Luka 9

 

Sawmlenihte A Kisawlna

(Matthai 10:5-15; Marka 6:7-13)

1Tua ciangin Jesuh in nungzui sawmlenihte sam a, dawite a hawlkhiat theihna ding uh leh cinate a damsak theihna dingun vangliatna leh aana a pia hi. 2Tua ciangin Pasian' Ukna thu a hilh ding leh cinatnate a damsak dingin kuankhia sakin 3amaute kiangah, “Tu-a na khualzinna uhah bangmah keng kei un. Ciangkhut ahi a, ip ahi a, an ahi a, sum ahi zongin keng kei un la, puanak zong a valin kengthuah kei un. 4Khua khatpeuhah na lut uh ciangin tua khua panin na paikhiat matengun a inn-ah hong tungsakte' inn mahah om paisuak un. 5A inn uhah a hong tun'sak noplohna khua peuhpeuh panin na paikhiat uh ciangin amaute hilhkholhna-in na khe uha leivui bangte sin'san un,” ci-in a vaikhak hi. * * 6Nungzuite zong kuankhia uh a, khua khempeuhah pai-in Lungdamna Thu hilh uh a, a paina khempeuh uhah cinate a damsak uh hi.

Herod' Lungman'na

(Matthai 14:1-12; Marka 6:14-29)

7Galilee gam sungteng a uk Herod in hih thupiangte a zak ciangin lungmang mahmah hi. Bang hang hiam cih leh mi pawlkhat in, “Johan hong hingkik hi,” ci uh hi. 8Pawlkhat in, “Elijah hong kilangkik hi,” ci uh a, pawlkhat in, “Tanglai kamsangte khat hong hingkik hi,” a ci uh hi. * 9Herod in, “Johan a ngawng ka tansak khitsa ahi hi; hih a thu ka zak mipa kua hi ding ahi hiam?” a ci hi. Tua ahih manin Jesuh tawh kimuh ding a hanciam hi.

Tul Nga Vakna

(Matthai 14:13-21; Marka 6:30-44; Johan 6:1-14)

10Sawltakte a khualzinna panun a hong tun'kik uh ciangin a sepna teng uh Jesuh kiangah a gen uh hi. Jesuh in zong amauteng bek a om theihna dingun amaute samkhia a, Bethsaida khua lamah a paipih hi. 11Mihonte in hih thu a theih uh ciangin Jesuh nungdelh uh a, Jesuh in zong amaute na nolhloin, amaute tungah Pasian' Ukna thu na hilh a, natna a neite zong a damsak hi. 12Ni a tum kuan ciangin nungzui sawmlenihte in Jesuh kiangah, “Hih lai mun gamlak ahih manin, hih kiima om khuate-ah mite va pai-in annek ding leh giahna ding a zon'na dingun mihonte sawlkhia in,” a ci uh hi.

13Ahi zongin Jesuh in amaute kiangah, “A nek dingun nektheih khat peuhpeuh pia un,” a cih ciangin amaute in, “Kote va pai-in hih mi khempeuhte-a' dingin an va lei ding ka hih kei buang uh leh, anlum nga leh ngasa tawn nih cih simloh bangmah dang omlo hi,” ci-in a dawng uh hi. 14Tua lai-ah mi tul nga bang a om hi. Tua ciangin Jesuh in a nungzuite kiangah, “Mite sawmnga, sawmnga-in a pawlpawlin tusak un,” ci-in a sawl hi. 15A nungzuite in zong tua a sawl mah bangin mite a tusak uh hi. 16Tua ciangin Jesuh in anlum nga leh ngasa tawn nih la-in vantung lam nga a, Pasian tungah lungdamna ko-in balnen a, mite tungah a lui dingin a nungzuite tungah a pia hi. 17Mi khempeuh in ne-in a khamkhit uh ciangin, a nungzuite in a kikhamval teng khawm uh a, paipel sawmlenih a dim hi.

Peter in Jesuh' Thu A Genna

(Matthai 16:13-20; Marka 8:27-30)

18Khatvei, Jesuh guak thungenin a om laitakin a nungzuite zong ama kiangah om uh hi. Jesuh in a nungzuite kiangah, “Mite in kei kua hi, hong ci uh ahi hiam?” ci-in a dong hi. 19Amaute in, “Pawlkhat in, Tuiphumpa Johan hi, hong ci uh hi. Pawlkhat in Elijah hi, hong ci uh a, pawlkhat in, tanglai kamsangte khat peuhpeuh hong hingkik hi ding hi, hong ci uh hi,” ci-in a dawng uh hi. * 20Tua ciangin Jesuh in, “Tua ahih leh note in kei kua hi, hong ci na hi uh hiam?” ci-in a dong hi. Tua ciangin Peter in, “Nang pen Pasian' Khrih na hi hi,” ci-in a dawng hi. * 21Tua ciangin Jesuh in, “Hih thu kuama kiangah gen kei un,” ci-in a nungzuite thu a pia hi.

Jesuh in A Sihding Genkhol

(Matthai 16:21-28; Marka 8:31—9:1)

22Tua ciangin Jesuh in a nungzuite kiangah, “Mihing Tapa in tampi tak thuak ding a, upate, siampi liante, leh Thukham hilh siate in amah nial ding uh hi. Amah kithat ding a, a ni thum ni-in kihing kiksak ding hi,” a ci hi.

23Tua ciangin Jesuh in a nungzuite leh mi khempeuh kiangah, “Mi khatpeuh in kei hong zuihnop leh ama deihna bangin gamta nawn loin nisimin a singlamteh pua-in hong zui ding hi. * 24Hih leitung nuntakna a hu nuamte in a nuntakna bulpi nangawn tawh suplawh ding a, kei' hangin a nuntakna a suplawhte in a nuntakna bulpi hu zo ding hi. * 25Mi khat in leitung khempeuh a ngah hangin a nuntakna bulpi suplawh leh bang phattuamna om ding ahi hiam? 26Keima hang leh ka thuhilhnate hangin a maizum peuhmah, a Pa' minthan'na vang leh a siangtho vantung mite' minthan'na tawh a minthangin hong paikik ciangin Mihing Tapa zong ama hangin a maizum ding hi. 27Ke'n kong cihin-ah, hih lai-ah a om mi pawlkhatte in Pasian' Ukna a muh khit uh matengin silo ding uh ahihna phawk un,” a ci hi.

Mel Kikheelna

(Matthai 17:1-13; Marka 9:2-13)

28Hih thu a genkhit nipikal khat bang khit ciangin Jesuh in Peter, Johan, leh James-te sam a, mualtungah thungen dingin a paipihto hi. 29Jesuh in thu a nget laitakin a mel hong kikheel a, a puante zong pakin tee mahmah hi. 30Thakhat thu-in mihing nih tawh a kiho-in hong omvat hi. Tua mi nihte pen Moses leh Elijah hi a, 31vantung minthan'na vang lim nei uh a, Jerusalem khua-ah pai-in sihna tawh Pasian' deihna a tun'sakna ding thu a kikumkum uh ahi hi. 32Peter leh a lawmte gel lusu-in ihmu uh a, ahi zongin amaute hong khanglo-in, Jesuh' minthan'na vang leh amah tawh a dingkhawm mi nihte a mu uh hi. 33A mite, Jesuh kiang panin a paikhiat laitakin Peter in bang gen ka hi hiam, cih mel zong a theilopi-in Jesuh kiangah, “Topa aw, hih lai-a i om, nuam mahmah hi. Nang-a' ding buk khat, Moses-a' ding buk khat, Elijah-a' ding buk khat, buk thum kong lamsak ding uh hi,” a ci hi. 34Hih bangin thu a gen laitakin meii hong kai a, a liim in amaute hong liah hi. Meii in a tuamcip ciangin nungzuite a lau uh hi. 35Tua ciangin meii lakah aw khat hong ging a, “Hihpa, ka Teelsa ka Tapa ahi hi; ama thu na ngai un,” a ci hi. * * 36Tua awging a bei khit ciangin Jesuh guak bek hong om hi. Nungzuite in hih a muhsa uh thu tua hun sawngteng kuama kiangah gen loin a imcip uh hi.

Jesuh in Dawivei Naupang Damsak

(Matthai 17:14-21; Marka 9:14-29)

37A zing ciangin mualtung panin hong paisuk uh a, mi tampi in Jesuh na dawn uh hi. 38Mihon lak panin mi khat hong kiko a, “Sia aw, ka tapa nong etsakna dingin kong thum hi. Amah bek ta-a ka neih ahi hi. 39Dawi in amah man a, thakhat thu-in kikogawp hi. A cilphuan a buak dongin kongkawcipsak a, gimsak gawp a, nusia nuamlo hi. 40Na nungzuite in a dawi hong hawlkhiatsakna ding uh ka thum a, ahi zongin hong hawlkhiatsak theilo uh hi,” a ci hi.

41Jesuh in, “Note in bangzahin upna neilo a, bangzahin khial na hi uh hiam? Note bang tanvei hong ompih ding a, bang tanvei hong kikholhpih ding ka hi hiam?” a ci hi. Tua ciangin a mipa kiangah, “Na tapa hong paipih in,” ci-in a dawng hi. 42A naupang hong pai laitakin dawi in leilakah tuksakin a kongkawcipsak hi. Ahi zongin Jesuh in a dawi taii a, naupang damsakin, a pa kiangah a piakik hi. 43Hih bangin Pasian a vang a liatna hangin mi khempeuh in lamdang a sa uh hi.

Jesuh in A Sihding Genkholkik

(Matthai 17:22-23; Marka 9:30-32)

Mite in Jesuh' hihnate khempeuh lamdangsa-in a om laitakin Jesuh in anungzuite kiangah, 44“Mihingte' khutsungah Mihing Tapa kipia ding ahihna thu mangngilh het kei un,” a ci hi. 45Ahi zongin amaute in a cihnopna theilo uh hi. Amaute in a theihtel lohna ding mahun a kibawl hi a, bang a cihnopna hiam, ci-in Jesuh kiangah lah a dong ngam kei uh hi.

Kua Lianpen Hiam?

(Matthai 18:1-5; Marka 9:33-37)

46Kua lianpen ding ihi hiam, ci-in nungzuite lakah kiselna khat hong om hi. * 47Jesuh in amaute' lungsim ngaihsutna a phawk ciangin naupang khat la-in a gei-ah omsak a, 48a nungzuite kiangah, “Keima hangin hih naupang a limbawl mi peuhmah in kei hong limbawl hi a, kei hong limbawl mi peuhmah in kei hong sawlpa zong a limbawl ahi hi. Note khempeuh lakah a neupenpa a lianpenpa ahi hi,” a ci hi. *

No Hong Langpanglote Note' Pawl Hi

(Marka 9:38-41)

49Tua ciangin Johan in, “Topa aw, nangma min tawh dawi a hawlkhia mi khat ka mu uh a, amah pen eima pawl sungah a om hilo ahih manin ka kham uh hi,” a hong ci hi. 50Ahi zongin Jesuh in ama kiangah, “No hong langpanglote note' pawl ahih manin kham kei un,” a ci hi.

Samaria Khua Khat in Jesuh Tungsak Nuamlo

51Jesuh vantungah a kilaktoh ding hun a nai kuan ciangin Jerusalem khua manawh dingin a ngaihsun hi. Ama mai-ah nungzui pawlkhat mapaisak a, 52Jesuh-a' dingin a kisam khempeuh a vaihawmsak dingin Samaria khua khatah a lut uh hi. 53Ahi zongin Jesuh in Jerusalem khua manawh sawm ahih manin tua khuamite in Jesuh na tungsak nuamlo uh hi. 54A nungzuite sung pan James leh Johan in hih thu a theih uh ciangin Jesuh kiangah, “Topa aw, vantung panin meikuang ngenin amaute kangtumsak le ung nong awi hiam?” a ci uh hi. * 55Ahi zongin Jesuh kihei-in amaute a taii hi. 56Tua ciangin khua dang khatah a paisuak uh hi.

Jesuh' Nungzui Ahi Dingte

(Matthai 8:18-22)

57Lampi-ah a pai laitakun mi khat in Jesuh kiangah, “Na paina khempeuhah kong zui ding hi,” a ci hi. 58Jesuh in, “Ngiate in lupna ding kua nei uh a, vasate in zong giahna ding bu nei uh hi. Ahi zongin Mihing Tapa in a luptheihna ding mun koimahah neilo hi,” a ci hi. 59Tua ciangin Jesuh in midang khat kiangah, “Kei hong zui in,” a ci hi. Ahi zongin amah in, “Topa aw, kei hong ciahsak in la, ka pa hong vuisak masa in,” a ci hi. 60Ahi zongin Jesuh in, “Misi bang ahi mite in misite na vui ta hen. Nang ahih leh va pai in la Pasian' Ukna thu va hilh in,” a ci hi. 61Tua ciangin midang khat in, “Topa aw, nang ka hong zui ding hi. Ahi zongin ka inn-ate, mangpha hong khasak masa in,” a ci hi. * 62Jesuh in ama kiangah, “Bawng lokhawhna lenkawmin a nunglam a en mi pen Pasian' Ukna tawh kituaklo hi,” ci-in a dawng hi.