Matthai 17

 

Meel Kikheelna

(Marka 9:2-13; Luka 9:28-36)

1Tua zawh ni guk ciangin Jesuh in Peter, James leh a nau Johan-te samin mual sang khat dawnah a tuamin a paipih hi. 2Tua lai mun panin amaute' muhtangpi mahin Jesuh a meel kikheel a, a maitang ni bangin taangin, a puante khuavak bangin a ngo hi. 3Tua lai-ah Moses leh Elijah hong omvat uh a, Jesuh tawh a kiho a mu uh hi. 4Tua ciangin Peter in Jesuh kiangah, “Topa aw, hih lai-ah i om, nuam mahmah hi. Hoih na sak leh, nang-a' ding buk khat, Moses-a' ding buk khat, Elijah-a' ding buk khat, buk thum ka hong lamsak ding uh hi,” a ci hi. 5Tua bangin a pau laitakun meiingo hong kaii vatin amaute hong khuh a, tua meii lak panin aw khat hong ging vatin, “Hihpa pen ka it, ka lung a kim mahmahna ka Tapa ahi hi. Ama thu na ngai un,” a hong ci hi. * *

6Nungzuite in hih awging a zak uh ciangin leilakah boksuk uh a, lamdang a sa mahmah uh hi. 7Ahi zongin Jesuh hong pai-in amaute va lawng a, “Tho un, lau kei un,” a va ci hi. 8Amaute a khuadak uh ciangin Jesuh simloh kuamah dang a mu nawn kei uh hi.

9Mualtung panin amaute a ciahsuk laitakun Jesuh in nungzuite kiangah, “Sihna panin Mihing Tapa a kithawhsak kik matengin hih na muhte uh kuama kiangah gen kei un,” ci-in thu a pia hi. 10Tua ciangin nungzuite in Jesuh kiangah, “Bang hangin Thukham hilh siate in, Elijah hong pai masa ding hi, ci uh ahi hiam?” ci-in a dong uh hi. * 11Jesuh in, “Na khempeuh a bawlkhol dingin Elijah hong pai masa takpi hi. 12Ahi zongin note kiangah kong genin-ah: Elijah hong pai khin napi-in mite in amah theilo uh ahih manin a ututun a bawl uh hi. Tua mah bangin Mihing Tapa in zong bawlsiatna thuak ding hi,” ci-in a dawng hi. * 13Tua ciangin Tuiphumpa Johan' thu a gen ahih lamtak nungzuite in a thei uh hi.

Jesuh in Dawivei Naupang Damsak

(Marka 9:14-29; Luka 9:37-43)

14Mihonte omna a tun'kik uh ciangin Jesuh kiangah mi khat hong pai-in ama mai-ah hong khukdin' a, 15“Topa aw, nong hehpihna-in ka tapa hong damsak in. Amah in sihbup natna nei-in gim mahmah hi. Meikhuk sungah ahi a, tui sungah ahi zongin a puk zel hi. 16Na nungzuite kiangah ka paipih hangin amaute in damsak theilo uh hi,” a ci hi. 17Jesuh in, “Upna neilo, a ngaihsun khial mite aw, note bang tanvei hong ompih ding a, bang tanvei hong kikholhpih ding ka hi hiam? A naupang hong paipih un,” a ci hi. 18Jesuh in tua naupang' sung panin dawi a paikhiatna dingin thu pia a, a naupang thakhatin a dampah hi. 19Tua ciangin amau guak a om laitakun nungzuite in Jesuh kiangah, “Bang hangin kote in tua dawi hawlkhia theilo ka hi uh hiam?” ci-in a dot uh ciangin 20Jesuh in, “Na upna uh a cingtaak lohna hang ahi hi. Ahi taktakin note kiangah kong genin-ah: Ankam tang cia bang upna na neih nak uh leh, hih mual kiangah, ‘Hih lai panin hua lai-ah kin in,’ ci le uh cin kinkhia ding hi. Na hih theihloh uh khat zong omlo ding hi. * 21Thungetna leh antan'na tawh lobuang, thudang tawh hih bangte kihawlkhia theilo hi,” ci-in a dawng hi.

Jesuh in A Sih ding Genkhol Kik

(Marka 9:30-32; Luka 9:43-45)

22Galilee gamsungah a om laitakin Jesuh in a nungzuite kiangah, “Mihingte khutsungah Mihing Tapa kipia ding a, 23mite in a that ding uh hi. Ahi zongin a ni thum ni-in kihing kiksak ding hi,” a ci hi. Tua thu a zak uh ciangin nungzuite a dah mahmah uh hi.

Biakinn Siah Piakna

24Kapernaum khua-ah a tun' uh ciangin biakinn siahdongte in Peter kiangah, “Na siapa in biakinn siah hamu a piak ngei mah ahi hiam?” ci-in a dot uh ciangin, * 25“A piak ngei mah ahi hi,” ci-in a dawng hi. Innsungah Peter a lut ciangin Jesuh in na paupih masa zaw a, “Simon aw, nang na bangci ngaihsut hiam? Leitung kumpite in kuate tung panin siah kai ahi uh hiam? Amau tate tung panin siah kai ahi uh hiam, tua ahih kei leh midangte tung panin kai ahi uh hiam?” ci-in a dot ciangin 26Peter in, “Midangte tung panin siah a kai uh hi,” ci-in a dawng hi. Tua ciangin Jesuh in, “Tua ahih leh siah piak ding panin a tate a peng ahi hi. 27Ahi zongin amau' nasepna a nawngkaisak i suahkhak lohna dingin tuili-ah nga siahna sikkawi va khia in la, a awk masa penpen hong kaikhia in. Tua a ngasa kam sung en lecin dangka tang peek khat na om ding hi. Tua sum la in la, eite gel-a' dingin biakinn siah va pia in,” a ci hi.