Samuel Nihna 10

 

Ammon mite leh Syria mite A Kizawhna

(1 Khang Tangthu 19:1-19)

1Hih hun khit ciangin Ammon mite' kumpipa si a, a tapa Hanun in ama tangin uk hi. 2Tua ciangin David in, “Keima tungah a pa thuman takin hong gamtat bangin Nahash' tapa Hanun' tungah thuman takin ka gamta ding hi,” a ci hi. Tua ahih ciangin David in a pa' hangin amah a hehnem dingin a nasemte a sawl hi. David' nasemte Ammon mite' gamah va tung uh hi. 3Ahih hangin Ammon mite' uliante in a topa uh Hanun kiangah, “David in nangma kiangah hehnemte hong sawl manin na pa a pahtawi hi, ci-in ngaihsun na hi hiam? David in a nasemte khuapi sung a en ding, leh a lawnthal dingin hong sawl hilo ahi hiam?” a ci uh hi. 4Tua ciangin Hanun in David' nasemte manin a khamul uh alang ciat kiatkhiatsak a, a puan uh a laizang, a kawng ciangah atkhiat sakin amaute a sawlkhia hi. 5David kiangah tua thu a kigen ciangin amaute a dawn dingin amah in mi sawl hi. Bang hang hiam cih leh a mite nakpi takin maizum uh hi. Kumpipa in, “Na khamul uh a saukik mateng Jerikho-ah om un la, tua ciangin hong ciah un,” a ci hi.

6Ammon mite in amaute David' huat mi a suah khitna uh a muh uh ciangin, Ammon mite in mi sawlin Bethrehob-a Syria mite, Zobah-a Syria mite, khe galkap tul sawmnih, leh Maakah kumpipa' mi tul khat tawh, leh Tob mite tul sawm leh tul nih a cial uh hi. 7David in tua thu a zak ciangin amah in Joab leh a thahat mihon khempeuh a sawl hi. 8Tua ciangin Ammon mite hong kuankhia-in kulhkongpi lutna-ah galsim dingin pan'mun hong la uh hi. Zobah leh Rehob-a Syria mite, Tob mite, leh Maakah-te, gamlakah amau pawl ciatin om uh hi.

9Joab in a nung leh a mai-ah amah a sim dingin gal in a pan'na a muh ciangin, amah in Israel-te' sung pan mi pawlkhat teelkhia a, Syria mite a do dingin a pangsak hi. 10Ama mi a omlai teng a sanggampa Abishai' ukna sungah koih a, Ammon mite' langkhatah amaute a pangsak hi. 11Tua ciangin amah in, “Syria mite kei-a' dingin a hat luat leh kei nong huh ding hi. Ahih hangin Ammon mite nang-a' dingin a hat luat leh kei hong pai-in nang kong huh ding hi. 12Kihangsak in; i mite-a' ding leh i Pasian' khuapite-a' dingin kipasalsak ni; Topa in hoih a sak bangin hong hih ta hen,” a ci hi. 13Tua ahih ciangin Joab leh amah tawh a om mite in Syria mite a do dingin naih uh a, ama mai-ah amaute tai uh hi. 14Ammon mite in Syria mite a tai a muh uh ciangin amaute zong Abishai' mai-ah tai-in khuapi sungah lut uh hi. Tua ciangin Ammon mite a dona panin Joab ciahin Jerusalem-ah a tung hi.

15Israel-te in amaute a zawhna thu Syria mite in a muh uh ciangin amau mahmah kikaikhawm uh hi. 16Tua ciangin Hadadezer in mi sawlin Eufratis galkhata Syria mite samsak hi. Hadadezer' galkapmangpa Shobak makai-in Helam-ah amaute tung uh hi. 17Hih thu David kiangah a kigen ciangin amah in Israel-te khempeuh kaikhawm a, Jordan kantanin Helam tung uh hi. David a do dingin Syria mite in na pang uh a, amah tawh kido uh hi. 18Israel-te' mai-ah Syria mite tai uh hi. David in leeng za sagih a hawl Syria mite, leh sakol tung tuang mi tul sawmli thatin, amau' galkapmangpa Shobak liamsak a, tua lai-ah amah a si hi. 19Hadadezer' nasem ahi kumpite khempeuh in Israel-te in amaute a zawhna thu a muh uh ciangin, amaute in Israel-te tawh kilemna bawl uh a, amaute' khutnuai mi a suak uh hi. Tua ahih ciangin Ammon mite a huh lai ding uh Syria mite lau ta uh hi.