Johan 8

 

Pasal tawh a Mawh Laitakin a Kiman Numei

1(Tua ciangin mi khempeuh a inn ciat uhah ciah uh a, Jesuh ahih leh Oliv Mual tungah a paito hi. 2Ahi zongin a zing ciang zingsang tungin biakinn-ah paikik a, mihon tampi ama kiangah hong kikhawm uh ahih manin amaute tungah thuhilh ding a kipan hi. 3Tua laitakin Thukham hilh siate leh Farisi mite in pasal tawh a mawh laitakin a kiman numei khat hong paipih uh a, amaute mai-ah a dingsak uh hi. 4Tua ciangin Jesuh kiangah, “Sia aw, pasal tawh a mawh laitakin hih numei a kiman ahi hi. 5Hih bang mite pen suang tawh den'lup dingin i Thukham sungah Moses in na gen hi. Tu-in nangmah in bangci ngaihsut na hi hiam?” ci-in a dong uh hi. * 6Hih bangin a dot uh ciangin Jesuh a mawhsak theihna dingun a thangsiahna uh ahi hi. Jesuh zong kunsuk a, a khutme tawh leilak a gelh hi. 7Amaute in Jesuh kiangah dong teitei uh ahih manin amah zong dingin amaute kiangah, “Note lakah mawhna a nei hetlopa in deng masa un,” a cih khit ciangin, 8kunin leilak a gelh leuleu hi. 9Ahi zongin hih kammal a zak uh ciangin amaute a khangham pen panin khat khatin paikhia uh a, a tawpna-ah Jesuh leh a mai-ah a ding numei bek a omlai hi. 10Tua ciangin Jesuh khuadakto-in numei kiangah, “Numei aw, amaute koilai tungkhin uh ahi hiam? Nang mawhsakin thu hong khen ding kuamah om nawnlo ahi hiam?” a cih ciangin 11numei in, “Topa aw, kuamah in thu hong khenlo hi,” ci-in a dawng hi. Tua ciangin Jesuh in, “Kei zong nang tungah thu kong khen kei hi. Ciah in la, mawhna bawl nawn kei in,” a ci hi.)

Jesuh, Leitung Khuavak

12Tua khit ciangin Jesuh in mihonte kiangah a thugenna khatah, “Kei pen leitung khuavak ka hi hi. Kei hong zuite in khuavak nuntakna nei ding uh a, khuamial gamtatna neilo ding uh hi,” a ci hi. * 13Tua ciangin Farisi mite in, “Nang leh nang a kigentawm na hih manin na thugente a manin kisang theilo hi,” a cih uh ciangin * 14Jesuh in, “Kei leh kei a kigentawm ka hih hangin ka thugente a man mah hi veve hi. Bang hang hiam cih leh koi panin hong pai-in koi lai-ah pai ding cih ka kithei a, note in kei ka hong paikhiatna leh ka paina ding a theilo na hizaw uh hi. 15Thu a theilopi-in kei na hong mawhsak uh hi; ahi zongin ke'n kuamah ka mawhsak kei hi. 16Mi mawhsakin thu a khen hita mah leng zong, a thukhen pen kei bek hiloin kei a hong sawl Pa Pasian leh keimah in a khenkhawm ka hih manun ka thukhennate a man taktak ahi hi. 17Na Thukham sung uhah zong, ‘Thu khat peuhpeuhah mi nih in a manna teci pangin a gen leh a genna uh thuman hi,’ ci-in na kigelh ahih mah bangin, 18keima-a' ding teci ka pang a, kei hong sawl Pa Pasian in zong keima-a' dingin teci a pang hi,” ci-in a dawng hi.

19Tua ciangin amaute in, “Na pa koi-ah om ahi hiam?” ci-in dong uh a, Jesuh in, “Kei ka hi a, ka Pa ahi zongin na hong thei kei uh hi. Kei hong thei hi le uh cin ka Pa zong na thei ding uh hi,” ci-in a dawng hi. 20Jesuh in hih thute pen sumpi khiatna kuang a kikoihna biakinn dei sungah a gen hi a, ahi zongin ama hun tung nailo ahih manin kuamah in amah manlo uh hi.

Ka Paina-ah Nong Pai Thei Kei Ding Uh Hi

21Tua ciangin Jesuh in amaute kiangah, “Kei ka paikhia ding hi. Note in kei na hong zong ding uh a, ahi zongin na mawhna uh na sihpih ding uh hi. Ka paina-ah note na hong pai thei kei ding uh hi,” a ci hi. 22Tua ahih manin Jew mi uliante in, “‘Ka paina-ah note na hong pai thei kei ding uh hi,’ ci ahih manin amahmah kithattawm ding a cihna hi ding hiam?” a ci uh hi. 23Tua ciangin Jesuh in amaute kiangah, “Note pen nuailam mi na hi uh a, kei pen tunglam mi ka hi hi. Note pen hih leitung mi na hi uh a, kei pen hih leitung mi ka hi kei hi. 24Kei pen, ‘Kei ka hihlam na hong up kei uh leh na mawhna uh a sihpih ding na hih manun, na mawhna uh na sihpih ding uh hi,’ ci-in ka hong genna pen hih thu hang ahi hi,” a ci hi.

25Tua ciangin amaute in, “Nang kua na hi hiam?” ci-in a dot uh ciangin Jesuh in, “A kipat cila kipan ka hong gensa mah ka hi hi. 26Note' thu genin, note' thu ka khen ding tampi tak om hi. Kei a hong sawlpa a thuman a thutak hi a, ama tung panin ka zaksa thute bek leitung mite tungah a pulak ka hi hi,” ci-in a dawng hi. 27Jesuh in Pa Pasian' thu a gengen ahih lamtak amaute in theilo uh hi. 28Tua ahih manin Jesuh in, “Mihing Tapa na khai khit uh ciangin ‘Kei kua ka hi hiam?’ cih thu na hong thei ding uh hi. Tua hun ciangin kei' thu bek tawh bangmah hihloin, ka Pa' hong hilhsa teng bek a gen ka hihna thu na thei ding uh hi. 29Kei a hong sawlpa' lungkimna bang bekin gamta tawntung ka hih manin amah in kei guak hong nusia loin, hong ompih tawntung hi,” a ci hi. 30Tua bangin Jesuh in thu a gen ciangin mi tampi in amah a um uh hi.

Thuman In Hong Suaktasak Ding

31Tua ahih manin amah a um Jew mite kiangah Jesuh in, “Ka thuhilhnate na zuih paisuak nak uh leh ka nungzui taktakte na hi ding uh hi. 32Tua ciangin thuman na thei ding uh a, tua thuman in note hong suaktasak ding hi,” a cih leh 33amaute in, “Kote Abraham' suanlekhakte ka hi uh a, cikmahin kuama salin ka om ngei kei uh hi. Tua ahih manin bang hangin, ‘Note suakta ding,’ hong cithei na hi hiam?” a ci uh hi. *

34Tua ciangin Jesuh in, “A mantakin ci lehang mawhna a bawl mi peuhmah mawhna' sila ahi uh hi. 35Silate pen innkuan mite tawh omkhawm paisuak lo a, tapa ahih leh om paisuak hi. 36Tua ahih manin Tapa in note hong khah leh a suakta takpi na hi uh hi. 37Note pen Abraham' suanlekhakte na hihna uh ka thei hi. Ahi zongin ka thugente hong umlo na hih manun kei thah dingin nong sawm uh hi. 38Tua ahih manin keimah in ahih leh ka Pa' hong lahsa thute bek a gen ka hi a, ahi zongin note ahih leh na pa uh hong sawl bangin a gamta na hi uh hi,” a ci hi.

Na Pa uh Dawimangpa

39Amaute in, “Kote' pa Abraham ahi hi,” ci-in a dawn' uh ciangin Jesuh in, “Abraham' tate taktak hi le uh cin Abraham' gamtat bangin na gamta ding uh hi. 40A taktakin ci lehang, ka hihna khempeuh Pasian' kiang panin ka zaksa thuman thu ka hong gen hinapi-in note in kei thahding na hong sawm uh hi. Hih note' gamtat bangin Abraham gamtalo hi. 41Note pen na pa uh gamtat bangin a gamta na hi uh hi,” a ci hi. Tua ciangin amaute in, “Kote pen zawlta ka hi kei uh a, ka Pa uh Pasian ahi hi,” a cih uh ciangin

42Jesuh in, “Kei pen Pasian kiang panin hong pai-in hih lai-ah hong om ka hih manin, Pasian pen na pa taktak uh hi leh kei na hong it ding uh hi. Keima thu-in a hong paitawm ka hi kei a, ama hong sawl ka hi hi. 43Bang hangin ka thugente thei theilo na hi uh hiam? Ka thugente na ngaih noploh man uh ahi hi. 44Note pen na pa uh Dawimangpa' tate na hi uh a, na pa uh deihna bangin a gamta nuam na hi uh hi. A kipata kipanin na pa uh mi that hi a, thuman gen ngeilo ahih manin thuman tawh kipawl theilo hi. Amah pen zuauna khempeuh a pian'na a zuaugenpa ahih manin zuau a gen ciangin ama ngeina hi lel hi. 45Tua ahih manin thuman ka hong gen ciangin na hong um thei kei uh hi. 46Note lakah kua in ka mawhna na hong lakthei uh hiam? Hong lak theilo na hih manun thuman ka gen ciangin bang hangin hong umlo na hi uh hiam? 47Pasian kiang panin a paite in Pasian' thugen za thei hi. Ahi zongin note pen Pasian kiang pan hilo na hih manun Pasian' thu na ngai nuam kei uh hi,” ci-in a dawng hi.

Abraham A Pian' Ma-in Kei Omkhin

48Tua ciangin Jew mihonte in, “Nang Samaria mi hi-in, dawivei hi teh, ka hong cih uh a man mah hilo ahi hiam?” a cih uh ciangin 49Jesuh in, “Kei dawivei ka hi kei hi. Keimah in ka Pa ka zahtakbawl a, ahi zongin note in kei nong simmawhbawl uh hi. 50Kei ka minthan' theihna ding ka hanciam kei a, ahi zongin keima minthan'na ding zongin, kei a hong angvan ding thukhen ding Khat om hi. 51A mantakin ci lehang, keima thuhilhna a zui peuhpeuh si nawnlo ding hi,” ci-in a dawng hi. 52Tua ciangin mihonte in, “Dawivei taktak na hihna thu tu-in ka hong thei uh hi. Kamsangte khempeuh leh Abraham zong si napi-in, ‘Keima thuhilhna a zui peuhpeuh si nawnlo ding,’ na ci lailai hi. 53Kote' pupi Abraham zong si ahih manin amah sangin a lianzaw dingin ki-um na hi hiam? Tua banah kamsangte khempeuh zong si ahih manin nang a kua-in kingaihsun na hi hiam?” a cih uh ciangin

54Jesuh in, “Kei leh kei a kipahtawi hi leng ka kipahtawina a mawkna hi ding hi. Ahi zongin kei hong pahtawipa pen ka Pasian uh ahi hi, na cih uh keima Pa ahi hi. 55Note in amah na thei ngei kei uh a, ahi zongin ke'n ka thei hi. Amah ka thei kei hi, a ci hi leng, note mah bangin kei zong a zuau ka hi ding hi. Ahi zongin ke'n amah thei ka hih manin ama thu ka mang hi. 56Note' pupi Abraham in keima hun a tun'ding lawp mahmah a, amah in tua hun mu-in nuam mahmah hi,” ci-in a dawng hi. 57Tua ciangin amaute in, “Nang pen kum sawmnga zong pha nailo na hih manin Abraham mu ding na hi hiam?” a cih uh leh 58Jesuh in, “A taktakin ci lehang, Abraham a pian' ma-in kei ka omkhin hi,” ci-in a dawng hi. 59Tua bang a cih ciangin amaute in amah a den'na ding suang tawm uh a, ahi zongin biakinn sung panin Jesuh a gelkhia hi.