Kumpi Masate 7

 

Solomon' Innlam Dangte

1Solomon in ama inn ding zong kum sawmlethum sung lamin a inn buppi a zo hi.

2Amah in Lebanon Tulak Inn a kici khat a lam hi. A sauna pi zalesawmnga hi a, a zaina pi sawmsagihlenga hi-in, a san'na pi sawmlilenga hi a, taamtak khuampi gual thum tungah taamtak innkam kikhungin tua tungah a kilam ahi hi. 3Gual khatah sawmlenga a om khuampi sawmlilenga tunga kilam inndei tung san teng taamtak sing tawh kituam hi. 4A pang kawmte gel tungah tawlet gual thum tuak om a, a tawlet gual thumte khatlekhat kitang hi. 5A kongkhakte leh a tawlet khempeuhte a pang kikim kiu li nei vive hi a, a gual thumin tawlet khatlekhat kitang dimdiam hi.

6Tua ciangin amah in Khuampi Innpi a kici khat lam hi. A sauna pi sawmsagihlenga hi a, a zaina pi sawmlilenga ahi hi. A mailamah khuampite a nei innlim om a, tua khuampite tungah a tungkhuhna khat om hi.

7Tua ciangin amah in a thukhenna ding mun Thukhenna Innpi ahi Kumpi Tokhom Innpi a kici khat lam a, a sual panin a innsun ciangdong taamtak sing kizang hi.

8Kumpi Tokhom Innpi nunglamah ama ten'na ding inn zong tua mah bangin a kilam ahi hi. Solomon in zi-a a lak Faro' tanu-a' dingin hih innpi tawh a kibang inn dang khat zong a lam hi. *

9Hihte khempeuh, a bulpi nangawn-a kipan a khum dong, leh Topa' biakinn tual-a kipan tual lianpi dongin, limtakin tehin, a kitan, a nung leh a mai suangatna tawh a ki-at a manpha suangte tawh a kibawl ahi hi. 10A bulpi pen a manpha suang, suang lian, pawlkhat pi sawmlenih, pawlkhat pi sawmlenga a pha suangte ahi hi. 11Tuate' tungate pen limtakin tehin a kitan a manpha suang, leh taamtak sing ahi hi. 12Tual lianpi in a kimkotah a kiseek suang gual thum simin taamtak sing gual khat nei hi. Tua mah bangin Topa' biakinn tual sungnung leh innlim in zong a nei hi.

Biakinn Sungah Huram' Nasep

(2 Khang Tangthu 2:13-14; 3:15—5:1)

13Tua ciangin Kumpi Solomon in mi sawlin Taia khua-a om Huram samsak hi. 14Amah pen Naftali minam meigongnu' tapa hi a, ama pa pen Taia khuami sumngo seek na a sempa ahi hi. Amah in sumngo tawh na khat peuhpeuh hihna dingin pilna, theihna, siamna a nei ahi hi. Kumpi Solomon kiangah amah hong pai-in ama na khempeuh a sem hi.

15Amah in sumngo khuampi nih sung hi. Khuampi khat a sauna pi sawmnihlesagih hi a, a khuam pum kimkot pi sawmlegiat pha hi. A sung hawm a, a sahna zung li ahi hi. A khuam nihna zong tua mah tawh kibang hi. 16Khuampite tungah a bulh dingin amah in a kisung sumngo khuamluzepna nih zong a bawl hi. Khuamluzepna khat a sauna pi sagih leh alang hi a, adang khat khuamluzepna a sauna tua zah mah ahi hi. 17Tua ciangin amah in khuampite lu dawna khuamluzepna-a' dingin khainiang a kihuiheek tawh a kibawl ngen banga kikalh simsiam nih a bawl hi. Ngen khat pen khuamluzepna khat-a' ding hi a, a ngen dang khat pen khuamluzepna adang khat-a' ding ahi hi. 18Tua mah bangin amah in mang kawlsing gahte a bawl hi. Khuampi lu dawna om khuamluzepna tuamna dingin ngen tawh kibangin a bawl tung kimkotah gual nih bawl a, a khuamluzepna dang khat zong tua mah bangin a bawl hi. 19Tua ciangin innlim-a om khuampi dawnah a om khuamluzepnate pi guk pha a, tuate tungah unok pak a kibawlte om hi. 20A khuamluzepnate pen a khuampi nihte tung leh ngen tawh kibanga kibawl gei-a a om a bem a dawk tungah om hi. A kimkotah gual nihin mang kawlsing gah za nih om a, a khuamluzepna dang khatah zong tua bangmah ahi hi. 21Amah in biakinn innlimah khuampite a phut hi. Leitaw lamah a khuam khat phutin a min Jakhin phuak a, leilu lamah a khuam dang khat phutin a min Boaz a phuak hi. 22A khuampite dawnah unok pak a kibawl om hi. Tua bangin khuampite a bawl a man khin hi.

23Tua ciangin amah in a kisung tuikuangpi a bawl hi. Tua tuikuang a bem hi a, a gei khat pan a gei khat pi sawmlenga pha-in, pi sagih leh alang thuk a, a kimkot pi sawmlilenga a pha hi. 24A geivial nuai pi sawmlilenga sung, tuikuangpi kimkotin um gahte kibawl hi. Tua um gahte gual nihin om a, a tuikuangpi a kisun'in kisung khawm pah hi. 25Bawngtal sawmlenihte tungah tua tuikuangpi kinga a, thum leilu lam nga a, thum nitumna lam nga-in, thum leitaw lam nga a, thum nisuahna lam a nga hi. Tuate tungah a tuikuangpi kikoih a, a nunglam uh a sunglamah om hi. 26A tuikuang sahna khutpeekmai cia ahi hi. A geivial pen unok pak tawh a kibang hai geivial bangin kibawl hi. Tua sungah tui tambong tul li bang ta thei hi.

27Amah in sumngo kibawl tuikuang a kingakna sawm zong a bawl hi. Tua a bawlte pi guk sau, pi guk zai, pi li leh alang sang hi. 28Tua a kingaknate hih bangin kibawl hi: Tuate in a khawkte nei-in, tua a khawkte a kungah kibulh a, 29tua ciangin a kungah a kibulh a khawkte tungah humpinelkaite, bawngtalte, leh kherub-te om hi. Tua kungte tung, humpinelkaite leh bawngtalte' tung leh nuai-ah a sawi-in a kikalh limliam om hi. 30Tua thamloin tua ngaknate in sumngo tawh a kibawl leengpeite leh leengpei zawlte nei ciat a, a kiu lite-ah tuikuangpi nan'nate om hi. Tua nan'nate a kisung hi a, a pang ciatah pakkual om hi. 31A gong pen a kingakna pan pi khat leh alang sangto hi. A gong pen kingakna a kibawl bangin bem a, pi nih leh letmat thum thuk hi. A gongah lim kigelhte om hi. A khawkte in sikli nei a, bemlo hi. 32A leengpei lite pen a khawkte' nuai-ah om hi. Leengpei zawlte a kingakna tawh sakhat mah hi a, leengpei a san'na pi nih leh letmat thum ahi hi. 33A peite pen sakol leengpei bangin kibawl hi; a pei zawl, a peikual, a peikalhna, leh a kalhna bulte khempeuh a kisung ahi hi. 34A kingaknate' kiu ciatah a nan'na li om ciat a, tua a nan'nate a ngakna tawh sakhat ahi hi. 35Tua ciangin a ngakna dawnah letmat kua a sang vial bem khat om hi. A ngakna dawnah a kipsaknate leh a khawkte pen a ngakna tawh sakhat ahi hi. 36Tua ciangin a kipsaknate leh a khawkte tungah a mun awng zah ciat tawh kizui-in amah in kherub-te, humpinelkaite, leh nisuh kungte gelhin a kimkotah pakkual a bawl hi. 37Tu-a bangin amah in a kingakna sawm bawl hi. A vekpi-in a kibangin kisungin, a liatna leh a pian'lim a kibang ahi hi.

38Tua ciangin amah in sumngo tuikuang sawm bawl hi. Tuikuang khatah tui tambong sawmgiat bang ta-in, tuikuang vangsung pi guk ciat pha a, a kingakna sawmte-a' dingin tuikuang khat ciat om hi. * 39Tua ciangin amah in tua a kingaknate, biakinn leitaw lamah nga, leilu lamah nga a koih hi. Tua ciangin biakinn khang nisuahna lam kiu-ah tuikuangpi a koih hi.

40Huram in beelte, kawbiate, leh kuangte zong a bawl hi. Tua ahih ciangin Huram in Kumpi Solomon-a' dingin Topa' biakinn-a ding nasep khempeuh a zo hi. 41Khuampi nihte, khuampite dawnah a om khuamluzepna kuak nihte, leh khuampite dawnah a om khuamluzepna kuak nihte tuamna ding ngen tawh a kibanga kibawl nihte; 42khuampite tungah a om khuamluzepna nihte a tuam dingin ngen tawh a kibanga kibawl khat-a' dingin mang kawlsing gah gual nih ahi, ngen tawh a kibanga kibawl nih-a' dingin mang kawlsing gah za lite; 43a kingakna sawmte, leh a kingaknate tungah a om tuikuang sawmte; 44tuikuangpi khat, leh tuikuangpi nuai-ah a om bawngtal sawmlenihte ahi hi.

45Tu-in beelte, kawbiate, leh kuangte, Huram in Kumpi Solomon-a' dingin a bawl, Topa' biakinn sungah a om nazatte khempeuh a tee sumngo tawh a kibawl ahi hi. 46Jordan zanglei, Sukkoth leh Zarethan kikal beel lei-ah kumpipa in tua nate sungsak hi. 47Tamlua ahih manin Solomon in hih nate khempeuh tawiteh zolo hi; sumngo gik zah kitheilo hi.

48Tua ahih ciangin Topa' biakinn sunga om nazat khempeuh Solomon in bawl hi. Kham biakna tau, Ompihna Anlum-a' dingin kham sabuai, * 49biakinn sungnung mai, leitaw lampangah nga omin, leilu lampangah nga a om kham citak meivakkhuamte; kham tawh a kibawl pakte, meivakte, leh taitehte; * 50paknamtui-a' dingin haite, taitehte, kuangte, pakante, leh kham citak vutluahna; leh siangtho pen mun biakinn sung tawngnung kongkhakte leh biakinn sung kongkhakte-a' dingin kham bilte ahi hi. 51Tua ahih ciangin Kumpi Solomon in Topa' biakinn a hih nasep khempeuh kizo hi. Tua ciangin Solomon in a pa David' apsa nate, ngun, kham, leh nazatte paipihin Topa' biakinn sung vankoihna-ah tuate a koih hi. *