Exodus 35

 

Sabbath Ngeinate

1Moses in Israel mihonpi khempeuh khawmin amaute kiangah, “Hihte pen note' hih ding Topa' hong thupiak ahi hi. 2Ni guk sungin nasep kiman ding a, ahih hangin a ni sagih ni-in thupi-a tawlngakna Sabbath siangtho Topa' tungah na nei ding uh hi. Tua ni-in na khat peuhpeuh a sem peuhmah kithat ding hi. * 3Sabbath ni-in na ten'na khempeuh uhah mei na cih kei ding uh hi,” a ci hi.

Topa' tungah Biakna

(Exodus 25:1-9)

4Moses in Israel mihonpite khempeuh tungah, “ Topa' hong thupiak hih bang ahi hi: 5Note in Topa' tungah biakna na pia ding uh hi. A pia nuam peuhmah in Topa' tungah biakna paipih un. Tuate in: Kham, ngun leh sumngo, 6a dum, a dupsan, a ausan khaute leh a kopin a kikhuk puan hoihte, keelmul, 7a kisansak tuutal vunte leh savunte; singkha sing, 8meivak-a' ding sathau, nilh sathau leh a paknamtui dingin a namtui nate, 9siampipuan leh awmdalah bulh dingin onik suang leh suang dangte ahi hi.

Biakbuk Nate

(Exodus 39:32-43)

10“Note' lak panin siamna a nei mi peuhmah hong paisak un la, Topa' thupiaksa khempeuh bawlsak un. Tua a bawl dingte pen biakbuk, 11a puanbuk leh a khuhna, a vankhainate leh a khuampeekte, a zawlte, a khuampite, a bullente; 12singkuang a zawlte tawh, hehpihna tokhom leh kongkhak dalna puan; 13sabuai a zawlte leh a nazatte khempeuh tawh, Ompihna Anlum; 14khuavak dingin meivakkhuam zong, a nazatte leh a meivakte tawh, meivak dingin sathau; 15paknamtui biakna tau, a zawlte tawh, nilh sathau leh a namtui paknamtui leh biakbuk kongah kongkhak-a' ding puankhai; 16meihal biakna tau, a sumngo siklen, a zawlte, a nazatte khempeuh, kuang leh a ngakna tawh; 17buktual-a a puankhaite, a khuampite leh a bullente tawh, tual kongpi-a' ding puankhai; 18biakbuk khetphimte leh huang khetphimte, leh a khaute; 19siangtho munah zat dingin limtakin a kigan puante, amau' siampi nasepna dingin siampi Aaron-a' ding puan siangtho leh ama tapate' puante ahi hi,” a ci hi.

Mite in Biakna hong Paipih

20Tua ciangin Israel mihonpi khempeuh Moses' omna panin paikhia uh hi. 21Piak nopna lungsim a nei mi peuhmah hong pai tawm uh a, kikhopna buk leh a nasepna ding khempeuh leh puan siangthote-a zat dingin Topa-a' ding a piakte uh hong puak uh hi. 22Tua ahih ciangin numei, pasal hong pai uh hi. Piak nopna lungsim a neite khempeuh in tukkilhte, bilbahte, min gelhna zungbuhte, leh banbulhte ahi kham tawh a kibawl na namkim hong paipih uh a, a milip in Topa' tungah kham tawh piakna ap uh hi. 23A dum, a dupsan, a ausan khaute, puan hoih, keelmul, a kisansak tuutal vunte, ahih kei leh savun hoihte ahi zongin a nei mi peuhmah in tuate hong paipih uh hi. 24Ngun ahi a, sumngo ahi zongin a pia thei peuhmah in Topa' tungah tua nate paipih uh a, nasepna dinga kimang thei ding singkha sing a nei mi peuhmah in zong hong paipih hi. 25A hih thei numei khempeuh in a khut uh tawh khau khuk uh a, amau' khuksa a dum, a dupsan, a ausan khaute leh a kopin a kikhuk khaute hong paipih uh hi. 26Hih theih siamna a nei numei khempeuh in zong keelmul khuk uh hi. 27Makaite in siampipuan leh awmdal-a bulh dingin onik suang leh suang dangte, 28meivak ding, nilh sathau ding, leh paknamtui dingin a namtui nate leh sathau hong paipih uh hi. 29 Topa in Moses tunga a thupiaksa nasepna dingin na khat peuhpeuh a pia nuam numei pasal Israel mi khempeuh in utthu-a biakna-in Topa' tungah hong paipih uh hi.

Bezalel leh Oholiab a Kisapna

(Exodus 31:1-11)

30Moses in Israel mite kiangah, “Thei un; Topa in a minin Judah minam, Hur' tapa Uri, Uri' tapa Bezalel sam khin hi. 31-33Lim hoihte a geel ding; kham, ngun, sumngo tawh na a bawl ding; siamna nam khempeuh nasepna ding, bulh ding suang seekna, leh singzep nasep a sem dingin amah in vangliatna, siamna, pilna, theihna, leh khutsiam nasep khempeuh tawh amah kidimsak hi. 34 Topa in amah leh Dan minam Ahisamak' tapa Oholiab tungah midangte hilh siamna pia khin hi. 35Amah in khutsiam nasep, geelsiam nasep; a dum, a dupsan, a ausan khaute leh a kopin a kikhuk puanzep siam nasep; siamgat siamna, leh geelsiam nasep ahi zongin nasep namkim a sem dingin amaute tungah siamna a guan' hi.