Johan 17

 

A Nungzuite-a' ding Jesuh' Thungetna

1Jesuh in hih thute a genkhit ciangin vantung lam ento-in, “Pa aw, a hun hong tungta ahih manin na Tapa in na pianzia hong kilatsak theihna dingin tu-in na Tapa' pianzia hong kilangsak ta in. 2Bang hang hiam cih leh Tapa tungah na piak mi khempeuh tungah Tapa in nuntak tawntungna a piaktheihna dingin mi khempeuh tungah ukna aana a neihna dingin Tapa tungah na hong piaksa ahi hi. 3Nang bek a man Pasian na hihna thu leh nangmah in na hong sawl Jesuh Khrih hong theihna pen amaute-a' dingin nuntak tawntung ngahna ding lampi ahi hi. 4Nangmah in sepdingin na hong piak nasep khempeuh sem khinta ka hih manin leitungah na min a thangsak ka hi hi. 5Pa aw, leitung a kipian'sak ma-in nang tawh i neihkhawm na pianzia mah tu-in nangma omna munah hong pia ta in.

6“Leitung mite sung panin keima khutsungah na hong piak mite tungah nangma min ka pulak khinzo ta hi. Tua mite in nangma thu mangin nangma mi hi uh a, ahi zongin keima khutsungah amaute na hong pia hi. 7Tu-in amaute in keima neih khempeuh nangma hong piak ahihna thu a thei uh hi. 8Bang hang hiam cih leh gendingin na hong sawl thu khempeuh amaute kiangah ka gen ciangin um uh a, nangma kiang panin a pai ka hihna thu hong thei uh a, nangma hong sawl ka hihna thu zong hong um uh hi.

9“Amaute-a' dingin thu ka hong ngetsak hi. Leitung mite-a' dingin a hong ngetsak hiloin keima khutsungah na hong piak mite nangma mi ahih manin tua mite-a' dingin a hong ngetsak ka hi hi. 10Keima neih khempeuh nangma-a' hi a, nangma neih khempeuh keima-a' ahih manin, tua mite' hangin nangma pianzia ka neihna hong kilang hi. 11Tu-in nangma kiangah kei a hong paita ding ka hih manin leitungah ka om nawn kei ding a, ahi zongin amaute a omlai ding uh ahi hi. Tua ahih manin a Siangtho ka Pa aw, nang leh kei pumkhat ihih mah bangin amaute zong pumkhat ahihna dingun na vangliatna tawh hoihtakin na kem in. 12Amaute tawh ka omkhawm hun lai-in nangma hong piak na min vangliatna tawh amaute ka kem hi. Amaute ka hu a, a maimang dingpa simloh khat zong ka kisamsak kei hi. Tua a maimangpa lah Lai Siangtho sung thu a tun'na ding ahi hi. * 13Tu-in nangma kiangah a hong paita ding ka hih manin keimah bangin amaute in lungdamna cingtaak a neihtheihna dingun leitungah ka om lai-in hih thute a gen ka hi hi. 14Amaute tungah na thu ka gen khin hi. Ahi zongin keimah bangin amaute zong hih leitung mite tawh kipawllo uh ahih manin leitung mite in a mudah uh hi. 15Leitung panin amaute na lakkhiat ding a hong ngetsak ka hi kei a, a Gilopa' bawlsiatna ding panin na kep ding a hong ngen ka hi hi. 16Hih leitung tawh kei ka kipawlloh mah bangin amaute zong a kipawllo uh ahi hi. 17Nangma thuman hilhna tawh amaute a siangtho nangma zat dingin na bawl in. 18Leitungah kei na hong sawl mah bangin kei zong leitung mahah amaute ka sawl hi. 19Nangma tungah thuman takin amaute zong hong ki-ap theihna dingun amaute ka khualna-in nangma tungah kei ka hong ki-ap hi.

20“Hih mite-a' ding bek thu a hong ngetsak ka hi kei a, amaute' thugenna hangin kei hong um mite-a' ding zong a hong ngetsak ka hi hi. 21Pa aw, amaute khempeuh pumkhat a suahtheihna dingun ka hong ngetsak hi. Nangmah in kei na hong sawlna thu leitung mite in a uptheihna dingun eite gel pawlkhat ihih mah bangin amaute zong eite tawh pawlkhat hong hi ta hen. 22Nang leh kei pumkhat ihih mah bangin amaute zong pumkhat a suah theihna dingun keima tungah na hong piak pianzia mah amaute tungah ka pia hi. 23Leitung mite in kei na hong sawlna thu a theihna ding leh kei na hong it mah bangin amaute na itna thu a theihna hangun amaute pumkhat a suah taktak theihna dingun amaute lakah kei ka om a, kei tawh nang na hong omkhawm hi. 24Pa aw, leitung a pian'ma pekin kei na hong itna hangin na hong piak pianzia a mu dingin keimah na hong piak mite zong ka omna-ah a hong pai theihna ding ka deihsak hi. 25A Thuman ka Pa aw, leitung mite in nang hong theilo uh hi. Ahi zongin keimah in nang ka hong thei a, kei na hong sawlna thu hih mite in zong a thei uh hi. 26Kei na hong itna zah itna mah amaute sungah omin, amaute tawh kei ka omkhawm theihna dingin amaute tungah nangma min ka gen khin a, mai lamah zong ka gen lailai ding hi,” ci-in thu a ngen hi.