Luka 7

 

Jesuh in Galkapbupa' Nasempa Damsak

(Matthai 8:5-13)

1Jesuh in mite kiangah a thugen dingteng a man khit ciangin Kapernaum khua-ah a pai hi. 2Tua khuasungah Rom mi galkapbu khat om a, tua bupa in a it mahmah nasem khat a nei hi. Tua a nasempa a ci na-in a si dektak hi. 3Tua bupa in Jesuh' thu a zak ciangin, ama kiangah Jew mi upate pawlkhat sawl a, Jesuh hong pai-in a nasempa a damsakna ding a thumsak hi. 4Jesuh kiangah Jew mi upate a tun' uh ciangin nakpi takin thum uh a, “Amah na huh dingin a kilawm mahmah mi khat ahi hi. 5Amah in ei minam hong it mahmah a, kikhopna ding inn khat zong hong lamsak hi,” a ci uh hi.

6Tua ahih manin Jesuh in zong amaute sapna bangin a va zui hi. Jesuh a tun' madiakin galkapbupa in Jesuh kiangah a lawmte pawlkhat sawl a, “Topa aw, ka inn-ah nong paina dingin kei kilawm zolo ka hih manin hong pai dah hoh in. 7Nangmah tawh a kimu dingin zong kilawmzo kisalo ka hih manin keima pumpi kong pai kei hi. Thu pia peuh lecin ka nasempa dam lel ding hi. 8Kei zong uliante' khutnuai-ah hong kikoih mi khat ka hi a, keima khutnuai-ah zong galkapte a om hi. Khat kiangah, ‘Pai in,’ ci leng a pai hi. Khat kiangah, ‘Hong pai in,’ ci leng a hong pai hi. Ka nasempa kiangah, ‘Hih na sem in,’ ci leng zong sem hi,” a ci hi. 9Jesuh in hih thu a zak ciangin lamdangsa mahmah a, amah a zui mihonte lamah kihei-in, “Israel mite lak nangawnah hih bang upna ka mu nai kei hi,” a ci hi. 10A kamtaite, galkapbupa inn-ah hong tun'kik ciangin a nasempa a na damsiang khinta hi.

Jesuh in Nain Khua-ah Meigongnu' Tapa Hingkiksak

11Tua khit a sawtloin Nain khua-ah Jesuh pai a, a nungzuite leh mihonpite in zong a zui uh hi. 12Tua khua kulhkongpi a tun' laitakun misi vui-a hong pai mihon tawh a kituak uh hi. A misi pen meigong khat' tapa khat neihsun hi a, tua khuasung mihon tampite in tua si vuina-ah meigongnu hong zui uh hi. 13Topa in tua meigongnu a muh ciangin a khasiat suak a, “Kap kei in,” ci-in a khem hi. 14Tua ciangin pai-in a hankuang va len a, si puate zong a khawlpah uh hi. Tua ciangin Jesuh in, “Tangval aw, tho in, kong ci hi,” a ci hi. 15Misipa zong hong tuto-in hong paupah hi. Tua ciangin Jesuh in a nu kiangah a ap hi. 16Amaute khempeuh in lamdangsa mahmah uh a, Pasian min phatin, “Eite lakah kamsang lian khat hong om khinta a, a mite a honkhia dingin Pasian hong pai khinta hi,” a ci uh hi. 17Hih Jesuh thu pen Judea gamsung leh a kiim gam khempeuhah kizel hi.

Tuiphumpa Johan kiang pan Kamtaite

(Matthai 11:2-19)

18Johan' nungzuite in hih Jesuh' thu khempeuh Johan kiangah a gen uh hi. 19Johan in zong ama nungzuite nih sam a, Topa kiangah amaute paisakin, “Johan in hong pai ding a cihpa mah na hi hiam, tua ahih kei leh adang na lamen lai ding ka hi uh hiam?” ci-in a dong dingin a sawl hi. 20Jesuh kiangah amaute a tun' uh ciangin, “‘Hong pai ding ka cihpa mah na hi hiam, tua ahih kei leh adang na lamen lai ding ka hi uh hiam?’ ci-in a dong dingin Tuiphumpa Johan in hong sawl hi,” a ci uh hi. 21Tua hun laitak mahmahin natna a tuamtuamte tampi damsakin, dawivei mite sung panin dawite hawlkhia a, mittaw mi tampi khua a musak hi. 22Tua ahih manin Johan' kamtaite kiangah, “Va ciahkik un la, na muhsa uh leh na zaksa uh thute khempeuh Johan kiangah va gen un. Mittawte in khua muthei a, khebaite lam paithei a, miphakte damkik a, bilngongte in khua zathei kik a, misite kihingsak kik a, mizawngte tungah Lungdamna Thu kihilh hi. * 23Kei hong umte pen a lungdamhuai mahmah ahi hi,” ci-in a dawng hi.

24Johan' kamtaite a ciahkik khit ciangin Jesuh in mihonte tungah Johan' thu gen a, “Johan kiang gamlakah na pai uh ciangin bang a en dingin a pai na hi uh hiam? Huih in a mut awn diamdiam lopa kungte a en ding maw? 25Tua ahih kei leh bang a en dingin a pai na hi uh hiam? Puan hoihnono a silh mi khat a en ding maw? A taktakin ci lehang tua bangin puan hoih silh a, nuamtakin a omte pen inn lianpipi sungah teng uh hi. 26Tua ahih leh bang a en dingin a pai na hi uh hiam? Kamsangpa khat a en dingin a pai na hi uh hiam? Hi hi, kamsangpa a en dingin na pai uh a, kamsang ciang bek hiloin a lianzaw khat na mu uh hi. 27Bang hang hiam cih leh Lai Siangtho in Johan thu a genna-ah, ‘Hih lai-ah ka kamtaipa om hi. Nangma lampi a hong dingin na mai-ah ka mapaisak ding hi, ci-in Pasian in gen hi,’ ci-in kigelh hi. * 28Johan pen leitung mihing sung khempeuh panin a lianpen ahi hi. Ahi zongin Pasian' Ukna sunga a om mi a neupen i cihte nangawn Johan sangin lianzaw lai hi,” a ci hi.

29Siahdongte leh midangte khempeuh in hih thu a zak uh ciangin Pasian' deihna zui-in Johan' khutsungah tui a kiphum uh hi. 30Ahi zongin Farisi mite leh Thukham hilh siate in Pasian' deihna nialin Johan khutsungah tui kiphum ding utlo uh hi. *

31Tua ciangin Jesuh in, “Tuhuna mite bang tawh genteh ding a, bang tawh kibang ci ding ka hi hiam? 32Mihon omna lamkabomah a tu naupang a kimawlte tawh kibang uh hi. Naupang honkhat in a lawmte kiangah, ‘Lamna ding khuang kong tumsak hangun na lam nuam kei uh a, kahna la ka sak hangun lah na kap nuam tuan kei uh hi,’ a cihte tawh a kibang uh hi. 33Bang hang hiam cih leh Tuiphumpa Johan hong pai a, amah in zu leh an tangin a om ciangin, ‘Dawivei hi,’ a ci uh hi. 34Mihing Tapa hong pai leuleu a, zune anne-in a om ciangin, ‘Zuhai, anhaipa, siahdongte leh midangte in a kikholhpih noploh mite tawh a kikhawlpa,’ ci leuleu uh hi. 35Ahi zongin Pasian' pilna a man ahih lamtak, ama thu a zui mite in kilangsak hi,” a ci hi.

Farisi Mi Simon' Inn-ah Jesuh

36Farisi mite khat in a inn-ah anne dingin Jesuh sam a, Jesuh zong pai-in anne dingin a tu hi. 37Tua khuasungah a paktat numei khat om hi. Farisi mipa' inn-ah Jesuh in anne-in a omna thu a zak ciangin paknamtui suangngo thawl a dim khat hong paipihin, 38Jesuh' nungah tu-in kap a, a khitui tawh Jesuh' khete kawtsakin a sam tawh nulsak a, a khete namin a sathau puak a nuh hi. * 39Jesuh a sam Farisi mipa in a muh ciangin a lungsim sungah, “Hihpa pen kamsang taktak hi leh amah a lawng hih numeinu a bangci mi ahi hiam cih thei ding a, ama gamtat hoihlohna teng zong thei ding hi,” a ci hi.

40Tua ciangin Jesuh in, “Simon aw, kong gennop khat om hi,” a ci hi. Simon in, “Sia aw, bang hong gennuam na hi hiam?” a cih ciangin 41Jesuh in, “Lei a ba mi nih om hi. Khat in ngun peek za nga ba a, a khat in sawmnga ba hi. 42Amaute gel in a loh zawhloh ciangin a batnapa un a nih tuakun a maisak hi. Hih mi nihte sung panin kua in amah itzaw ding ahi hiam?” a ci hi. 43Simon in, “Leiba tam a maisaknapa in itzaw dingin ka um hi,” ci-in a dawn' ciangin Jesuh in, “Na genna man mahmah hi,” a ci hi. 44Tua ciangin numei lamah Jesuh kihei a, Simon kiangah, “Hih numei' gamtatna na mu hiam? Na inn-ah kong pai a, ka khe silna ding tui nong pia kei hi. Ahi zongin amah in a khitui tawh ka khe hong silsak a, a sam tawh hong nulkeusak hi. 45Nang in napna tawh leengla na hong do kei a, ahi zongin amah in hih lai-ah kong tun'-a kipanin tudongin ka khe a nap khawl nailo hi. 46Nang in ka lu sathau nong nilhsak kei a, ahi zongin amah in ka khe nangawn sathau namtui hong nuhsak hi. 47Tua ahih ciangin nang kiangah kong genin-ah, ama mawhna tampi tak a omte kimaisak khin ahih manin amah in a itna nakpi takin a lak hi. Ahi zongin tawmno bek a kimaisakte in a itna uh tawmno bek mahin a lak uh hi,” a ci hi.

48Tua ciangin Jesuh in numei kiangah, “Na mawhnate hong kimaisak khin hi,” a ci hi. 49Tua ciangin Jesuh tawh sabuai-ah an a nekhawm midangte in a lungsim sung uhah, “Mawhna nangawn a maisak hih mipa kua ahi hiam?” a ci uh hi. 50Tua ciangin Jesuh in numei kiangah, “Na upna in nang hong damsak khinta hi; lungnuam takin va ciah in,” a ci hi.