Gamlak Vakna 4

 

Levi mite leh a Ki-ap Nasepte

1 Topa in Moses kiangah, 2“Levi mite lak panin Kohath mite amau' innkuankuan leh a behbehin, 3kikhopna buk sungah na a sem thei ding kum sawmthum pan kum sawmnga a pha mi khempeuh sim in. 4Kikhopna buk sungah Kohath mite in a siangthopen nate tawh kisai nasepte sem ding uh hi.

5“Giahphual a kisuan ding ciangin Aaron leh a tapate tumin kidalna puan lakhia ding uh a, tua puan tawh thuciamna singkuang tun ding uh hi. 6Tua ciangin amaute in savun tawh tuam ding uh a, tua tungah puan a dum tawh khuhin, a zawlte bulh ding uh hi.

7“Ompihna Anlum sabuai tungah amaute in puan a dum phah ding uh a, tua tungah a kuangdaite, paknamtui pakante, kuang-ukte, leh tuibuahna thawl gongbakte koih ding uh a, a kikoih tawntung anlum zong a tungah om ding hi. 8Tua ciangin amaute in a ausan puan tawh tuate khuh ding uh a, savun tawh khuh thuahin, a zawlte bulh ding uh hi.

9“Mei vakna meikhuam pen, a meivakte, a taitehte, a kuangte, leh sathau piakna nazatte khempeuh tawh puan a dum khatin tun ding uh hi. 10Amaute in a nazat khempeuh savun-in tunin a puakna ding tal tungah koih ding uh hi.

11“Puan a dum khat tawh kham biakna tau khuh ding uh a, savun tawh tua mah tuam thuahin, a zawlte bulh ding uh hi. 12Amaute in biakbuk sungah a kizang nazat khempeuh la-in puan dum khat tawh tunin, savun tawh tuate tun thuah ding uh a, a puakna ding tal tungah koih ding uh hi. 13Amaute in a biakna tau panin a vutte luakkhia ding uh a, a tungah puan a dupsan khat phah ding uh hi. 14Tua lai-ah nasepna dinga a kizang, biakna tau nazat khempeuh, a vutluahna peek, a tu-ka, a kawbia, leh a kuang, biakna tau nazat khempeuh, a tungah koihin, tua tungah savun tawh tuam ding uh a, a zawlte bulh ding uh hi. 15Aaron leh a tapate in biakbuk leh biakbuk nazat khempeuh a tun khit uh giahphual a kisuan ciangin, tuate a pua dingin Kohath mite hong pai ding uh a, ahih hangin amaute in a siangtho nate lawngkhalo ding uh hi; lawng le-uh si ding uh hi. Hihte pen Kohath mite' puak ding kikhopna buk nate ahi hi.

16“Siampi Aaron' tapa Eleazar in meivak tui, a namtui paknamtui, a kikoih tawntung an tawh biakna, nilh sathau, leh biakbuk leh a sunga om khempeuh, leh a nazat khempeuh uk ding hi,” a ci hi.

17 Topa in Moses leh Aaron kiangah, 18“Levi mite lakah Kohath minamte a sihlohna dingin hih un. 19A siangthopen nate nai-ah amaute a pai ciangun siloin a hin'na dingun hih un. Aaron leh a tapate pai-in a nasep ding uh leh a van puak ding ciat uhah amaute seh ding uh hi. 20Ahih hangin a siangtho nate tomkhano sung bek nangawn a en dingin amaute tumlo ding uh hi; tum le-uh si ding uh hi,” a ci hi.

21 Topa in Moses kiangah, 22“Gershon mite zong, amau' innkuankuan leh a behbehin sim in. 23Kikhopna buk sungah na a sem thei ding kum sawmthum pan kum sawmnga a pha mi khempeuh na sim ding hi. 24Nasep leh van puak ciangin Gershon-te beh' nasep dingte: 25Biakbuk dalna puante, kikhopna buk a tuamna tawh, a tungzanga om a khuhna tuuvun, kikhopna buk kongkhaka puankhai, 26buktuala puan kikhaite, biakbuk leh biakna tau kimkotah a om buktual kongpi puankhaite, a khaute, leh amau' nasepna dinga nazat khempeuh pua ding uh a, amaute in tuate tawh a kizom nasep kisam khempeuh sem ding uh hi. 27Gershon beh pasalte' nasep ding, a puak ding leh a hih dingte khempeuh uh Aaron leh a tapate' thupiakna bang hi ding a, a puak ding khempeuh uh amaute na ap ding uh hi. 28Hih pen kikhopna buk sungah Gershon beh pasalte' nasep hi a, amau' nasepna pen siampi Aaron' tapa Ithamar' ukna nuai hi ding hi.

29“Merari mite zong amau' innkuankuan leh a behbehin, 30kikhopna buk sungah na a sem thei ding kum sawmthum pan kum sawmnga a pha mi khempeuh na sim ding hi. 31Kikhopna buk sungah amau' sep dingte in: Biakbuk khuampeekte, a zawlte, a khuampite, khuam bullente tawh, 32a kimkot-a om buktuala khuampite a bullente tawh, khetphimte, a khaute, a nazatte khempeuh leh a nengnengte hi a, amaute' puak dingin a kiseh nate a minin na lo ding hi. 33Hih pen siampi Aaron' tapa Ithamar' khutnuai-ah Merari mite in kikhopna buk sungah a sep ding teng uh ahi hi,” a ci hi.

34-48 Topa' thupiakna bangin Moses leh Aaron leh mihonte' makaite in Levi mite sung panin beh thumte — Kohath-te beh, Gershon-te beh, leh Merari-te beh sunga om pasal mi phazah sim uh hi. Kikhopna buk sungah na a sem thei ding kum sawmthum pan kum sawmnga a pha a behbehin a nuai-a bang ahi hi:

Kohath mi pasal a behtangun tul nih leh za sagih leh sawmnga apha hi. Gershon mi pasal a behtangun tul nih leh zaguk leh sawmthum a phahi. Merari mi pasal a behtangun tul thum leh za nih ahi hi.

Moses leh Aaron leh Israel makaite in a sim, Levi mi a kisim peuhmah,van puak nasep leh kikhopna buk sungah na a sem thei ding kum sawmthum pan kum sawmnga a pha, a vekpi-in tul giat leh zanga leh sawmgiat a pha hi.

49Moses' tung tawnin Topa' thupiakna bangin a sep ding a puak ding ciat uh kiseh a, Topa' thupiak bangin Moses in amaute a sim hi.