Luka 16

 

A Diktatlo Sumkempa Thugentehna

1Tua ciangin Jesuh in a nungzuite kiangah, “Sum haupa khat om a, a neihsateng a uk dingin ama khutnuai-ah mi khat a koih hi. Tua a neihsateng a uk dingin a koih mipa in a topa' sumteng phengzat gawp hi, ci-in kikhia hi. 2A topa in zong amah sam a, ‘Na gamtatna ka zak a bangci thu ahi hiam? Keima neihsa a uk dingin hong koih thei nawnlo ding ka hih manin a beisa hunsungah ka neihsate na zeekna sazian a kimtakin hong pia in,’ a ci hi. 3Tua ciangin a nasempa in lungngai a, ‘Ka topa in ka nasepna panin hong tawpsak ding ahih manin bangci gamtat ding ka hi hiam? Thatang nasep lah ka ngap kei a, nektawm ding mi kiangah ngetding lah ka maizum hi. 4Tu'n ka gamtatna ding ka theita hi. Tua ka ngaihsut bangin gamta leng, ka nasepna panin ka tawp ciangin lawm nei-in, amaute in a inn-ah kei hong tungsak ding uh hi,’ ci hi. 5Tua ahih manin a topa' sum a bate khat khatin sam a, a masa penpa kiangah, ‘Ka topa tungah bangzah ba na hi hiam?’ a ci hi. 6Amah in, ‘Sathau tambong za nih dim ba ing,’ ci hi. Tua ciangin amah in, ‘Na leibatna lai va la in,’ ci hi; tua ciangin, ‘Na leiba om lai sathau tambong za khat hi. Tu mahmahin tusuk in la, tambong za khatin ciamteh in,’ ci hi. 7Tua ciangin adang khatpa kiangah, ‘Nang bangzah ba na hi hiam?’ ci-in a dot ciangin, ‘Mangbuh seu za khat ba ing,’ ci hi. Tua ciangin amah in, ‘Na leibatna lai va la in,’ ci hi; tua ciangin, ‘Na leiba om lai seu sawmgiat hi. Seu sawmgiat, ci-in ciamteh in,’ ci hi. 8A diktatlo nasempa pen ama ngiansiamna hangin a topa in a pakta hi. Bang hang hiam cih leh Pasian thu a zui mite sangin leitung mihingte pen a nasepna uhah ngiansiam zaw uh hi.

9“Note kiangah kong genin-ah, hih na leitung sum uh a bei ciangin tawntung nuntakna inn-ah hong kilutsak theihna dingin lawm zon'na-in hih leitung sumte na zang un.

10“A tawmno-ah a diktatte pen a tamah zong diktat uh a, a tawmno-ah a citaklote pen a tamah zong citaklo uh hi. 11Hih leitung sumte-ah na cihtak kei uh leh kua in no tungah vantung sum hong ap ngam ding ahi hiam? 12Midangte' neihsa tungah na cihtak kei uh leh, kua in no tungmah nomau gamhluah ding hong ap ngam ding ahi hiam?

13“To nih' na a semkhawmzo nasem kuamah omlo hi. A to khat mudahin khat it ding a, khat beelin khat a simmawh ding hi. Pasian' na leh leitung sum na na semkhawmzo kei ding uh hi,” a ci hi. *

Thukham leh Pasian' Ukna

14Sum a deih phadiak Farisi mite in hih thute a zak uh ciangin Jesuh a nuihsan uh hi. 15Jesuh in amaute kiangah, “Mite in note a man penin hong ngaihsut theihna dingin na om uh a, ahi zongin Pasian in na lungsimtawng uh a hong thei hi. Bang hang hiam cih leh mihingte in a manpha mahmahin a ngaihsutte pen Pasian in bangmahin simlo hi.

16“Tuiphumpa Johan' hun ciangdong Moses Thukham leh kamsangte' thugente pen zuih belin kinei a, ahi zongin Pasian' Ukna hangin Lungdamna Thu a kihilh huna kipanin hih thu-ah mi khempeuh hong kituhteh uh hi. * 17Ahi zongin Thukham a neupen themno khat nangawn a maiman' ding sangin van leh lei a man'than' ding olzaw lai hi. *

Kimakna Thu Jesuh' Genna

(Matthai 19:1-12; Marka 10:1-12)

18“Pasal khat in a zi ma-in numei dang a ten'pih leh tua numei tawh a mawh hi a, a kima numei a ten'pih pasal zong numei tawh a mawh mah ahi hi. *

Sum Haupa leh Lazaras

19“Khatvei, mihau mahmah khat om a, nisimin puan manpha nono silhin, anlim nono ne-in a om hi. 20Tua ciangin a pumtangin meima a vei, Lazaras a kici mizawng khat zong, mihaupa' kongbiangah hong kikoih a, 21mihaupa' sabuai tung panin a kia annengte nenuamin a ngak hi. Tua bangin a om laitakin uite hong pai-in a meima hong liahliah sak uh hi. 22Tua ciangin mizawngpa hong si a, vantunga Abraham kiangah a om dingin vantung mite in a paipih uh hi. Mihaupa zong hong si leuleu-in a kivui hi. 23Ahi zongin hell khuk sungah gimna thuakin a om hi. A khuadak leh, gamlapi mun khatah Abraham leh Lazaras a omkhawm a galmuh hi. 24Tua ahih manin nakpi takin kiko a, ‘Pa Abraham aw, kei hong hehpih in. Meiphual sungah omin nakpi takin gimna thuak ka hih manin Lazaras in a khutme dawn tui diahin ka leii hong votsakna dingin hong sawl in,’ a ci hi. 25Ahi zongin Abraham in, ‘Ka ta aw, leitungah na nuntak laitakun nang nopsakna namkim na ngah laitakin Lazaras in haksatna namkim a thuak hi. Ahi zongin tu-in amah in hih lai-ah nopsakna a ngah laitakin nangmah in haksatna a thuak na hi hi. 26Tua thamloin, i kikalah kuam thukpi khat om a, hih lai panin nang kiangah hong pai nuamte kuamah pai zolo a, nangma omna panin hih lai-ah zong kuamah hong pai zolo hi,’ ci-in a dawng hi. 27Tua ciangin mihaupa in, ‘Pa aw, tua bang ahih leh zong, ka inn uhah Lazaras nong sawlsakna dingin ka hong thum hi. 28Inn-ah nau pasal nga ka nei lai a, ke'n gim ka thuakna hih lai munah hong tun'khakloh teiteina dingun kei' gamtat bangin a gamtatlohna dingun hong hilhsak hen,’ a ci hi. 29Ahi zongin Abraham in, ‘Na sanggamte a hilh dingin Moses leh kamsangte om uh ahih manin tuate' thugen na ngai ta uh hen,’ a ci hi. 30Tua ciangin mihaupa in, ‘Pa Abraham aw, tua nong gen zong a kicing khin hi mah hi. Ahi zongin a sisa mi khat hingkikin amaute kiangah va paikik leh a mawhna panun ka naute kisik hamtang ding uh hi,’ a ci hi. 31Ahi zongin Abraham in, ‘Amaute in Moses leh kamsangte' thu a man'nop kei uh leh, mi khat hong hingkikin amaute kiangah a va gen hangin umsakzo tuanlo ding hi,’ ci-in a dawng hi,” a ci hi.