Piancilna 24

 

Isaac-a' ding Zi Kila

1Tu-in Abraham teekin a kum tam mahmah ta hi. Topa in na khempeuhah Abraham thupha pia hi. 2Abraham in ama neih khempeuh a uk, a inn sungah a upa pen a nasempa kiangah, “Ka phei nuai-ah na khut hong koih in. 3-4Nangmah in amau' lakah ka ten'na Kanaan mite' tanute lak panin ka tapa' zi ding laloin, keima gam leh ka behte kiangah va pai-in ka tapa Isaac' zi ding na lakna dingin vantung leh leitung Pasian ahi Topa tawh nang kong kiciamsak ding hi,” a ci hi.

5Nasempa in ama kiangah, “A numei in hih gamah kei hong zui nuam kei kha leh nangma hong paikhiatna gamah na tapa ka paipih kik ding hiam?” a ci hi.

6Abraham in ama kiangah, “Tua lai-ah ka tapa na paipih kik loh ding thei in. 7Ka pa' inn leh ka suahna leitang panin kei hong la-in, kei kiangah thu hong genin kei tungah hong kiciam a, ‘Na suanlekhakte' tungah hih leitang ka pia ding hi,’ a hong ci vantung Pasian, Topa in nangma mai-ah a vantung mi sawl ding a, tua lai mun panin nangmah in ka tapa-a' ding zi khat na la ding hi. 8Ahih hangin a numei in nang hong zuih nop kei leh keima thuciamna panin nang na suakta ding hi. Bangbang hi leh tua lai-ah ka tapa na paipih kik kei ding hi,” a ci hi. 9Tua ahih ciangin a nasempa in a topa Abraham' phei nuai-ah a khut koih a, hih thu tawh kisai-in ama tungah a kiciam hi.

10Tua ciangin a nasempa in a topa' kalaohte sawm la-in paikhia a, a topa' tung panin letsong hoihnono a namkim la hi. Amah dingin Mesopotamia gam Nahor' khuapi-ah a pai hi. 11Numeite' nitak tuitawi hun laitakin khuapi pualam tuikhuk gei-ah amah in a kalaohte boksak hi. 12Amah in, “Ka topa Abraham' Pasian, Topa aw, tuni-in ka ma hong vangsak in. Nang tungah thu kong ngen hi, ka topa Abraham' tungah itna kip hong lak in. 13En in, tuikhuk gei-ah kei ka ding a, khuapi nungakte tuitawi dingin hong pai uh hi. 14Keimah in, ‘Tui ka dawn theihna dingin na beel hong nga suk in,’ ka cih ciangin, ‘Dawn in; na kalaohte zong tui ka pia ding hi,’ hong ci nu pen na nasempa Isaac-a' dingin na sehsa numei hisak in. Nangmah in ka topa tungah itna kip na lahna hih thu tawh ka thei ding hi,” a ci hi.

15Tua bangin a thunget a khit ma-in, Abraham' sanggampa Nahor in a zi Milkah tawh a neih a tapa Bethuel' tanu Rebekah a liangko tungah a tuibeel pua-in hong paikhia hi. 16Tuanu pen kuamah tawh a lumkhawm nailo, nungak, a ngaihbaang mahmah khat ahi hi. Amah tuikhukah paisukin a beel dim a, hong paito hi. 17Tua ciangin amah a dawntuah dingin nasempa tai a, “Dawn ding tui tawmkhat na beel sung panin hong pia dih in,” a ci hi.

18Amah in, “Dawn in, ka topa,” a ci hi. Tuanu in a khut tungah a beel niamsuk sakin amah a dawnsak hi. 19Amah in tua mipa tui a dawnsak khit ciangin, “Na kalaohte in a kham matengun a dawn ding zong tui kong tawisak ding hi,” a ci hi. 20Tua ahih ciangin amah in a tuikuang sungah a tui bungsuk pak a, tuitawi dingin tuikhukah tai-in a kalaohte khempeuh-a' dingin tui a tawi hi. 21 Topa in ama khualzinna mavangsak ding hiam, vangsaklo ding hiam, cih a theihna dingin mipa in daptakin tuanu na en hi.

22Kalaohte in tui a dawn khit ciangin mipa in shekel lang a gik kham nakbah khat leh shekel sawm a gik kham tau nih tua nu-a' dingin la-in pia a, 23“Kua' tanu na hi hiam, hong gen in. Na pa' inn-ah kote' giahna ding a awng ding hiam?” a ci hi.

24Tuanu in ama kiangah, “Nahor leh a zi Milkah' tapa Bethuel' tanu ka hi hi,” a ci hi. 25Amah in, “Buhkung leh gan-an a kicing ka nei uh a, giahna ding mun zong ka nei uh hi,” ci thuah lai hi.

26Mipa a lu kunin Topa bia a, 27“Ka topa' tungah a itna kip leh a thumanna a pelhlo, ka topa Abraham' Pasian, Topa in thupha ngah ta hen. Kei ka hih leh, ka topa' behte' inn zuatna lampi-ah Topa in hong paipih hi,” a ci hi.

28Tua ciangin nungaknu a inn-ah tai-in hih thute khempeuh a innkuanpihte tungah a gen hi. 29Rebekah in Laban min nei sanggam pasal khat nei hi. Laban zong tuikhuka mipa kiangah a tai hi. 30Amah in nakbah leh a sanggamnu' khut tunga taute a muh ciang leh, “Mipa in hih bangin kei tungah hong gen,” ci-in a sanggamnu Rebekah' kam gen a zak ciangin, mipa kiangah a pai ahi hi. Tuikhuka kalaohte kiangah amah na ding hi. 31Amah in, “Hong pai in, Topa' thupha piakpa aw; bang hangin a pua-ah ding na hi hiam? Bang hang hiam cih leh inn-ah na omna ding mun ka bawl khin a, kalaohte-a' ding mun zong om hi,” a ci hi.

32Tua ahih ciangin inn sungah mipa hong pai hi. Laban in kalaoh vante suah a, kalaohte-a' dingin buhkung leh gan-an pia a, amah leh a kikholhpih mite' khe silna dingin tui zong a pia hi. 33Tua ciangin nek dingin a mai-ah an kilui hi. Ahih hangin amah in, “Ka thu ka gen khit matengin an ka ne kei ding hi,” a cih ciangin amah in, “Gen in,” a ci hi.

34Tua ahih ciangin amah in, “Kei pen Abraham' nasem ka hi hi. 35 Topa in ka topa nakpi takin thupha pia a, amah a lian mahmah suak khin hi. Amah in ama tungah tuuhon, bawnghon, ngun leh kham, nasem pasal leh nasem numei, kalaoh leh late tampi pia hi. 36Ka topa' zi Sarah in a teek khitin ka topa tawh tapa khat nei hi. Amah in a neihsa khempeuh ama tungah pia hi. 37Ka topa in kei hong kiciamsak a, ‘Nangmah in amau' gamah ka ten'na Kanaan numeite lak panin ka tapa' zi ding la kei in la, 38ka pa' innkuan mi leh ka behte kiangah pai-in ka tapa-a' ding zi khat na la ding hi,’ hong ci hi. 39Keimah in ka topa kiangah, ‘A numei in kei hong zui nuam kei kha leh,’ ka ci hi. 40Ahih hangin amah in kei tungah, ‘A thu ka man' Topa in nang tawh a vantung mi hong sawlin na ma hong vangsak ding hi. Nang in ka behte leh ka pa' inn panin ka tapa-a' ding zi khat na la ding hi. 41Ka behte kiangah na pai ciangin amaute in nang hong piak kei leh ka thuciamna panin nang na suakta ding hi,’ hong ci hi.

42“Tuni-in tuikhukah pai-in, ‘Ka topa Abraham' Pasian, Topa aw, tu-a ka paina ka ma nong van'sak ding leh, 43en in, tuikhuk gei-ah kei ka ding hi. Tuitawi dinga hong paikhia nungak tungah, “Na beel panin tui dawn ding tawmkhat hong pia in,” ka cih ciangin, 44“Dawn in, na kalaohte-a' ding zong kong tawisak ding hi,” hong ci nu pen, ka topa' tapa-a' dingin Topa in a sehsa numei hisak in,’ ka ci hi.

45“Ka lungsim sungah thu ka nget khit ma-in, a liangko tungah a tuibeel pua-in Rebekah hong paikhia ka mu hi. Amah tuikhukah paisukin tui hong tawi hi. Keimah in ama kiangah, ‘Tui hong dawnsak in,’ ka ci hi. 46Amah in a liangko panin a beel hong khiasuk pahin, ‘Dawn in, na kalaohte zong tui ka pia ding hi,’ hong ci hi. Tua ahih ciangin keimah in ka dawn a, amah in kalaohte zong tui a pia hi. 47Tua ciangin, ‘Kua' tanu na hi hiam?’ ci-in ka dong hi. Amah in, ‘Nahor leh a zi Milkah' tapa Bethuel' tanu ka hi hi,’ hong ci hi. Tua ahih ciangin a nak tungah nakbah ka batsak a, a khut tungah taute ka butsak hi. 48Tua ciangin ka lu kunin Topa ka bia a, a tapa-a' dingin ka topa' behpa' tanu a la dingin lampi manah kei a hong paipih, ka topa Abraham' Pasian, Topa ka phat hi. 49Tua ahih ciangin tu-in, ka gamtatna ding zia ka theihna dingin ka topa' tungah hoihtak leh thuman takin na gamtat ding uh leh na gamtat loh ding uh hong gen un,” a ci hi.

50Tua ciangin Laban leh Bethuel in dawng a, “Hih thu pen Topa' kiang panin hong pai thu ahi hi. A sia ahi zongin a pha ahi zongin nang tungah kong gen ding dang uh omlo hi. 51En in, Rebekah na mai-ah om hi. Amah la in la pai un. Topa' gensa bangin na topa' tapa' zi hisak un,” a ci uh hi. 52Abraham' nasempa in amau' kammalte a zak ciangin Topa' mai leilakah a kunsuk hi. 53Nasempa in ngun leh kham kizepnate leh puante hong suahkhia-in Rebekah a pia hi. A sanggampa leh a nu zong a manpha kizepnate a pia hi.

54Tua ciangin amah leh a nungzuite in an ne tui dawnin, tua lai-ah tua zan a giak uh hi. Amaute zingsangin a thawh uh ciangin amah in, “Ka topa' kiangah hong ciahsak kik un,” a ci hi.

55Ahi zongin a sanggampa leh a nu in, “A tawm penin ni sawm bang, ko tawh numei hong omsak lai in; tua khit ciangin amah hong pai thei ding hi,” a ci uh hi.

56Ahih hangin amah in amaute kiangah, “ Topa in ka ma hong vangsak khin ahih nungsang kei hong zekaisak nawn kei un. Ka topa kiangah ka ciah theihna dingin hong paisak un,” a ci hi.

57Amaute in, “A numei samin amah i dong ding hi,” a ci uh hi. 58Amaute in Rebekah samin ama kiangah, “Hih mipa na zui pah ding hiam?” a ci uh hi. Amah in, “Ka zui ding hi,” ci pah hi.

59Tua ahih ciangin amaute in a sanggamnu uh Rebekah leh a cingnu, Abraham' nasempa leh a nungzuite tawh ciahkhiasak uh hi. 60Amaute in Rebekah thupha pia-in ama kiangah, “Kote' sanggamnu aw, a tultul a thenthente' nu hi ta in. Na suanlekhakte in amau a mudahte' khuapite luah ta uh hen!” a ci uh hi.

61Tua ciangin Rebekah leh a numeite dingin, kalaohte tungah tuangin mipa a zui uh hi. Tua bangin nasempa in Rebekah la-in a paina ding lamah a pai hi.

62Tua kikalin, Isaac, Beerlahairoi panin hong pai-in Negeb gamah na teng hi. 63Isaac, thu a lungngaingai dingin nitakin gamlakah a paikhia hi. Amah a khuadak leh kalaohte hong pai a mu hi. 64Rebekah in Isaac a muh ciangin, kalaoh tung panin kumin 65nasempa kiangah, “Hua lai-a mipa, eite hong dawn dingin gamlaka hong pai kua ahi hiam?” a ci hi. Nasempa in, “Ka topa hi,” a ci hi. Tua ahih ciangin amah in a kikhuhna puan la-in a kikhuh hi.

66Nasempa in Isaac kiangah a gamtatnasa khempeuh a gen hi. 67Tua ciangin Isaac in a puanbuk sungah Rebekah paipih a, amah pen a zi a suak hi. Amah in tuanu a it hi. Tua ahih manin a nu' sih khit ciangin Isaac in hehnepna a ngah hi.