Luka 21

 

Meigongnu' Sumpi

(Marka 12:41-44)

1Jesuh a khuadak leh mihaute in biakinn sumkuang sungah a letsong uh a khiatna, 2leh a zawng meigong khat in zong sumnen tang nih a khiat a mu hi. 3Tua ciangin amah in, “Ke'n kong cihin-ah, hih a zawng meigongnu in a dangte khempeuh sangin tamzaw a khia hi. 4Bang hang hiam cih leh adangte in a zatval uh sumte a khia uh ahi hi. Ahi zongin hih numei a zawng mahmah hinapi-in a nuntakna ding khempeuh a khia khin ahi hi,” a ci hi.

Jesuh in Biakinn Siatding Genkhol

(Matthai 24:1-2; Marka 13:1-2)

5Mi pawlkhat in suang hoih mahmahte tawh kilamin tua biakinn hoihin a thupi mahmahna leh Pasian tungah letsong tampi a kipiaknate a gen uh ciangin Jesuh in, 6“Tu-a na muh uh hih nate khempeuh a siatgawp ding hun hong tung ding hi. Inn lamna-a a kiciang suangte a kithuapin a om nangawn om nawnloin kiphelkekmang ding hi,” a ci hi.

Limte leh Bawlsiatnate

(Matthai 24:3-14; Marka 13:3-13)

7Tua ciangin amaute in, “Cik ciangin hih thu hong piang ding a, hih thu a pian'ding ciangin bang lim hong om ding ahi hiam?” ci-in a dot uh ciangin 8Jesuh in, “Kidawm un la, mi' khemsa-in ta kei un. Bang hang hiam cih leh keimah a kineih mi tampi hong pai ding uh a, ‘Keimah, Khrih ka hi hi; a hun hong tungta hi,’ hong ci ding uh hi. Tua bang mite' nung zuikha kei un. 9Gal thu ahi a, gam kilumletna ding thu ahi zongin na zak uh ciangin lau kei un. Hih bang thute a hong piang masa ding mah hi a, ahi zongin beina ding hong naita hi, a cihnopna hi nailo hi,” a ci hi.

10Tua ciangin Jesuh in a thugen zomlai a, “Gam khat leh gam khat hong kido-in, kumpi khat leh kumpi khat hong kido ding hi. 11Mun khempeuhah nakpi takin zin hong lingin, kialpi leh pulnatna zong hong tung ding hi. A kihtakhuai a tuamtuamte leh lim lianpipi vanah hong kilang ding hi. 12Ahi zongin hihte khempeuh hong pian'ma-in keima hangin note hong kimanin hong kibawlsia ding hi. Kikhopna innte-ah thusitna thuakin thongah khiatdingin hong ki-ap ding a, ukpite leh kumpite mai-ah hong kipaipih ding hi. 13Hih hun sung pen note in Lungdamna Thu na gentheihna ding uh hunhoih ahi hi. 14Tua hun ciangin eite in bangci gen ding cih lunghihmawhin nei kei un. 15Bang hang hiam cih leh tua hun ciangin note' gending thu leh pilna kong guan' ding a, na galte uh khat beek in note' thugen hong nialzo loin, zong hong sel zolo ding uh hi. * 16Na nu na pate, na sanggamte, na behte, leh na lawmte mahmah un note hong khia ding a, note pawlkhat in thahna na thuak ding uh hi. 17Mi khempeuh in keima hangin note hong mudah ding uh hi. 18Ahi zongin na samzang khat nangawn uh mangthanglo ding hi. 19Hih bangin thuakzo le uh cin nuntakna taktak ngah ding na hih manun kiptakin om un.

Jesuh in Jerusalem Siatding Genkhol

(Matthai 24:15-28; Marka 13:14-23)

20“Galkapte in Jerusalem khuapi a umcihna na muh uh ciangin tua khuapi a siatna ding naita hi, ci-in na thei ding uh hi. 21Tua ciangin Judea gamsunga omte mualtungah tai un. Jerusalem khuasunga omte zong taikhia un la, gamsung khuaneu-a om mite, Jerusalem khua sungah lut nawn kei un. 22Bang hang hiam cih leh Lai Siangtho sungah a kigelh mah bangin, ‘Gim Piak Ni,’ ahi hi. * 23Tua huna naupaiite leh naungek neite-a' dingin haksa mahmah ding hi. Hih leitungah gimna lianpi hong tung ding a, Pasian in hih mite gim a pia ding hi. 24Mi pawlkhat, namsau tawh kithat ding a, pawlkhat, galmatin gamdangah kiciahpih ding hi. Tua ciangin Gentail mite' uk hun a bei matengin Jerusalem khuapi a siacipin om ding hi.

Mihing Tapa Hong Paina

(Matthai 24:29-31; Marka 12:24-27)

25“Ni, kha, leh aksite tungah lim hong om ding hi. Tuipi ging leh tuihual liante kihtakna hangin leitung mi khempeuh lau-in lunggim ding uh hi. * 26Leitungah tu-in bang hong piangding, ci-in a ngaihsut kawmun mite lau-in sibup ding uh hi. Vantunga om nate a pai ngei bangin pai nawnloin lampial mangkhin ding uh hi. 27Tua ciangin Mihing Tapa hong kilang ding a, minthan'na leh vangliatna tawh meii lakah hong pai ding hi. * 28Hih thute a pian'ding hong kipat ciangin, note hong kihotkhiat ding hun hong naita ahih manin, dingin nuamna lungsim tawh khuadak un,” a ci hi.

Thei Kung' Thuhilhna

(Matthai 24:32-35; Marka 13:28-31)

29Tua ciangin Jesuh in amaute kiangah thugentehna khat gen a, “Thei kung-a kipan singkung khempeuh en dih un. 30A teh hong no na muh uh ciangin khuakhal hong naita hi, ci-in na thei uh hi. 31Tua mah bangin hih thute hong piang na muh uh ciangin Pasian' Ukna hun hong tungta ding hi, ci-in na thei ding uh hi. 32Hih lai-a om mite a sihkhit ma-in hih thute hong piang ding ahihna phawk un. 33Van leh lei a mangthang zongin ka thugente maimang ngeilo ding hi.

Vilding Hanthawn

34“Limtakin kidawm un. Thakhat thu-in tua Ni hong tung khading ahih manin zune anne leh leitung nuntakna lunghimawhin thamang kei un. 35Theihkholh lohin thang kisai bangin leitung mi khempeuh tungah hih thu hong piangvat ding hi. 36Hih thupiang khempeuh thuakzawhna ding thahatna na neihna ding uh, leh Mihing Tapa mai-ah na din'theihna dingun a tawntungin thu ngenin vil niloh un,” a ci hi.

37Tua sungteng nisimin Jesuh in biakinn-ah thu hilh a, nitak ciangin paikhia-in Oliv Mual tungah a giak zel hi. * 38Ama thuhilhna a ngai dingin mi khempeuh zingsang simin biakinn-ah hong pai baih uh hi.