Sawltak Tangthu 9

 

Saul A Kikheelna

(Sawl 22:6-16; 26:12-18)

1Tua hun sungteng Saul in Topa' thu a um mite thahdingin a hanciamna zomlai hi. Siampi lianpenpa kiangah pai a, 2Topa' thu a zui mi numei pasal a muh peuhpeuh manin Jerusalem khua-ah a ciahpih theihna dingin Damaskas khua-a Jew mi kikhopna inn ukte kiangah a lah dingin lai a ngen hi. 3Damaskas khua a zuan dingin pai a, a tun' dektak ciangin thakhat thu-in van panin ama kimkotah a hong tangzaih khat a om hi. 4Saul, leilakah puksuk a, tua laitakin awging khat in ama kiangah, “Saul, Saul aw, bang hangin kei hong bawlsia na hi hiam?” a ci hi. 5Saul in, “Topa aw, kua na hi hiam?” ci-in a dot ciangin, “Nangmah in na hong bawlsiat Jesuh ka hi hi. 6Ahi zongin tho-in khuapi sungah lut in; tua lai panin na gamtatna dingteng hong kigen ding hi,” a ci hi. 7Saul tawh a tonkhawm mite in a awging a zak uh hangin kuamah mulo uh ahih manin lamdangsa lua-in pau theilo liangin a om uh hi. 8Saul zong leilak panin thoto a, a mit a hah hangin khua mu theilo hi. Tua ahih manin a kikholhpihte in a khutin lenin Damaskas khua-ah a paipih uh hi. 9Ni thum sung khua mu theiloin, anletui zong a ne kei hi.

10Tua laitakin Damaskas khua-ah Ananias min nei thu um mi khat a om hi. Amah in maang mu a, a maang sungah Topa in, “Ananias aw,” ci-in a sam hi. Ananias in, “Topa aw, ka om hi,” ci-in a dawng hi. 11Tua ciangin Topa in Ananias kiangah, “Kithawi-in Kongzing Tang gei-a Judas inn-ah va pai in la, Tarsas khuami Saul min nei mi khat va kan in. Tua Saul in thu ngen a, 12khua a muhkik theihna dingin Ananias min nei mi khat hong pai-in ama lu tungah a khut a ngakna thu, a maang muhna sungah a mu hi,” a ci hi. 13Ahi zongin Ananias in, “Topa aw, hih mipa in Jerusalem khua-a om nangma mite a bawlsiatna thu khempeuh, mi tampi tak in kei tungah hong gen khinzo uh hi. 14Tu-in zong nangmah a hong bia mi khempeuh a mattheihna dingin siampi liante tung panin thu a ngahkhit ciangin Damaskas khua-ah a hong tung ahi hi,” a ci hi.

15Ahi zongin Topa in Ananias kiangah, “Gentail mite, kumpite, leh Israel mite tungah keima min a kitheisak ding, keima na a sem dingin teelkhin ka hih manin ama kiangah va pai in. 16Keima hangin a thuakding thu khempeuh zong, keimahmah in ama tungah ka gen ding hi,” a ci hi. 17Tua ahih manin Ananias zong pai a, innsungah a lutkhit ciangin Saul lu tungah a khut nga a, “Sanggam Saul aw, hih lai-ah nong pai lai-in nangma tungah a hong kilang Jesuh mahmah in kei hong sawl hi. Nangmah in khua muthei kikin, Kha Siangtho tawh na kidim theihna dingin nangma kiangah a hong paisak ahi hi,” a ci hi. 18Tua laitakin Saul' mit panin ngasalip tawh a kibang na pawlkhat kia a, khua a mukik thei hi. Saul zong tui kiphumpah a, 19an a nekkhit ciangin a tha hong hatkik hi.

Saul in Damaskas Khua-ah Thu Hilh

Damaskas khua-ah a om thu um mite tawh tawlkhat sung a omkhawm hi. 20Kikhopna innte-ah va pai-in, “Jesuh pen Pasian' Tapa ahi hi,” ci-in thu hilh ding a kipan hi. 21Ama thuhilh a za mi khempeuh in lamdangsa uh a, “Pasian a bia mi peuhpeuh, Jerusalem khuasungah a thatpa hilo ahi hiam? Hih lai-ah zong thu um mite manin siampi liante kiangah a ciahpihkik dingin a hong pai hilo ahi hiam?” a ci uh hi. 22Ahi zongin a thuhilhna-ah Saul hong siam semsem a, Jesuh pen Khrih hi, ci-in teltakin lakthei ahih manin, Damaskas khua-a om Jew mite in a nialna ding uh om theilo hi.

Jew Mite Kiang Panin Saul Suakta

23Tuazawh ni tampi khit ciangin Jew mite kikaikhawmin Saul thahsawm uh a, 24ahi zongin Saul in amah a kisawm lamtak na phawk hi. Jew mite in Saul a thahtheihna dingun a sun a zanin khua kongpi-ah a pang uh hi. 25Ahi zongin Saul' nungzuite in zanin khuakulh tungah kahtohpihin kulh pualamah bawm tawh a khaisuk uh hi. *

Jerusalem Khua-ah Saul Pai

26Jerusalem khua-ah Saul pai a, thu um mite tawh kipawl dingin a vaihawm hi. Ahi zongin amaute in Saul pen thu um dingin na ngaihsun zolo uh ahih manin na kihta mahmah uh hi. 27Tua ciangin Barnabas in Saul hong huh a, sawltakte kiangah Saul a va paipih hi. Lam a pai laitakin Saul in Topa a muhna thu, Topa in Saul kiangah a thugennate, leh Damaskas khua-ah Saul in hangtakin Jesuh' min tawh thu a hilhnate khempeuh sawltakte kiangah a gensak hi. 28Tua ahih manin Saul zong sawltakte tawh kikhawl a, Jerusalem khuasungah vak kawikawi-in, Topa' min tawh hangtakin thu a hilh hi. 29Grik pau a zang Jew mite tawh zong thu genkhawmin kisel uh a, amaute in Saul thahdingin a vaihawm uh hi. 30A lawmte in hih thu a phawk uh ciangin Sisaria khua-ah Saul paipihsuk uh a, tua lai panin Tarsas khua-ah a ciahsak uh hi.

31Tua ahih manin Judea gam, Galilee gam, leh Samaria gamsunga om pawlpite in bawlsiatna thuak nawnloin nuamtakin om uh a, Topa zahtakna tawh gamta uh ahih manin Kha Siangtho huhna tawh a mi khangin a kibehlap uh hi.

Aineas Kidamsak

32Peter khualzinin pai kawikawi a, khatvei Lydda khua-a teng Pasian' mite kiangah a hawh hi. 33Tua khua a tun' ciangin a khutlekhe a zaw, kum giat sung tawntung lupna ngakin a om, Aineas kici mi khat a mu hi. 34Peter in tuapa kiangah, “Aineas aw, Jesuh Khrih in nang hong damsak hi; tho-in na lupna zial in,” a ci hi. Amah zong thakhatin thoto pah hi. 35Tua khua-a teng mi khempeuh leh Sharon zanglei-a teng mi khempeuh in Aineas mu uh ahih manin Topa a um uh hi.

Dorkas Kihingsak Kik

36Joppa khua-ah Pasian' thu a um, Tabitha min nei numei khat a om hi. (Tuanu' Grik min pen Dorkas hi a, sakhi a cihnopna ahi hi.) Tuanu a tawntungin a hoihin gamta-in mizawngte a huh hi. 37Tua laitakin amah a ci na-in a si hi. Amah a silkhit uh ciangin inndei tungnungah a sial uh hi. 38Joppa khua leh Lydda khua kigamlalo ahih manin, Joppa khua-a teng thu um mite in Lydda khua-ah Peter om hi, ci-in thu a zak uh ciangin Peter kiangah mi nih sawl uh a, “A manlang theithei-in ko kiangah hong pai in,” ci-in a samsak uh hi. 39Peter zong kithawi-in a samte tawh paikhawm pah a, tua khua a tun' ciangin inndei tungnungah a na paipihto pah uh hi. Tua lai-ah a na om meigong numei khempeuh in Peter na umcih uh a, Dorkas a hin' lai-in amaute-a' dingin a bawlsak puanakte leh puantungsilhte, a kahkawmun Peter kiangah a lak uh hi. 40Peter in innsung panin amaute khempeuh a pusuahsak khit ciangin khukdin'in thu a ngen hi. Tua ciangin misinu lamah kihei a, “Tabitha aw, tho in,” a cih ciangin a mit hong hak a, Peter a muh ciangin a tuto hi. 41Peter in a khut khakin a dingtosak hi. Tua ciangin thu um meigong numeite-a kipanin thu um khempeuh samkikin amaute kiangah Dorkas a nungta-in a lak hi. 42Joppa khuasung khempeuhah hih thu kitheikim a, mi tampi in Topa a um uh hi. 43Joppa khua-ah ni tampi sung Peter tamlai a, savunnim nasepin a nei Simon a kici mipa tawh a omkhawm hi.