Samuel Nihna 17

 

Ahithofel' Thugente Hushai in Zo

1Tua zawh a sawtloin Ahithofel in Absalom kiangah, “Mi tul sawm leh tul nih hong teelsak in; keimah kuankhia-in tuzanin David ka delh ding hi. 2Amah gimin lungkia-in a om laitakin amah ka hih ding a, amah ka amkhamsak ding hi. Tua hi leh amah tawh a om mi khempeuh tai ding uh hi. Keimah in kumpipa bek ka satpuk ding a, 3mothak in a pasal kiang a zuatkik mah bangin mi khempeuh nang kiangah kong ciahpih kik ding hi. Nangmah in mi khat bek' nuntakna na zong hi; midang khempeuh nuamtakin om ding uh hi,” a ci hi. 4Tua thugenna in Absalom leh Israel upate khempeuh lungkimsak hi.

5Tua ciangin Absalom in, “Arkhi mi Hushai zong sam un; ama thugen ngai phot ni,” a ci hi. 6Absalom kiangah Hushai hong pai ciangin Absalom in ama kiangah, “Tua bangin Ahithofel in thu gen hi; ama genna bangin i hih ding hiam? Tua ahih kei leh nang gen in,” a ci hi. 7Tua ciangin Hushai in Absalom kiangah, “Tutungin Ahithofel' thugen hoihlo hi,” a ci hi. 8Tua banah Hushai in, “Na pa leh a mite mi thahat hi a, gamlakah a note a kilaksak vompi bangin amaute a hehna na thei hi. Tua banah na pa galdona lamsang a siam hi a, mite tawh zanin amah om khawmlo ding hi. 9Tu nangawnin amah dum khat sungah ahi a, mundang khatah ahi zongin bu khin ding hi. Kisim cilna-ah mi pawlkhat si leh tua thu a za mi peuhpeuh in, ‘Absalom a zui mite lakah a si om khin hi,’ ci ding hi. 10Tua ciangin a lungtang humpinelkai lungtang a bang galhang mipa nangawn launa tawh lungkia gawp ding hi; bang hang hiam cih leh Israel-te khempeuh in na pa mi thahat ahihna leh amah tawh a om mite mi hang ahihna thei uh hi. 11Ahih hangin keima ngaihsutna hih bang ahi hi: Dan panin Beersheba ciangdong, tuipi gei-a sehnel bangin a tam Israel mi khempeuh nang kiangah khawmin galsim dingin nangmahmah na kuan ding hi. 12Tua ciangin amah i muhna mun khat peuhpeuhah theihkholh lohin i hihgawp ding hi. Amah leh amah tawh a om mi khempeuh khat zong kisitlo ding hi. 13Amah khuapi khat sungah a nungkik leh, Israel-te khempeuh in tua khuapi sungah khauhual paipihin tua lai munah suangtang khat nangawn a kimu nawnlo dingin kuam sungah tua khua i kaikhia ding hi,” a ci hi. 14Tua ciangin Absalom leh Israel mite khempeuh in, “Arkhi mi Hushai' thugen pen Ahithofel' thugen sangin hoihzaw hi,” a ci uh hi. Bang hang hiam cih leh Topa in Absalom' tungah siatna a tun'sak theihna dingin Ahithofel' thugen hoih a zawh ding Topa in a sehsa ahi hi.

15Tua ciangin Hushai in siampi Zadok leh Abiathar kiangah, “Tua bang tua bangin Ahithofel in Absalom leh Israel upate kiangah gen a, tua bang tua bangin keimah in thu ka gen hi. 16Tua ahih ciangin tu-in manlang takin mi sawl in la, David kiangah, ‘Tuzan gamlak tui ngahmunte-ah giak kei in la, bangbang hita leh galkah in; tua hi kei leh kumpipa leh amah tawh a om mi khempeuh hong kivalhtum khading hi,’ ci-in gen sak in,” a ci hi. 17Tu-in Jonathan leh Ahimaaz in Enrogel-ah ngak uh hi. Nasem numei khat pai-in amaute kiangah gen a, amaute pai-in Kumpi David kiangah gen zel uh hi; bang hang hiam cih leh amaute khuapi sungah a lutlam uh a kimulo ding ahi hi. 18Ahih hangin tangval khat in amaute mu-in Absalom kiangah gen hi. Tua ahih ciangin amaute gel manlang takin paikhia uh a, a huang sungah tuikhuk a nei Bahurim-a mi khat' inn-ah tung uh a, tuikhuk sungah amaute tuaksuk uh hi. 19Tua ciangin a numei in khuhna khat la-in tuikhuk gong tungah phah a, tua tungah an zalh a, bangmah kitheilo hi. 20Absalom' nasemte tuanu' inn-ah hong tun' ciangin amaute in, “Ahimaaz leh Jonathan koi lai-ah om ahi uh hiam?” a ci uh hi. A numei in amaute kiangah, “Amaute lui galkhatah pai khinzo uh hi,” a ci hi. Amaute in zong a muh zawhloh uh ciangin Jerusalem-ah a ciahkik uh hi.

21Amaute a paikhiat khit ciangin tuikhuk panin mite hong paikhia uh a, pai-in Kumpi David kiangah a thu gen uh hi. Amaute in David kiangah, “Ding in; tui galkhatah manlang takin pai in; bang hang hiam cih leh tua bang tua bangin nangma langkhatah Ahithofel in thu gen hi,” a ci uh hi. 22Tua ciangin David leh amah tawh a om mi khempeuh ding uh hi. Amaute in Jordan kantan uh a, khuavak ciangin Jordan a kantan nailo khat beek om nawnlo uh hi.

23Ahithofel in ama thugen a kizuih loh a muh ciangin a la tutphah vawhin ama khuapi a inn-ah nuak ciah hi. Tua ciangin amah in a innkuan vai hawmsak a, a man ciangin amahmah gui-awk hi. Amah si a, a pa' hanah kivui hi.

Mahanaim-ah David Tung

24Tua ciangin Mahanaim-ah David tung hi. Absalom in Israel mite khempeuh tawh Jordan kantan hi. 25Tu-in Absalom in Joab tangin galkapte a uk dingin Amasa koih khin hi. Amasa pen Nahash' tanu Abigail a ten'pih, Ishmael mi ahi Ithra min nei mi khat' tapa hi a, ama nu Abigail leh Joab' nu Zeruiah a unau ahi hi. 26Israel-te leh Absalom in Gilead gamah giahphual sat uh hi.

27Mahanaim-ah David a tun' ciangin Ammon mite' gam Rabbah khua panin Nahash' tapa Shobi, leh Lodebar panin Ammiel' tapa Makhir, leh Rogelim panin Gilead mi Barzillai in 28lupnate, kuangte, leh leibeelte, mangbuh, mangbuhham, an, an kan, bepi leh besan, 29khuaizu leh bawngnawithaukhal, leh tuu leh sathaukhalte, David leh amah tawh a om mite' nek dingin hong puak uh hi. Bang hang hiam cih leh amaute in, “Mite gamlakah gilkialin, gimin dangtak uh hi,” a ci uh hi.