Exodus 28

 

Siampipuante

(Exodus 39:1-31)

1“Tua ciangin keima tungah siampi na a sem dingin Israel mite lak panin na sanggampa Aaron leh a tapate Nadab leh Abihu, Eleazar leh Ithamar, nangma kiangah la in. 2Minthan'na leh hoihna tawh a kidimna dingin na sanggampa Aaron-a' ding biakna puan siangtho na bawl ding hi. 3Keima siampi nasepna-ah amah a ap theihna dingun amaute in Aaron' puante a bawlna ding, hih theihna lungsim ka guatsa, siamna a nei mite khempeuh tungah gen in. 4Amaute' bawl ding puante: Awmdal khat, siampipuan khat, puantualpi khat, sikli nei-a a gial puantungsilh khat, dialpi khat leh kawnggak khat ahi hi. Keima tungah siampi na a sem ding na sanggampa Aaron leh ama tapate-a' dingin amaute in biakna puan siangthote bawl ding uh hi. 5Amaute in kham, a dum, a dupsan, a ausan khaute leh a kopin a kikhuk tawh a kigan puan hoihte sang ding uh hi.

6“Amaute in siampipuan pen, kham, a dum, a dupsan, a ausan tuumul khaute leh a kopin a kikhuk a kigan puan hoihte tawh bawl ding uh a, hoihtakin a kibawl hi ding hi. 7A kizop khawm theihna dingin a mong nihte-ah a kimat liangkaihna puan nih nei ding hi. 8Amah a gak dingin hoihtakin a kigan tua tunga puan om pen, kham, a dum, a dupsan, a ausan tuumul khaute leh a kopin a kikhuk puan hoihte tawh kibawlin, a sepna zia leh a nate a kibang hi ding hi. 9Nangmah in onik suang nih la-in tuate' tungah Israel tapate' min na gelh ding a, 10amau' suahna tawh kizui-in amau' min gukte suang khat tungah gelhin, a omlai gukte' min a suang dang khat tungah na gelh ding hi. 11Kizepna a bawlpa in min gelhna a bawl bangin Israel tapa sawmlenihte' minte suang nihte tungah na gelh ding hi. Tuate pen kham-a zepna tawh na um ding hi. 12Israel tapate phawkna suang dingin siampipuan' liangkaih puan tungah tua suang nihte na bulh ding hi. Aaron in ama liangko nihte tungah phawkphawk dingin Topa' mai-ah amaute' min pua ding hi. 13Kham tawh kibawl a kiphut kizepna leh 14khau bangin a kihual, kham citak khainiang nih na bawl ding a, a kihual khainiangte pen a kiphutte' tungah na bulh ding hi.

15“Hoihtakin a kibawl thukhenna awmdal khat na bawl ding hi. Siampipuan a kibawl bangmahin na bawl ding hi. Kham, a dum, a dupsan, a ausan tuumul khaute leh a kopin a kikhuk puan hoih tawh na bawl ding hi. 16A ning kikimin thuap nih hi ding a, a dung letmat kua, a vai letmat kua mah hi ding hi. 17Tua sungah suang gual li-in na bulh ding hi. Sardis suang, topaz suang, leh karbankal suang gual khat pen a gual masa hi ding hi. 18A gual nihna-ah emerald suang, sapfaia suang, leh diamond suang hi ding hi. 19A gual thumna-ah jakinth suang, agate suang, leh amethyst suang hi ding hi. 20A gual lina-ah beryl suang, onik suang, leh jasper suang hi ding a, kham tawh zepna sungah tuate kibulh ding hi. 21Israel tapate' min tawh kituakin amaute' min a omna suang sawmlenih om ding hi. Tuate pen minam sawmlenihte-a' dingin amau' min ciat kigelhin, min gelhna tawh kibang ding hi. 22Awmdal-a dingin khau tawh a kibang, a kihual kham citak khainiang na bawl ding hi. 23Awmdal-a dingin kham kual nih na bawl ding a, awmdal mongah tua kualte na bulh ding hi. 24Awmdal mong-a kual nihte sungah kham khau nihte na khum ding hi. 25Khau mong nihte zepna tawh na zom ding a, siampipuan' liangkaih puan mailamah tua bangin na zom ding hi. 26Kham kual nih na bawl ding a, awmdal mong nih, siampipuan tawh a kizom a sunglamah na bulh ding hi. 27Kham kual nih na bawl ding a, siampipuan liangkaih nihte' nuai a mailam, hoihtakin a kigan siampi puankhau a kizopna tung sanah na bulh ding hi. 28Hoihtakin a kigan siampipuan' khau tungah a om theihna ding leh siampipuan tung panin awmdal a kol theihlohna dingin amaute in siampipuan' kualah khaudum khatin a kual tawh gakkhawm ding uh hi.

29“Tua ahih ciangin Topa' mai-ah phawk tawntungna dingin amaute a paipih dingin siangtho munah amah a pai ciangin, Aaron in ama lungtang tunga om thukhenna awmdal sungah Israel tapate' min pua ding hi. 30Thukhenna awmdal sungah Urim leh Thummim na koih ding a, Topa' mai-ah a pai ciangin Aaron' lungtang tungah tuate om ding hi. Tua bangin Aaron in ama lungtang tungah Israel mite' thukhenna Topa' mai-ah pua tawntung ding hi. *

31“Siampi puantualpi, puan dum bek tawh na bawl ding hi. 32Puan ngawng bangin a kikek lohna dingin a ngawng kimkotah a kigan tawh a kizim, lutang thawl a vang nei ding hi. 33A mongah a dum, a dupsan, a ausan khaute tawh a kizem mang kawlsing gah bawlin, a mong kiimah amaute' kikalah kham siklong bawlin, 34puantualpi mong kimkotah kham long leh mang kawlsing gah, kham long leh mang kawlsing gah cih bangin na kihelhsak ding hi. 35Aaron in biakna na a sep ciangin tua puan silh ding a, amah a sih khak lohna dingin Topa' mai a siangtho munah a tum ciang leh a pusuah ciangin a gingte kiza ding hi.

36“Nangmah in kham citak tawh a peek khat na bawl ding a, min gelhna a kibawlte mah bangin tua tungah, ‘ Topa-a' ding siangtho,’ ci-in na gelh ding hi. 37Tua pen, khaudum khat tawh dialpi tungah na gak ding a, dialpi mailamah om ding hi. 38Tua pen Aaron' taltangah om ding a, Israel mite in letsong siangtho a piakna uh ahi, a siangtho biakpiakna-ah mawhna a om peuhmah Aaron in ama tungah pua ding hi. Topa' mai-ah amaute a kisan' theihna dingin ama taltang tungah tua a peek om tawntung ding hi.

39“A puantungsilh ding pen khau hoih tawh sik li nei, a gialin na gan ding hi. Khau hoih tawh dialpi khat na bawl ding a, phim tawh kikhui-in a kizem kawnggak khat na bawl ding hi.

40“Aaron' tapate-a' dingin puantungsilhte, kawnggakte, leh lukhute na bawl ding a, minthan'na leh hoihna tawh a kidimna dingin tuate na bawl ding hi. 41Amaute in keima tungah siampi na a sep theihna dingun na sanggampa Aaron leh a tapate na silhsak ding a, amaute sathau nilhin, nasem dingin kipsakin, na siangthosak ding hi. 42A ci guakin a omna uh a tuam dingin amau-a' dingin puan hoihte tawh pheituamte na bawlsak ding a, tuate in kawng panin phei ciang ban ding hi. 43Kikhopna bukah amaute a pai ciang uh ahi a, siangtho munah nasem dingin biakna tau nai-ah a pai ciang uh ahi zongin, Aaron leh ama tapate in tuate a silh ding uh hi. Tua hi kei leh amaute in amau tung mahah mawhna a kisuan tawm suakin si ding uh hi. Hih pen amah leh ama khit ciangin a suanlekhakte-a' dingin a om tawntung ngeina kip khat hi ding hi.