Matthai 27

 

Jesuh, Pilat Mai-ah

(Marka 15:1; Luka 23:1-2;Johan 18:28-32)

1A zingsang ciangin siampi liante leh upate in Jesuh a thahna ding uh a vaihawm uh hi. 2Sikkhau tawh khihin paipih uh a, tua gam sungteng a uk Pilat mangpa khutsungah a ap uh hi.

Judas A Sihna

(Sawl 1:18-19)

3A lehhekpa Judas in Jesuh a si dingin thu a kikhenna a muh ciangin kisikkik ahih manin siampi liante leh upate kiangah a ngun peek sawmthumte va paipih kik a, 4“Mawhna a neilo mipa a si dingin lehhekkha ka hih manin ka mawh hi,” a va ci hi. Ahi zongin amaute in, “Kote tawh bang kisai nawn ding ahi hiam? Nangma tavuan ahi hi,” a na cihsan uh hi. 5Tua ciangin amah in biakinn sungah a ngun peekte lawn'in paikhia a, amahmah a gui-awk hi.

6Ahi zongin siampite in tua ngun peekte tawm uh a, “Hih sumte pen mi thahna dingin a kipia sum ahih manin biakinn sumkholna-ah koihdingin kilawmlo hi,” a ci uh hi. 7Tua ahih manin amaute a kikup khit uh ciangin khualmi a site a kivuina dingin beelseekpa' lo a lei uh hi. 8Tua ahih manin tudongin tua lo pen, “Mi Thahna Lo,” a kici hi. *

9Tua ahih manin kamsang Jeremiah in, “Israel mite pawlkhat in ama man dingin a seh tua ngun peek sawmthum la uh a, 10Topa in kei tungah a hong gen mah bangin, beelseekpa' lo leina dingin a pia uh hi,” ci-in a genkholhna a tung ahi hi. *

Pilat in Jesuh Thu Dong

(Marka 15:2-5; Luka 23:3-5;Johan 18:33-38)

11Tu-in gam ukpa Pilat mai-ah Jesuh kidingsak ahih manin amah in, “Nang, Jew mite' Kumpipa na hi hiam?” ci-in a dot ciangin Jesuh in, “Nang zong tua mah nong ci hi,” ci-in a dawng hi. 12Ahi zongin siampi liante leh upate in mawhsakna thu a gen hangun Jesuh in a dawng kei hi. 13Tua ciangin Pilat in Jesuh kiangah, “Amaute in nang a hong mawhsaknate zalo na hi hiam?” a ci hi. 14Ahi zongin Jesuh in amah a kimawhsaknate kam khat beek dawng hetlo ahih manin Pilat in lamdang a sa mahmah hi.

Jesuh a Si dingin Thu Kikhen

(Marka 15:6-15; Luka 23:13-25; Johan 18:39—19:16)

15Paisan Pawi hun simin Rom gam ukpa in mihonte' deih thongkia mi khat a khah a ngeina ahi hi. 16Tua hun laitakin a gilo mahmah Barabbas a kici mi khat thongkia-in a om hi. 17Tua ahih manin mihonte hong kikhop ciangin Pilat in amaute kiangah, “Barabbas leh Khrih a kici Jesuh, koizaw ka khahding deih na hi uh hiam?” ci-in a dong hi. 18Bang hang hiam cih leh Jesuh a hazat man bekun ama kiangah a paipih ahihna thu teltakin a thei hi.

19Tua banah, thukhen zumah thusitin a om hunsung mahun, a zi in thu zasak a, “Tuzan ka mang sungin ama hangin nakpi takin gimna thuak ka hih manin, mawhna neilo tua mipa bangmah cihkha kei in,” a ci hi. 20Barabbas khahin Jesuh a thahna dingin Pilat kiangah a ngetna dingun siampi liante leh upate in mihonte a hanthawn uh hi. 21Tua ciangin Rom gam ukpa in mihonte kiangah, “Hih mi nihte, koi pen ka khahding deih na hi uh hiam?” ci-in a dot leuleu ciangin amaute in, “Barabbas,” a ci uh hi. 22Tua ciangin Pilat in, “Tua ahih leh Khrih a kici Jesuh pen bangcih ding ka hi hiam?” a cih ciangin amaute khempeuh in, “Singlamteh tungah thatsak in,” a ci uh hi. 23Tua ciangin amah in, “Amah in bang gamtat khialhna nei ahi hiam?” ci-in a dot ciangin, “Singlamteh tungah thatsak in,” ci-in a awng ngeingai uh hi.

24A gengen hangin bangmah phattuamna omloin buaina piangzaw khading, ci-in Pilat in a theih ciangin, tui la-in mihonpi' muhin a khut sil a, “Hih mipa a sihna thu-ah kei ka kihel kei hi. Note in thei ta un,” a ci hi. * 25Tua ciangin mi khempeuh in, “Hih mipa' sihna hangin gimthuakna, kote-a kipanin ka suan ka khakte dongun ka thuak ding uh hi,” ci-in a dawng uh hi. 26Tua ciangin amaute' deihna bangin Barabbas khah a, Jesuh ahih leh a sat khit ciangin singlamteh tungah thahdingin a piakhia hi.

Galkapte in Jesuh Simmawh Bawl

(Marka 15:16-20; Johan 19:2-3)

27Tua ciangin Pilat' galkapte in ama omna kumpi inn-ah Jesuh paipih uh a, tua lai-ah galkap khempeuh a hong kikaikhawm uh hi. 28Tua lai panin Jesuh' puan suahkhiatsak uh a, puansan khat a silhsak uh hi. 29Kumpi lukhu lim dingin ling vialin a lu-ah khusak uh a, a khut taklamah pumpeng khat a tawisak uh hi. Tua ciangin ama mai-ah khukdin' uh a, “Jew mite' Kumpipa aw,” ci-in zahpihna tawh a hopih uh hi. 30Tua ciangin cilphih uh a, a pumpeng tawisak uh la-in a lutang a sat uh hi. 31Tua bangin a simmawh bawl khit uh ciangin a puansan silhsak uh suahkhia leuleu-in ama puan mah silhsakkik uh a, singlamteh tungah thahdingin a paikhiatpih uh hi.

Singlamteh tungah Khaina

(Marka 15:21-32; Luka 23:26-43; Johan 19:17-27)

32Tua bangin a pai laitakun Sairin khuami Simon kici mi khat tawh kituak uh a, amah lammatin Jesuh' singlamteh a puasak uh hi. 33Lutang guh a cihnopna Golgotha a kici mun a tun' uh ciangin, 34zatui kha tawh a kihel leenggahzu a dawn dingin a pia uh hi. Ahi zongin Jesuh in a ciapkhit ciangin a dawn nuam kei hi. * 35Singlamteh tungah Jesuh a khai khit uh ciangin a puante kua in a koi ngah ding cih a theihna dingun suang lawnin ai san uh a, a puan teng a hawm uh hi. * 36Tua ciangin amaute tu-in Jesuh a en uh hi. 37Tua ciangin amah a mawhsakna uh, “Hihpa, Jew mite' Kumpi Jesuh ahi hi,” cihna lai gelhin ama lutang sanah a suang uh hi. 38Tua ciangin mi that nih, Jesuh' taklamah khat, a veilamah khat tawh zong a khaikhawm uh hi.

39Tua ciangin amah a va mukha mi peuhmah in a lu uh peisanin, * 40“Biakinn susia-in ni thum sungin a lamkik dingpa aw, nang leh nang kihonkhia in. Pasian' Tapa na hihtakpi leh singlamteh tung panin hong kumsuk in,” ci-in a zahko uh hi. * 41Tua bangmahin siampi liante in Thukham hilh siate leh upate tawh zahko-in, 42“Amah in midangte honkhia thei napi-in amahmah kihonkhia theilo hi. Amah, Israel mite' Kumpi ahi hi. Tu-in singlamteh tung panin hong kumsuk leh i um ding hi. 43Amah in, ‘Kei, Pasian' Tapa ka hi hi,’ ci ahih manin, amah in Pasian muan'in a nei hi. Pasian in a hotnop leh tu-in honkhia ta hen,” a ci uh hi. * 44Tua mah bangin amah tawh a kikhai khawm mi thatte in zong a zahko uh hi.

Jesuh' Sihna

(Marka 15:33-41; Luka 23:44-49; Johan 19:28-30)

45Sun nai sawmlenih huna kipanin nitak nai thum dong, nai thum sung, tua gamsung khempeuhah khim a zing hi. 46Nitak nai thum hun pawl laitakin Jesuh nakpi takin kiko a, “Ka Pasian, ka Pasian, bang hangin kei hong nusia na hi hiam?” a cihna ahi, “Eloi, Eloi, lama sabakthani,” a ci hi. * 47A gei-ah a om a pauna a za mite pawlkhat in, “Hih mipa in Elijah a sam ahi hi,” a ci uh hi. 48Tua ciangin amaute khat va tai-in tuihupna la-in leenggahzu-hau sungah a diahkhit ciangin pumpeng dawnah henin Jesuh' hup dingin a tahto hi. * 49Ahi zongin adangte in, “Khawl dih un; amah a honkhia dingin Elijah hong pai hiam ngak dih ni,” a ci uh hi. 50Tua ciangin Jesuh nakpi takin kiko kikin a si ta hi.

51Tua laitakin biakinn sung deina puan, a lu panin a taw dongin kikekin phelnih a suak hi. Zin zong lingin suangtumpite kitam hi. * 52Hankhukte zong kihong a, Pasian' mi a sisa tampite zong kithokik sak hi. 53Hankhuk panin amaute paikhia uh a, sihna panin Jesuh a thawhkik khit ciangin, amaute zong khuapi siangtho sungah hong lut uh a, mi tampi in a mu uh hi. 54Jesuh enin a om galkapbupa leh galkapte in zinlin'na leh a thupiangte a muh uh ciangin lamdangsa mahmah uh a, “Hihpa, Pasian' Tapa taktak mah ahi hi,” a ci uh hi.

55Galilee gam panin Jesuh hong zui-in amah a huh, a gal et numei tampi zong a om hi. 56Tua numeite lakah Magdala khuami Mary, James leh Josef' nu Mary, leh James leh Johan' nu ahi, Zebedi' zi, a kihel uh ahi hi. *

Jesuh A Kivuina

(Marka 15:42-47; Luka 23:50-56; Johan 19:38-42)

57A nitak ciangin Arimathea khuami, Jesuh thu a um, mihau ahi Josef a kici mi khat, 58Pilat kiangah va pai-in Jesuh' luang a va ngen hi. Pilat in Josef' ngetna bangin Jesuh' luang a kipiakna dingin thu a pia hi. 59Josef in zong Jesuh' luang la-in, dialpuan thak tawh a tun khit ciangin, 60suang a kikhuak thak ahi ama hankhuk sungah a vui hi. Tua ciangin suangtum lianpi khat hualin a han kongvang hucipin a ciah hi. 61Magdala khuami Mary leh adang Mary zong a hankhuk mai ngatin a tu uh hi.

Han Cingte

62A zing ciang, Sabbath ni-in Pilat kiangah siampi liante leh Farisi mite hong pai uh a, 63“Topa aw, hih mi khempa in a nuntak lai-in, ‘Ni thum khit ciangin ka hingkik ding hi,’ ci-in a thugenna ka thei uh hi. * 64Tua ahih ciangin ni thum sung a han hoihtakin a kicin'na dingin thu pia in. Tua hi kei leh a nungzuite in a luanghawm gukhia-in mite kiangah, ‘Sihna panin hingkik khin hi,’ cikha ding uh ahih manin a mi khem masakna uh sangin a khem nunungna uh hong husiazaw lai khading hi,” a ci uh hi. 65Pilat in amaute kiangah, “Galkapte cingsak un la, a muan'huai theithei dingin na siam bangun hih un,” a ci hi. 66Tua ahih ciangin amaute pai uh a, a han hukna suang limtakin a ciamteh khit uh ciangin galkapte a cingsak uh hi.