Thupatna

Kumpi Masate Laibu sungah Israel mite in kumpi a neih a kipatna thu Samuel Laibute sungah a kigelh thute kizomto hi. Hih laibu pen khen thum bang kisuah thei hi.

1. Solomon in Israel gam leh Judah gam a uk dingin a pa' za a laihna leh a pa David a sihna thu.

2. Solomon' ukna leh a nasep zawh teng. Jerusalem khua sungah Biakinnpi a lamna thu phawkhuai diak hi.

3. Israel mite leilu lam leh leitaw lamah khen nih a phakna, leh Jesuh' suah ma kum za kua kim ciangdong amau a uk kumpite' thu.

Kumpi Masate Laibu leh Kumpi Nihnate Laibu-te sungah kumpite pen mihoih leh mi hoihlo ahihna thu Pasian' tungah a thutakna uh tawh kikhen thei hi. Pasian' tungah a thutakte in a maa uh nawt a, milim bia-in a thumanglote in siatna thuak uh hi. Leilu lam gam a uk kumpite khempeuh a gina khat zong omlo a, leitaw lam Judah gam a uk kumpite ahih leh a gina leh a ginalo kihelkim hi.

Kumpi Masate Laibu sungah Topa' kamsangte kilang phadiak hi. Amaute in Pasian-a' dingin hangtakin thu gen uh a, milim a biaklohna ding uh leh Pasian' thu a man'na ding uh hilhkhol hi. A lian 18 sungah a kigelh, Pasian' kamsang Elijah leh Baal siampite' kidemna thu phawkhuai phadiak hi.

Tom Lakna
David' uk hun a beina thu    1:1—2:12
Solomon kumpi a suahna    2:13-46
Solomon' ukna    3:1—11:43
         1. A uk hun masa sung    3:1—4:34
         2. Biakinn a kilamna    5:1—8:66
         3. A hun nunung lam    9:1—11:43
Kumpi gam khen nih a phakna    12:1—22:53
         1. Leilu lama om minamte' lehpeina    12:1—14:20
         2. Leitaw lama om Judah gam leh leilu lama om Israel-te' kumpite' thu    14:21—16:34
         3. Kamsang Elijah thu    17:1—19:21
         4. Israel Kumpi Ahab thu    20:1—22:40
         5. Judah kumpi Jehoshafat leh Israel kumpi Ahaziah thu    22:41-53

Kumpi Masate 1

 

Abishag in David' Na Sem

1Tu-in Kumpi David teekin kum tam ta hi. Amaute in amah puan a silhsak uh hangin a khua lum theilo hi. 2Tua ahih ciangin a nasemte in ama kiangah, “Ka to kumpipa-a' dingin nungakno khat kizong hen la, amah in kumpipa enin amah a kemnu hita hen. Ka to kumpipa a khua a lum theihna dingin na ang sungah tuanu lum hen,” a ci uh hi. 3Tua ahih ciangin amaute in Israel gamsung khempeuhah nungak melhoih khat zong uh a, Shunem mi Abishag mu-in, kumpipa kiangah amah paipih uh hi. 4Tua nungak melhoih mahmah a, kumpipa a kemnu suakin ama na a sem hi. A lupkhawm uh hangin kumpipa in amah hih zolo hi.

Adonijah in Kumpi Tokhom Suan

5Tu-in David in Haggith tawh a neih a tapa Adonijah amahmah kiliansak tawmin, “Keimah, kumpi ka hi ding hi,” a ci hi. Amah in ama-a' dingin leengte leh sakol tung tuangte, leh ama mai-ah a tai ding mihing sawmnga vaihawm hi. * 6A pa David in, “Bang hangin tua bang tua bangin gamta na hi hiam?” ci-a dotna tawh khatvei beek amah tai ngeilo hi. Amah pen a melhoih mahmah mi khat zong ahi hi. Amah pen Absalom zoma suak ahi hi. 7Amah in Zeruiah' tapa Joab leh siampi Abiathar tawh vaihawm hi. Amaute in Adonijah zui-in amah pan'pih uh hi. 8Ahih hangin siampi Zadok, leh Jehoiada' tapa Benaiah, leh David' mi a thahatte in Adonijah pan'pihlo uh hi.

9Adonijah in Enrogel gei-a om Gulpi' Suangpi kiangah tuute, bawngtalte, leh ganno thaute biakna-in pia-in, amah in kumpipa' tapate ahi a sanggamte khempeuh leh Judah gam kumpi uliante khempeuh sam a, 10ahih hangin kamsangpa Nathan ahi a, Benaiah ahi a, mi thahatte ahi a, a sanggampa Solomon ahi zongin samlo hi.

11Tua ciangin Nathan in Solomon' nu Bathsheba kiangah, “Haggith' tapa Adonijah kumpi suak khinin, David in tua thu a theihlohna thu za nailo na hi hiam? * 12Tua ahih ciangin tu-in hong pai in. Nangma nuntakna leh na tapa Solomon' nuntakna na suahtaksak theihna dingin nang tungah ngaihsutna kong pia ding hi. 13Thakhatin Kumpi David kiangah pai-in ama tungah, ‘Ka to kumpipa in na nasemnu' tungah hong kiciamin, “Na tapa Solomon pen keima nungah maangin, keima kumpi tokhom tungah tu ding hi,” ci hilo na hi hiam? Tua ahih ciangin bang hangin Adonijah kumpi suak ahi hiam?’ ci in. 14Tua ciangin kumpipa kiangah thu na gen laitakin kei zong nangma nungah hong pai-in nangma thugen teng kong pan'pih ding hi,” a ci hi.

15Tua ahih ciangin Bathsheba a inndei sung kumpipa kiangah va pai hi (tu-in kumpipa teek mahmah a, Shunem mi Abishag in kumpipa' na sem hi.) 16Bathsheba kunin kumpipa tungah zahtakna bawl a, kumpipa in, “Bang deih na hi hiam?” a ci hi. 17Tuanu in ama kiangah, “Ka topa aw, na nasemnu tungah Topa na Pasian' min tawh kiciamin, ‘Na tapa Solomon pen keima nungah maangin, keima kumpi tokhom tungah tu ding hi,’ na ci hi. 18Tu-in en in, ka to kumpipa in na theihloh hangin, Adonijah kumpi ahi hi. 19Amah in biakna-in bawngtalte, ganno thaute, leh tuute, tampi tak pia khin a, kumpipa' tapate khempeuh, siampi Abiathar, leh galkapte a ukpa Joab sam a, ahih hangin amah in na nasempa Solomon samlo hi. 20Ka to kumpipa aw, tu-in nangma nungah ka to kumpipa' tokhom tungah kua tu ding, ci-a amaute kiangah na gen ding ngakin Israel-te khempeuh in nang hong en uh hi. 21Tua bang hi kei leh ka to kumpipa na bei ciangin kei leh ka tapa Solomon a khialin a hong kiseh hun hong tung ding hi,” a ci hi.

22Kumpipa tawh tuanu kiho-in a om laitakin kamsangpa Nathan hong tum hi. 23Kumpipa kiangah, “Hih lai-ah kamsangpa Nathan om hi,” ci-in a kigen hi. Kumpipa mai-ah amah hong pai ciangin a mai leilam ngatin kumpipa' mai-ah a kun hi. 24Tua ciangin Nathan in, “Ka to kumpipa aw, ‘Keima nungah Adonijah maangin ka kumpi tokhom tungah tu ding hi,’ ci na hi hiam? 25Bang hang hiam cih leh tuni-in amah paisuk khinin, bawngtalte, ganno thaute, leh tuute, tampi tak biakna-in pia a, kumpipa' tapate khempeuh, galkapte a ukpa Joab, leh siampi Abiathar sam hi. Amaute in ama-a' ding pawi bawl uh a, ‘Kumpi Adonijah a khan' sau hen!’ ci uh hi. 26Ahih hangin na nasempa keimah, leh siampi Zadok, leh Jehoiada' tapa Benaiah, leh na nasempa Solomon, amah in hong samlo hi. 27Ka to kumpipa in hih thu thukimpihin, nangma khit ciangin ka to kumpipa' tokhom tungah kua tu ding cih thu na nasem kote' kiangah hong im na hi hiam?” a ci hi.

Solomon Kumpi Kisuaksak

28Tua ciangin Kumpi David in dawngin, “Bathsheba ka kiangah hong samkik in,” a ci hi. Tua ahih ciangin kumpipa omna-ah tuanu hong pai-in, kumpipa' mai-ah a ding hi. 29Kumpipa kiciamin, “Haksatna khempeuh panin kei a hong honkhia Topa a nungta ahih mah bangin, 30nangma tungah Topa, Israel Pasian' min tawh hong kiciamin, ‘Keima nungah ka tapa Solomon maang ding a, keima tangin ka kumpi tokhom tungah tu ding hi,’ ka cihsa mah bangin, tuni-in zong ka cikik hi,” a ci hi. 31Tua ciangin Bathsheba in leilam maingatin kunin kumpipa tungah zahtakna bawl a, “Ka to kumpi David nungta tawntung ta hen!” a ci hi.

32Tua ciangin Kumpi David in siampi Zadok, kamsang Nathan, leh Jehoiada' tapa Benaiah samsak hi. Tua ahih ciangin kumpipa' mai-ah amaute hong pai uh hi. 33Kumpipa in amaute kiangah, “Na topa' nasemte paipih un la, ka tapa Solomon keima la-sakol tungah tuangsakin Gihon-ah paipihsuk un. 34Israel-te' tungah kumpi-in tua lai munah siampi Zadok leh kamsang Nathan sathau nilhsak un. Tua ciangin peengkul tum un la, ‘Kumpi Solomon khan'sau hen!’ ci un. 35Tua ciangin ama nungah note nong pai ding uh a, amah hong pai-in ka kumpi tokhom tungah hong tu ding hi; bang hang hiam cih leh keima tangin amah kumpi hi ding hi. Israel leh Judah a ukpa dingin amah ka seh khinzo hi,” a ci hi. 36Tua ciangin Jehoiada' tapa Benaiah in dawngin, “Hi ta hen! Topa, ka to kumpipa' Pasian in tua bangin kipsak ta hen. 37 Topa in ka to kumpipa a ompih mah bangin Solomon zong ompih hen la, ka to Kumpi David' tokhom sangin ama tokhom lianzaw sak hen,” a ci hi.

38Tua ahih ciangin Zadok, kamsang Nathan, Jehoiada' tapa Benaiah, leh Khereth mite leh Peleth mite paisukin Kumpi David' la-sakol tungah Solomon tuangsak uh a, Gihon-ah amah paipih uh hi. 39Tua lai-ah siampi Zadok in puanbuk panin sathau biing la-in Solomon a nilh hi. Tua ciangin amaute in peengkul tum uh hi. Tua ciangin mi khempeuh in, “Kumpi Solomon khan'sau hen!” a ci uh hi. 40Tua ciangin mi khempeuh ama nungah pai-in tamngaikop tum uh a, nakpi takin lungdam uh a, amau' gamlumna in lei a thawnkham hi.

41Adonijah leh amah tawh a om leenglate khempeuh in a pawi bawl a man khit uh ciangin hih thu za uh hi. Joab in peengkul aw a zak ciangin amah in, “Khuapi sungah hih gamlumna bang a cihnopna ahi hiam?” a ci hi. 42Amah a kampau laitakin, siampi Abiathar' tapa Jonathan hong pai hi. Tua ciangin Adonijah in, “Hong tum in; bang hang hiam cih leh nang migina na hi a, thuhoih nong puak hi,” a ci hi. 43Jonathan in Adonijah dawngin, “Hilo hi; bang hang hiam cih leh i to kumpi David in kumpi-in Solomon bawl khin hi. 44Kumpipa in amah tawh siampi Zadok, kamsang Nathan, leh Jehoiada' tapa Benaiah, leh Khereth mite leh Peleth mite sawl khin hi. Amaute in kumpipa' la-sakol tungah amah tuangsak khin uh hi. 45Siampi Zadok leh kamsang Nathan in Gihon-ah kumpi-in amah sathau nilh khin uh hi. Tua lai panin amaute lungdamin ciahkhin uh ahih manin khuapi sung gamlum hi. Nangma zak pen hih gamlumna ahi hi. 46Tu-in Solomon in kumpi tokhom luah khinta hi. 47Tua thamloin kumpipa' nasemte i to Kumpi David tungah lungdamna a ko dingin pai uh a, ‘Na Pasian in nangma min sangin Solomon' min a thangzaw-in bawl hen la, nangma tokhom sangin ama tokhom a lianzaw-in bawl ta hen,’ ci uh hi. A lupna tung panin kumpipa mahmah zong kun hi. 48Kumpipa in zong, ‘Keima mit-a ka muhin keima suanlekhakte khat ka kumpi tokhom tungah a tu dingin tuni-in a pia Topa, Israel Pasian in thupha ngah ta hen,’ ci hi,” a ci hi.

49Tua ciangin Adonijah' leenglate khempeuh ling uh a, dingin amau' mun ciatah a ciah uh hi. 50Tua ciangin Adonijah in Solomon kihta hi. Amah pai-in biakna tau kite pom hi. 51Tua ciangin Solomon kiangah, “Adonijah in Kumpi Solomon hong kihta hi. Amah in biakna tau kite lenin, ‘Amah in a nasempa namsau tawh a thahlohna ding kei tungah Kumpi Solomon hong kiciam masa hen,’ ci hi,” kici hi. 52Tua ciangin Solomon in, “Amah in a kilawm mi ahihna a lahtel theih leh ama samzang khat zong leilakah kialo ding a, ahi zongin ama sungah gitlohna a kimuh leh amah si ding hi,” a ci hi. 53Tua ahih ciangin Kumpi Solomon in mi sawl a, amaute in zong biakna tau panin amah paikhiatpih uh hi. Amah hong pai-in Kumpi Solomon' tungah zahtakna bawl hi. Tua ciangin Solomon in ama kiangah, “Na inn-ah ciah in,” a ci hi.