Kumpi Masate 10

 

Solomon Kiangah Sheba Kumpinu Hawh

(2 Khang Tangthu 9:1-12)

1Tu-in Sheba kumpinu in Topa' min tawh kisai-in Solomon' minthan'na a zak ciangin thudotna haksate tawh amah a ze-et dingin hong pai hi. 2Amah nungzui honpi, a namtui nate a pua kalaohte, kham tampi, leh suangmanpha tampi tawh Jerusalem-ah hong pai a, Solomon' kiangah a tun' ciangin amah in a lungsima om khempeuh Solomon tungah a gen hi. 3Tua ciangin Solomon in ama dotna khempeuh dawng hi. Kumpipa in ama tungah a gentel theihloh, haksa lua a sak bangmah omlo hi. 4Sheba kumpinu in Solomon' pilna, ama lamsa a inn, 5a sabuai-ah a an, a uliante' omzia, leh a nasemte' etna, a puante uh, a an piate, leh Topa' biakinn-ah a piak meihal biaknate khempeuh a muh khit ciangin lamdang a sa mahmah hi.

6Tua ciangin amah in kumpipa kiangah, “Ka gamsung panin nangma thu leh na pilna ka zak a kigen thute man mahmah hi. 7Kei hong pai-in keima mit in a muh mateng a kigente ka um kei hi. Ahi zongin alang zong kei tungah hong kigenlo na hi a, na pilna leh na daupaina in ka zak thute vuknelh hi. 8Na zite a hampha mahmah hi a, na mai-ah ding tawntungin na pilna a za hih na nasemte zong hampha mahmah uh hi. 9Nang tungah lungdamin Israel kumpi tokhom tungah nang a hong koih Topa na Pasian in thupha ngah ta hen! Topa in Israel it tawntung ahih manin nangmah in thutang leh thuman na sepkhiat theihna dingin amah in kumpi-in nang hong bawl hi,” a ci hi. 10Tua ciangin amah in kumpipa tungah kham talen za leh sawmnih, leh a namtui nate tampi tak, leh suangmanphate a pia hi. Sheba kumpinu in Kumpi Solomon tungah a piak hih banga a tam a namtui nate hong pai ngei nawnlo hi. *

11Tua thamloin Ofir panin kham hong pua Hiram' teembaw honte in Ofir panin cingsing leh suangmanpha tampi tak hong pua uh hi. 12Tua ciangin kumpipa in cingsingte Topa' biakinn leh kumpipa' innkhuamte, lasate-a' dingin laia lasakna leh harp lasakna-in bawl hi. Tuni dongin tua bang cingsing hoihte hong tungkik ngeilo, kimu ngei nawnlo hi.

13Tua ciangin Kumpi Solomon in citna tawh ama tungah a piak banah ama deih a nget khempeuh zong Sheba kumpinu tungah a pia hi. Tua ahih ciangin amah leh a nasemte a gam uhah a ciahkik uh hi.

Solomon' Hauhna leh Minthan'na

(2 Khang Tangthu 9:13-28)

14-15Tu-in sumbawlte leh sumbukte, Arabia kumpi khempeuh leh gamsung a ukte tung panin a ngahte banah kum khatin Solomon tungah a tung kham a gihna pen talen za guk leh sawmguk leh guk ahi hi. 16Kumpi Solomon in a kiseek kham tawh kibawl lum lianpi za nih bawl a, lum khatah kham shekel za guk bei hi. 17Tua ciangin amah in a kiseek kham tawh kibawl lum za thum bawl a, lum khat ciangin kham mina thum bei hi. Tua ciangin kumpipa in Lebanon Tulak Inn a kici sungah tuate koih hi. 18Kumpipa in saiha kumpi tokhom a lian khat zong bawl a, kham hoihpente tawh tua tokhom zut hi. 19Kumpi tokhom in kahlei cial guk nei-in, kumpi tokhom nungah bawngno lutang khat om a, a tutna pang tuakah ban ngakna omin ban ngaknate pangah humpinelkai nih ding a, 20kahlei cial gukte' mong ciatah khat ciat a om humpinelkai sawmlenih ding hi. Kumpi gamsung khat peuhpeuhah tua tawh a kibang kibawl ngeilo hi. 21Kumpi Solomon' tuidawnna haite khempeuh kham hi a, Lebanon Tulak Inn sunga om haite khempeuh kham citak hi a, khat zong ngun hilo hi. Solomon' hun lai-in ngun bangmahin kingaihsun lo hi. 22Bang hang hiam cih leh kumpipa in Hiram' teembaw honte tawh Tarshish teembaw honkhat tuipi-ah a pai nei hi. Tarshish teembaw honte kum thumin khatvei hong pai-in kham, ngun, saiha, zawngmaw, leh utongte hong puak zel hi.

23Tua bangin Kumpi Solomon in hauhna leh pilna tawh leitung kumpi khempeuh khumkhelh hi. 24Tua ciangin Pasian in ama lungsim sunga a koih ama pilna a ngai dingin leitung mi buppi in Solomon' omna zong uh hi. 25Amaute khempeuh in letsong, ngun leh kham tawh kibawl nate, puante, myrrh paknamtui, a namtui nate, sakolte, leh la-sakolte, a kumkumin tampi tak hong puak uh hi.

Sakolte leh Leengte tawh Solomon' Sumbawlna

(2 Khang Tangthu 1:14-17; 9:25-28)

26Tua ciangin Solomon in leengte leh sakol tung tuangte khawm hi. Amah in leeng tul leh za li leh tuan'na sakol tul sawm leh tul nih nei a, amah in tuate, leeng khuapite leh Jerusalem-ah zattawm dingin a koih hi. * 27Kumpipa in Jerusalem-ah suang bangin ngun olsak a, amah in shefelah theithek sing bangin taamtak sing tamsak hi. * 28Solomon' sakol lakte Egypt leh Kue pan hi a, kumpipa' sumbawlte in Kue-ah a man pia-in tuate ngah uh hi. * 29Egypt panin leeng khat ciangin ngun shekel za guk, sakol khat ciangin za leh sawmnga-in kingah hi. Tua ahih ciangin kumpipa' sumbawlte in Hit kumpite leh Syria kumpite khempeuh tungah zuakkhia uh hi.