Johan 3

 

Jesuh leh Nikodemas

1Nikodemas a kici Jew mi ulian khat om a, amah pen Farisi a kici mite pawl ahi hi. 2Khatvei zan khuamial laitakin Jesuh kiangah va pai a, “Sia aw, mi khat peuhpeuh Pasian in ompihlo hi leh hih na lamdangte kuamah in bawl theilo ding ahih manin nang pen Pasian' hong sawl siapa na hihna ka hong thei uh hi,” a ci hi. 3Jesuh in, “A mantakin kong genin-ah, mi khatpeuh a suahkik kei leh Pasian' Ukna sungah lut theilo ding hi,” a ci hi.

4Tua ciangin Nikodemas in, “Mi khat a teek khit ciangin bangci suahkik thei ding ahi hiam? A nu' sungah lutkikin suakkik thei ding ahi hiam?” ci-in a dot ciangin 5Jesuh in, “A mantakin kong genin-ah, mi khatpeuh tui leh Kha Siangtho tawh a suahkik kei leh Pasian' Ukna sungah lut theilo ding hi. 6Mihing sung panin a suakte mihing mah hi bek a, Kha tawh a suakte pen kha mi ahi hi. 7Tua ahih manin, ‘Na suahkik ding ahi hi,’ ka hong cihna hangin lamdangsa kei in. 8Huih zong a utna peuhpeuhah nung a, a huging na zaktheih hangin koi lam panin hong nung a, koi lamah nung ahi hiam, cih na mu thei kei hi. Kha tawh a suak mite zong tua mah bang ahi hi,” ci-in a dawng hi.

9Tua ciangin Nikodemas in, “Hih thu bangci pian'theih mawk ding ahi hiam?” ci-in a dot ciangin 10Jesuh in, “Israel mite' sia hinapi-in hih thu thei theilo na hi hiam? 11A mantakin kong genin-ah, kote in ka theihsa uh thu bek genin, ka muhsa uh thu bek teci a pang ka hi uh a, ahi zongin note kuamah in ka thugente uh nong um nuam kei uh hi. 12Hih leitung thute tawh a kisai thu kong gen ciangin umlo na hih uh leh vantung thute ka hong gen ciangin bangci up mah ding na hi uh hiam? 13Vantung panin a hong paisuk Mihing Tapa keimah simloh vantungah a paito ding kuamah omlo hi,” a ci hi.

14Moses in gamlak khuam tungah sumngo gul a khai mah bangin Mihing Tapa zong hong kikhai ding a, * 15amah a um mi khempeuh nungta tawntung ding hi. 16Pasian in leitung mite hong it mahmah ahih manin ama Tapa a um mi khempeuh si nawnloin a hin' tawntung theihna dingun a Tapa neihsun a hong piak dongin a hong itna a hong lak hi. 17Pasian in leitungah a Tapa hong sawlna pen mawhsakna thukhen dingin a hong paisak hiloin, leitung mite a honkhia dingin a hong paisak hizaw hi. 18Amah a um mite in mawhsak thukhenna thuaklo ding uh hi. Amah a umlote pen Pasian' Tapa neihsun umlo uh ahih manin mawhsak thukhenna a thuak khinta uh ahi hi. 19Tua bangin mawhsak thukhenna a thuakna uh a hang in: Leitungah khuavak hong tungkhin napi-in a gamtatna uh hoihlo ahih manin leitung mite in khuavak sangin khuamial deihzaw uh hi. 20A gamtat hoihlo mite in a siatna uh a kilatkhak ding utlo uh ahih manin khuavak deihlo uh a, khuavakah pai nuamlo uh hi. 21Ahi zongin thumanin a gamta mite ahih leh a gamtatnate uh Pasian' deihna tawh kituak hi, ci-in a kilatsak theihna dingun khuavak sungah a pai uh hi.

Amah Lian Semsem Ding, Kei Neu Semsem Ding

22Hih thute khit ciangin Jesuh leh a nungzuite Judea gamah pai uh a, tua gamah a nungzuite tawh omin mite tui a phum hi. 23-24Tuiphumpa Johan zong thong kia nailo hi. Tua hi a, tui tampi omna Salim khua kiang Ainon kici munah Johan in mite tuiphum a, ama kiangah mite hong pai-in tui a kiphum uh hi. *

25Tua laitakin biakna vai-in kisian' suahna tawh kizomin Johan' nungzuite leh Jew mi pawlkhat thu kiseel uh hi. 26Tua ahih manin Johan nungzuite a kiangah hong pai uh a, “Sia aw, Jordan Gun galkhatah na om khawmpih ngeipa, ama thu na genna na phawk lai hiam? Tu-in amah in mi tuiphumphum a, mi khempeuh in amah zuan uh hi,” ci-in a gen uh leh 27Johan in, “Pasian in hih theihna ding thu pia kei leh kuamah in bangmah hih theilo hi. 28Kei pen Khrih ka hi kei a, ama mai-ah a hong kisawlpa ka hi lel hi, ci-in ka genna thu note mahmah in na zaksa uh ahi hi. * 29Mo pen zinei ding tangvalpa-a' ding bek ahi hi. Zineipa kiangah a ding a lawmpa in ama kampau ding bek ngai a, ama awging a zak ciangin nuam mahmah hi. Tua mah bangin tu-in ama hangin ka nuam a, keima lungdamna kicingta hi. 30Amah lian semsem ding a, kei ahih leh ka neu semsem ding hi.

Vantung Pan Hong Paipa

31“Vantung pan hong paipa pen adang khempeuh sangin lianzaw hi. Leitung panin a piang mi pen leitung mi hi a, leitung thute bek mah a gen hi. Tua ahih manin vantung panin a hong paipa ahih leh adang khempeuh sangin a lianzaw ahi hi. 32Amah in a muhsa leh a zaksa thu a gen hinapi-in kuamah in ama thugen umlo uh hi. 33Ama thugen a umte pen, Pasian' thugen man hi, ci-in a um ahi uh hi. 34Pasian in a sawl mipa tungah ama Kha a kicingin pia ahih manin a sawl mipa in Pasian' thugente mah a gen ahi hi. 35Pa in Tapa it ahih manin ama khutsungah na khempeuh a pia hi. * 36Tua ahih manin Tapa a um mi peuhmah nungta tawntung ding a, Tapa' thu a manglote in nuntak mulo ding a, amaute tungah Pasian heh tawntung ding hi,” a ci hi.