Gamlak Vakna 13

 

Kanaan-ah Thukan Sawmlenih Kisawl

(Thu Hilhkikna 1:19-33)

1 Topa in Moses kiangah, 2“Israel mite tungah ka piak Kanaan leitang a vaan dingin mi sawl in la, amaute lakah makai ahi, nam khat sung panin mi khat ciat sawl in,” a ci hi. 3Tua ahih ciangin Moses in Topa' thupiakna tawh Paran gamlak panin Israel mite' lutang ahi mi khempeuh a sawl hi. 4-15A sawl mite' min hih bang ahi hi:

Reuben minam panin Zakkur' tapa Shammua; Simeon minam panin Hori' tapa Shafat; Judah minam panin Jefunneh' tapa Kaleb; Issakhar minam panin Josef' tapa Igal; Efraim minam panin Nun' tapa Hoshea; Benjamin minam panin Rafu' tapa Palti; Zebulun minam panin Sodi' tapa Gaddiel; Josef minam (Manasseh minam) panin Susi' tapa Gaddi; Dan minam panin Gemalli' tapa Ammiel; Asher minam panin Mikhael' tapa Shethur; Naftali minam panin Vofsi' tapa Nahbi; Gad minam panin Makhi' tapa Geuel ahi hi.

16Hihte pen gam vaan dingin Moses in a sawl mite' min ahi hi. Moses in Nun' tapa Hoshea pen Joshua ci-in a min kheelsak hi.

17Moses in Kanaan gam a vaan dingin amaute sawlin amaute kiangah, “Negeb gam galkhatah paito-in, mualtung gamah paito un la, 18leitang bangci hiam, tua leitangah a teng mite thahat hiam, amaute tawm hiam, tam hiam, 19amau' ten'na gam pen nuntak olna gam hiam, haksatna gam hiam, amau' ten'na khuapite pen giahphual hiam, munmuan'huai hiam, 20a leitang a lei hoih hiam, lei sia hiam, sing om hiam, omlo hiam, va thei un. Na siam tawpun va hih un la, tua leitanga gah pawlkhat hong ciahpih un,” a ci hi. Tua hun pen leenggah a palte a min hun ahi hi.

21Tua ahih ciangin amaute paito-in Zin gamlak panin Hamath khua lutna gei, Rehob mun dong gam a vaan uh hi. 22Amaute Negeb lamah paito uh a, Hebron tung uh hi. Anak' suanlekhakte ahi Ahiman mite, Sheshai mite, leh Talmai mite, tua lai-ah na om uh hi. (Hebron pen Egypt gama Zoan a kisat ma kum sagih lai-in kisat hi.) 23Amaute Eshkol kuam tung uh a, tua lai panin leenggah bawk khat bek a hiang tawh lo-in, mi nih in zawl khatin a zawng uh hi. Amaute in mang kawlsing leh thei zong tawmkhat a pua uh hi. 24Tua lai panin Israel mite in leenggah bawk a lawhna hangin tua mun pen Eshkol Kuam kici hi.

25Ni sawmli a cin' ciangin gam vaanna panin amaute hong ciahkik uh hi. 26Paran gamlak Kadesh muna Moses leh Aaron leh Israel mihonte khempeuh kiangah amaute hong tung uh hi. Amaute leh mihon khempeuh tungah thu puakkik uh a, tua leitanga gahte amaute a lak uh hi. 27Amaute in Moses kiangah, “Kote nong sawlna leitangah ka va tung uh hi. Tua lai-ah bawngnawi leh khuaizu tui bangin luang a, hih pen tua gama gah ahi hi. 28Ahi zongin tua gama teng mite thahat uh a, a khuapite uh kulh tawh ki-umin lian mahmah hi. Tua banah Anak' suanlekhakte tua lai-ah ka mu uh hi. 29Amalek mite Negeb gamah teng uh hi. Hit mite, Jebus mite, leh Amor mite, mualtung gamah teng uh hi. Kanaan mite tuipi gei leh Jordan dungah teng uh hi,” ci-in a gen uh hi.

30Ahih hangin Kaleb in Moses' mai-ah mite gamdai sakin, “Thakhatin paito-in va luah ni; bang hang hiam cih leh eite pen a zo thei mahmah ding ihi hi,” a ci hi.

31Tua ciangin amah tawh a paito mite in, “Tua mite a sim dingin i pai ngam kei ding hi; bang hang hiam cih leh eite sangin amaute hatzaw uh hi,” a ci uh hi. 32Tua ahih ciangin amaute a tamzaw in amau' vaansa gam thu Israel mite tungah a sia lamin hong puak uh a, “Kote, a vaan dingin ka va paina uh gam pen a tunga teng mite a puksisak thei ding gam hoihlo ahi hi. 33Tua lai-ah Nefilim mite (Nefilim pana hong piang Anak mite) ka mu uh hi. Kote pen kauphe bang lelin ka kingaihsun uh a, amau' muhna-ah zong tua bangmah ka hi takpi uh hi,” a ci uh hi. *