Piancilna 25

 

Keturah tawh Abraham' Suanlekhakte

(1 Khang Tangthu 1:32-33)

1Abraham in Keturah min nei zi dang khat la hi. 2Amah in tuanu tawh ta Zimran, Jokshan, Medan, Midian, Ishbak, leh Shuah nei hi. 3Jokshan pen Sheba leh Dedan' pa ahi hi. Dedan' tate: Asshurim, Lethusim, leh Leummim ahi hi. 4Midian' tate: Efah, Efer, Hanok, Abida, leh Eldaah ahi hi. Hihte khempeuh, Keturah' suanlekhakte ahi hi.

5Abraham in a neih khempeuh Isaac a pia hi. 6Ahih hangin Abraham in a zi dang tawh a tate tungah zong letsong pia a, ama nuntak lai mahin ama tapa Isaac kiang panin nisuahna lam gamah amaute a sawlkhia hi.

Abraham' Sihna leh Kivuina

7Abraham, kum za leh kum sawmsagihlenga a phak ciangin, 8a hu tawpna sang a, a teek, kum tampi a pha, a khanghamin si a, ama mite tawh kivui khawm hi. 9-10Ama tapa Isaac leh Ishmael in, Abraham in Hit mite' tung panin a lei, Mamre nisuahna lamah a om, Hit mi Zohar' tapa Efron' lo sung, Makpelah leihawm sungah amah a vui uh hi. Tua lai munah a zi Sarah kiangah Abraham kivui hi. * 11Abraham' sih khit ciangin Pasian in a tapa Isaac thupha pia hi. Isaac, Beerlahairoi-ah a teng hi.

Ishmael' Suanlekhakte

(1 Khang Tangthu 1:28-31)

12Hihte pen, Abraham in Sarah' sila numei ahi Egypt mi Hagar tawh a neih, Abraham' tapa Ishmael' suanlekhakte ahi hi. 13Hihte pen a suahna tawh kizui-in Ishmael' tate' min ahi hi: Ishmael' ta upa pen Nebaioth hi a, tua ciangin Kedar, Adbeel, Mibsam, 14Mishma, Dumah, Massa, 15Hadad, Tema, Jetur, Nafish, leh Kedemah ahi hi. 16Hihte pen a khua, a phual, a behin ulian sawmlenihte ahi Ishmael' tate leh amaute' min ahi hi. 17(Ishmael kum za leh kum sawmthumlesagih a phak ciangin a hu tawpna sang-in si a, a behte tawh kivui khawm hi.) 18Amaute, Egypt nisuahna, Assiria lam Havilah panin Shur dongah teng uh a, amau' sanggamte khempeuh panin amau tuam ten' uh hi.

Esau leh Jakob' Suahna

19Hihte pen Abraham' tapa Isaac' suanlekhakte ahi hi. Abraham pen Isaac' pa hi a, 20Aram mi Laban' sanggamnu, Paddanaram gama Aram mi Bethuel' tanu Rebekah zi-in a lak lai-in Isaac kum sawmli pha hi. 21Isaac in Topa' tungah a zi-a' dingin thu ngen hi. Bang hang hiam cih leh amah ciing hi. Topa in ama thungetna pia a, a zi Rebekah gai hi. 22Ama sungah a naute kilaigawp hi. Amah in, “Hih bang ahih leh bang hangin nungta se ka hi hiam?” a ci hi. Tua ahih ciangin Topa kiangah thukan dingin amah pai hi. 23 Topa in ama kiangah,

• “Na gil sungah mi nam nih om a,
  • nang' sung pan a suak mihing nihte
    • kikhen ding hi.
• Khat pen a khat sangin hat zaw ding a,
  • a uzaw in a nauzaw' na sem ding hi,”
    a ci hi. *

24Amah a suah hun a tun' ciangin, a gil sungah tapeeng om hi. 25A masa pen a sanin hong suak a, a pumpi khempeuh mul a nei puan tawh kibang hi. Tua ahih ciangin ama min dingin Esau phuak uh hi. 26Tua khit ciangin a sanggampa hong suakkhia a, ama khut in Esau' khetul len hi. Tua ahih ciangin ama min dingin Jakob kiphuak hi. Amau' suah ciangin Isaac kum sawmguk a pha hi.

Esau in Ama Innluahza Zuak

27Tua naupangte a khan' ciangin, Esau pen gamsung mi sabet siam khat hi a, Jakob ahih leh inn-ah om hithiatin a cingkam khat ahi hi. 28Isaac in Esau' sa matsa nene ahih manin Esau mah itzaw a, ahi zongin Rebekah in Jakob itzaw hi.

29Khatvei Jakob in meh huanin a om laitakin gamlak a sa betna panin phukhong vei-in Esau hong ciah hi. 30Esau in Jakob kiangah, “Gilkialin phukhong vei ka hih manin tua na meh san tawmkhat hong nesak in,” a ci hi. (Tua ahih manin ama min Edom kici hi.)

31Jakob in, “Na innluahza hong pia lecin ka meh kong pia ding hi,” na ci hi.

32Esau in, “A si ding ka hita hi; kei-a' dingin innluahza bangin kimang ding ahi hiam?” a ci hi.

33Jakob in, “Kei' tungah hong kiciam masa in,” a ci hi. Tua ahih ciangin ama tungah Esau kiciam a, Jakob' tungah a innluahza a zuak hi. * 34Tua ciangin Jakob in an leh bemeh Esau a pia hi. Esau in zong an ne-in tui a dawn khit ciangin a paina ding a zuan hi. Tua ahih manin Esau in a innluahza tua ciang bang bekin a ngaihsun ahi hi.