih zahzah ciang a hih khinta ahi hi. 9Hih thu limtakin phawk un! Lungdamna thu a kihilhna leitung mun khempeuhah hihnu' thu kiphawkin kei tungah hong sepnate kigengen ding hi,” a ci hi.

Jesuh Lehhek ding Judas Thukim

(Matthai 26:14-16; Luka 22:3-6)

10Tua laitakin sawmlenihte sungpan Iskariot' tapa Judas in amaute tungah Jesuh a piaktheihna dingin siampi liante kiangah a va pai hi. 11Siampi liante in a thu a zak uh ciangin lungdam mahmah uh a, sum tawh kong guai ding uh hi, ci-in thu a ciam uh hi. Tua ahih manin Judas in Jesuh a lehhek theihna ding a hunhoih a zong hi.

Jesuh in A Nungzuite tawh Paisan Pawi An Ne

(Matthai 26:17-25; Luka 22:7-14, 21-23;Johan 13:21-30)

12Paisan Pawi an dingin tuuno a kigawh ni, Silngo Sawhloh Anlum Pawi ni masa ni-in a nungzuite in Jesuh kiangah, “Koi lai-ah pai-in Paisan Pawi an ding hong bawlsak ding ka hi uh hiam?” ci-in a dong uh hi. 13Tua ciangin Jesuh in a nungzuite nih sawlin amaute kiangah, “Jerusalem khuasungah va pai le uh cin, tuibeel a pua mi khat na mu ding uh hi. Amah zui un la, 14ama tumna innteekpa kiangah, ‘Siapa in hih bangin ci hi: Ka nungzuite tawh Paisan Pawi an ka nekna ding uh zintun'na ding inndei koilai ahi hiam, ci hi,’ va ci un. 15Amah in a baihsa-in a na kikoihsa inndei tungnung a zai khat hong lak ding hi. Tua lai-ah na bawl un,” a ci hi. 16Nungzuite gel zong khuasungah va pai uh a, Jesuh' gen bangin a va mu uh hi. Tua lai-ah Paisan Pawi an ding a bawl uh hi.

17A nitak ciangin a nungzui sawmlenihte tawh tua munah Jesuh a om hi. 18An a nek laitakun Jesuh in, “Tu laitakin kei tawh an a nekhawm mi khat in kei hong lehhek ding hi,” a ci hi. * 19A nungzuite in lamdangsa uh a, a banbanin, “Kei nong cihna hi kei buangin teh,” a ci ciat uh hi. 20Jesuh in amaute kiangah, “No sawmlenihte sung, kei tawh an kuang a sawkkhawmte mah sungpan ahi hi. 21A kigelhsa mah bangin Mihing Tapa ahih leh si ding a, ahi zongin a lehhekpa' thuakna nasia mahmah ding hi. Tua mipa a piang ngei hetlo hi leh ama-a' dingin hoihzaw tham ding hi,” a ci hi.

Nekkhawm Bawlna A Pian'na

(Matthai 26:26-30; Luka 22:15-20; 1 Kor 11:23-26)

22Tua bangin an a nek laitakun Jesuh in anlum la-in lungdamna a kohkhit ciangin balnenin a nungzuite tungah pia a, “Ne un; hih pen keima pumpi ahi hi,” a ci hi. 23Tua ciangin hai la a, lungdamna a kohkhit ciangin a nungzuite tungah pia a, tua hai panin a dawnkim uh hi. 24Tua ciangin amaute kiangah, “Hih pen mi tampite-a' dingin a luang, thuciamna thak a kipsak keima sisan ahi hi. * 25Pasian' Ukna sungah leenggahzu thak ka dawnkik ni matengin leenggahzu a dawn nawnlo ding ka hihna thu limtakin thei un,” a ci hi.

26Amaute in la khat a sakkhit uh ciangin Oliv Mual-ah a pai uh hi.

Peter' Nial ding Kigenkhol

(Matthai 26:31-35; Luka 22:31-34; Johan 13:36-38)

27Tua ciangin Jesuh in amaute kiangah, “‘Tuucingpa ka satlum ding a, tuute a kithehthang ding hi,’ ci-in Lai Siangtho sungah a kigelh mah bangin note in kei nong taisan ding uh hi. * 28Ahi zongin hong kithawh kiksak khit ciangin Galilee gam note mai-ah ka pai ding hi,” a ci hi. * 29Tua ciangin Peter in, “Adang khempeuh in nang hong taisan ahi zongin ke'n kong nusia ngei kei ding hi,” a ci hi. 30Jesuh in, “Tuzan mahmahin ak nihvei a khuan' ma-in thumvei tak kei na hong nial ding lamtak phawk in,” a ci hi. 31Ahi zongin Peter in, “Nang tawh sihkhawmna ding ciangdong ahi zongin kong nial ngei het kei ding hi,” ci-in khauhtakin a gen hi. Tua mah bangin a vekpi-un a ci kim uh hi.

Gethsemane-ah Jesuh in Thu Ngen

(Matthai 26:36-46; Luka 22:39-46)

32Tua lai panin Gethsemane a kici munah pai-in a tun' uh ciangin Jesuh in a nungzuite kiangah, “Thu ka va nget hun sungteng hih lai-ah na om un,” a ci hi. 33Tua ciangin Peter, James, leh Johan-te paipih lai a, nakpi takin lungkhamin a dahna hong kipan hi. 34Amah in, “Ka lungsim dahna lianlua mahmah ahih manin ka si dektak hi. Hih lai-ah om un la na ngak un,” a ci hi. 35Amah tawmkhat pailai-in leilakah boksuk a, ahi thei ding ahih leh hih thuakna hun tawh a kipelhna dingin thu a ngen hi. 36“Pa aw, na khempeuh na hihthei hi. Hih ka thuak ding gimna tawh hong kipelhsak in. Ahi zongin kei' deihna bang hiloin nangma deihna bang hizaw hen,” a ci hi.

37Tua ciangin hong pai a, a nungzui thumte ihmu-in om a muh ciangin Peter kiangah, “Simon aw, ihmu na hi uh hiam? Nai khat sung nangawn hong ngak zolo liang na hi uh hiam?” a ci hi. 38Tua ciangin amaute kiangah, “Ze-etna-ah na pukkhak lohna dingun pilvangin thu ngen un. Lungsim in ze-etna nangnuam napi, pumpi in nang zolo hi,” a ci hi. 39Tua ciangin paikhia leuleu-in thu a nget ngeiteng mah va ngen leuleu hi. 40Hong paikik ciangin a nungzuite na ihmu leuleu uh hi. A ihmut uh suak mahmah hi. Jesuh kiangah a gen ding uh bangmah theilo uh hi.

41A thumveina a hong ciahkik ciangin amaute kiangah, “Ihmu-in na tawlnga hithiat lailai na hi uh hiam? Phazo hi. A hun hong tungta hi. Mihing Tapa mawhnei mite' khutsungah hong kipia khinta hi. 42Tho un; pai ta ni. Kei hong lehhekpa hih lai-ah hong tungta hi,” a ci hi.

Jesuh a Kilehhekna leh a Kimatna

(Matthai 26:47-56;Luka 22:47-53; Johan 18:1-11)

43Tua bangin Jesuh in thu a gen laitakin sawmlenihte sung panin Judas hong tung a, siampi liante, Thukham hilh siate, leh upate in a sawl mihonte in namsau leh molhtum tawi-in hong zui uh hi. 44A lehhekpa in mihonte tungah, “Ka nappa pen Jesuh hi ding hi. Tuapa man un la limtakin cingin paikhiatpih un,” ci-in a genkhol hi.

45Tua ahih manin hong tun' phetin Jesuh kiangah paipah a, “Sia aw,” ci-in limnap mahmah hi. 46Tua ahih ciangin amaute in Jesuh manin limtakin a lencip uh hi. 47Tua laitakin a gei-a dingte khat in a namsau dokin siampi lianpenpa' nasempa a sat leh a bil a satkhiatsak hi. 48Tua ciangin Jesuh in amaute kiangah, “Guta buluhte a man ding bang keekin, kei a man dingin namsau leh molhtum tawh hong kuan na hi uh hiam? 49Nisim nisimin biakinn sungah thuhilhin note tawh ka omkhawm a, ahi zongin nong man kei uh hi. Ahi zongin hih thu pen Lai Siangtho sunga a kigelh thu a tun'na ding ahi hi,” a ci hi. * 50Tua ciangin a nungzuite khempeuh in Jesuh a taisan uh hi.

Tangval a Taipa

51Puanza kang khat bek a silh tangval khat in zong Jesuh a zui hi. Amaute pawlkhat in amah a mat ciangin, 52a puanza kang nusia-in a guaktangin a tai hi.

Jesuh, Uliante' Mai-ah

(Matthai 26:57-68;Luka 22:54-55, 63-71; Johan 18:12-14, 19-24)

53Mihonte in siampi lianpenpa' inn-ah Jesuh paipih uh a, siampi liante, upate, leh Thukham hilh siate hong kikhawm uh hi. 54Peter in zong Jesuh' nung galzuih a, siampi lianpenpa' inntual ciangah a om hi. Tua lai-ah palikte tawh mei awi-in a tukhawm hi. 55Siampi liante-a kipan uliante khempeuh in Jesuh a thahtheihna dingin thu zong uh a, ahi zongin bangmah mulo uh hi. 56Mi tampi in amah a mawhsakna dingun zuauthu gen uh a, ahi zongin a genna uh khatlekhat kituaklo hi.

57Tua ciangin mi pawlkhat hong dingin amah a mawhsakna dingun zuauthu hong gen uh a, 58“Mihingte' lam hih biakinn ka susia ding a, ni thum khit ciangin mihingte' lam a hilo adang khat ka lam ding hi,” a cihna ka za uh hi, ci-in hong gen uh hi. * 59Amaute nangawn zong a thugenzia uh kituaklo hi. 60Tua ciangin amaute khempeuh mai-ah siampi lianpenpa hong dingin Jesuh thu dong a, “Nangmah mawhsakna-in a gen uh thute na dawn'na ding omlo ahi hiam?” ci-in a dong hi. 61Ahi zongin Jesuh pauloin a omcip hi. Tua ciangin siampi lianpenpa in, “Phatna a ngah Pasian' Tapa, Khrih na hi hiam?” ci-in a dongkik leuleu hi.

62Jesuh in, “Ka hi hi; Vanglian Pasian' taklamah Mihing Tapa omin meii lakah a hong pai na mu ding uh hi,” a ci hi. * 63Tua ciangin siampi lianpenpa in a puan balkek a, “Thudang kisam nawnlo hi. 64Pasian' tungah a paukhialhna na zazo uh hi. Bangci ngaihsut na hi uh hiam?” a ci hi. Hih mipa thah dingin kilawm hi, ci-in amaute khempeuh in thu a khen uh hi. * 65Tua ciangin mi pawlkhat in cilphih uh a, a mai tunsakin beng uh a, “Kua in hong beng ahi hiam, gen in,” a ci uh hi. Palikte in zong amah paipihin a beng uh hi.

Peter in Jesuh Nial

(Matthai 26:69-75; Luka 22:54-62; Johan 18:15-18, 25-27)

66A nuai-a inntualah Peter a om laitakin siampi lianpenpa' nasem numeite khat hong pai a, 67Peter mei awi-in om a muh ciangin limtakin en a, “Nang zong, Nazareth khuami Jesuh tawh na kikhawl ngei hi,” a ci hi. 68Ahi zongin Peter in nial a, “Ka thei kei hi; bang na cihna ahi hiam, cih zong ka tel kei hi,” ci-in dawngin tual pualam paina lampi lamah a pai hi. Tua laitakin ak a khuang hi. 69Tua numei mah in a omna-ah Peter mu a, a gei-a omte kiangah, “Hihpa, hua mite khat hi takpi hi,” a cikik leuleu hi. 70Ahi zongin Peter in nial leuleu hi. Tawlkhat khit ciangin a gei-a omte in Peter kiangah, “Nang zong Galilee gammi na hih manin huate khat na hi takpi hi,” a ci leuleu uh hi.

71Tua ciangin Peter in, “Na gen mipa uh ka theih taak leh Pasian in kei hong dawm kei ta hen,” ci-in a kiciam hi. 72Tua khit phetin ak nihveina a khuang hi. Tua ciangin, “Ak nihvei a khuan' ma-in kei thumvei na hong nial ding hi,” ci-in Jesuh in ama tungah a gensa thu Peter in phawkkik a, dahlua-in a kap hi.