Kumpi Masate 15

 

Judah Kumpi Abijam' Ukna

(2 Khang Tangthu 13:1-22)

1Tu-in Nebat' tapa Kumpi Jeroboam' kum sawmlegiatna kumin Abijam in Judah tungah uk ding kipan hi. 2Amah in Jerusalem-ah kum thum sung uk hi. Ama nu' min Maakah hi a, Absalom' tanu ahi hi. 3Ama mai-a a pa' khialhna khempeuh amah in zui hi. A pusawn David a thuman bangin Topa a Pasian' tungah a lungsim thuman buplo hi. 4Ahi zongin David' hangin Topa a Pasian in Jerusalem-ah amah tapa khat pia a, ama khitah a tapa koihin Jerusalem kipsak hi. * 5Bang hang hiam cih leh Hit mi Uriah thu-ah cih simloh ama nuntak sung tawntung Topa' mit-ah David a manin gamta-in a thupiakte khat peuhpeuh panin amah piallo hi. * 6Tu-in Abijam' nuntak sung tawntung amah leh Jeroboam' kikalah kidona om hi. * 7Abijam' gamtatna a omlaite, leh a sep khempeuh, Judah Kumpite' Khang Tangthu Laibu sungah kigelh hi. Tua ciangin Abijam leh Jeroboam kikalah galkidona om hi. 8Tua ciangin Abijam si a, amaute in David khuapi sungah amah vui uh hi. Ama tangin a tapa Asa in uk hi.

Judah Kumpi Asa' Ukna

(2 Khang Tangthu 14:1-15; 15:16-19)

9Israel kumpi Jeroboam' kum sawmnihna kumin Asa in Judah tungah uk ding kipan a, 10amah in Jerusalem-ah kum sawmlilekhat sung uk hi. Ama pi' min Maakah hi a, Absalom' tanu ahi hi. 11Ama pupi David a gamtat bangin Topa' muhna-ah Asa a manin gamta hi. 12Amah in gamsung panin pasal paktat pawlte koihkhia-in a pate' bawlsa milim khempeuh khinkhia hi. * 13Amah in Asherah milim dingin a kibawl a kihhuai milim khat nei ahih manin kumpinu' nu hihna panin a pi Maakah zong khinkhia hi. Tua hi a, Asa in tuanu' milim phukin Kidron lui-ah a hal hi. 14Ahih hangin mualtunga biaknate kilakhia lo hi. Ahi zongin ama hun sung khempeuh Asa' lungsim Topa' tungah thuman bup hi. 15Tua ciangin amah in a pa' apsa letsongte leh ama apsa letsongte, ngun, kham, leh nazatte Topa' biakinn sungah a paipih hi.

Benhadad tawh Asa' Kipawlna

(2 Khang Tangthu 16:1-14)

16Amau' hun sung tawntung Asa leh Israel kumpi Baasha kikalah galkidona om hi. 17Judah a sim dingin Israel kumpi Baasha kuanto a, Judah kumpi Asa kiang pan kuamah paikhia theilo, kuamah a tum theihlohna dingin Ramah khua a lam hi. 18Tua ciangin Asa in Topa' biakinn sung vankoihna leh kumpipa inn vankoihna sungah a omlai ngun leh kham khempeuh la-in ama nasemte' khutsungah tuate a pia hi. Tua ciangin kumpi Asa in Damaskas-ah a teng, Syria kumpi, Hezion' tapa Tabrimmon, a tapa Benhadad kiangah tuate puak a, 19“Ka pa leh na pa mah bangin kei leh nang kikalah kipawlna khat omsak ni. Ngun leh kham letsong nangma tungah kong puak hi. Keima kiang panin amah a nungkik theihna dingin Israel kumpi Baasha tawh na kipawlna va sutat in,” a ci hi. 20Tua ciangin Benhadad in Kumpi Asa' thu mang a, Israel khuapite a sim dingin a galkap a ukte sawlin, Ijon, Dan, Abelbethmaakah, leh Khinneroth khempeuh, Naftali gam khempeuh tawh a zo hi. 21Baasha in tua thu a zak ciangin Ramah a lam khawlin Tirzah-ah om hi. 22Tua ciangin kumpi Asa in Judah gam khempeuhah thu genzakna khat bawl a, kuamah pengloin a milipin Baasha in khua lamna-a a zat Ramah suangte leh a singte a puakhia dingin a sawl hi. Tua ciangin kumpi Asa in tuate tawh Benjamin mite' khua Geba leh Mizpah khua a lam hi. 23Tu-in Asa' gamtatna a omlaite khempeuh, ama thahatna khempeuh, ama sep khempeuh, leh ama lam khuapite, Judah Kumpite' Khang Tangthu Laibu sungah kigelh hi. Ahih hangin a teek ciangin a khete-ah natna khat a nei hi. 24Tua ciangin Asa si a, a pupi David khuapi sungah a pate tawh kivui hi. Tua ciangin ama tangin a tapa Jehoshafat in a uk hi.

Israel Kumpi Nadab' Ukna

25Judah kumpi Asa' kum nihna kumin Jeroboam' tapa Nadab in Israel tungah uk ding kipan a, amah in Israel tungah kum nih sung uk hi. 26 Topa' muhna-ah amah a sia gamta a, a pa' khekhap mah tawnin, Israel a khialhsakna ama khialhna mah a zui hi.

27Issakhar minam Ahijah' tapa Baasha in Nadab sawmsim hi. Baasha in Filistia-te' khua Gibbethon-ah amah sattuk hi. Nadab leh Israel khempeuh in Gibbethon umcihin a om laitakun a thah ahi hi. 28Tua ahih ciangin Judah kumpi Asa' kum thumna kumin Baasha in Nadab that a, Nadab tangin amah in a uk hi. 29Amah kumpi ahih phetin Jeroboam' innkuan khempeuh that hi. Topa in Shiloh khuami a nasempa Ahijah tung tawnin a gensa bangin a vekpi-in a suksiat khit dongin mi khat zong Jeroboam' innkuan-ah nusialo hi. * 30Tua pen ama khialhna leh Israel a khialhsakna ahi Jeroboam' khialhnate hang leh Israel Pasian, Topa a hehsakna hang ahi hi.

31Tu-in Nadab' gamtatna a omlaite, leh a sep khempeuh, Israel Kumpite' Khang Tangthu Laibu sungah kigelh hi. 32Amau' hun sung khempeuh Asa leh Israel kumpi Baasha kikalah galkidona a om hi.

Israel Kumpi Baasha' Ukna

33Judah kumpi Asa' kum thumna kumin Ahijah' tapa Baasha in Israel khempeuh tungah Tirzah panin uk ding kipan a, kum sawmnihleli sung a uk hi. 34 Topa' muhna-ah amah a sia gamta a, Jeroboam' khekhap mah tawnin, Israel a khialhsakna ama khialhna mah a zui hi.