Khang Tangthu Masa 23

 

1Tu-in David teekin kum tampi pha a, amah in Israel tungah kumpi-in a tapa Solomon a koih hi. *

Levi mite leh Siampite a Kisehkhenna leh a Nasepte uh

2David in Israel makai khempeuh leh siampite leh Levi mite a khawm hi. 3Levi mite kum sawmthum panin a tungsiah teng kisim a, a vekpi-in pasal tul sawmthum leh tul giat pha hi. 4David in, “Hihte sung panin tul sawmnih leh tul li in Topa' biakinn sungah nasep uk ding a, tul guk pen maangte leh thukhente hi ding a, 5tul li kongcingte, leh tul li in phatna dinga ka bawlsa lasaknate tawh Topa tungah phatna pia ding uh hi,” a ci hi. 6Tua ciangin David in Levi mite a behbehin pawl thum suah a, tuate pen: Gershom pawl, Kohath pawl, leh Merari pawl ahi uh hi.

7Gershom' tapate: Ladan leh Shimei ahi uh hi. 8Ladan' tapate: A ukpi Jehiel, leh Zetham, leh Joel, thum pha uh hi. 9Shimei' tapate: Shelomoth, Haziel, leh Haran, thum pha uh hi. Hihte pen Ladan' beh lutangte ahi uh hi. 10Tua ciangin Shimei' tapate: Jahath, Zina, Jeush, leh Beriah ahi uh hi. Hih lite pen Shimei' tapate ahi uh hi. 11Jahath a ukpi hi-in, Zina a nihna ahi hi. Ahih hangin Jeush leh Beriah-te in tapa tampi neilo uh ahih manin innkuan khat kisuak sakin sim khatin kisim khawm uh hi.

12Kohath' tapate: Amram, Izhar, Hebron, leh Uzziel, li pha uh hi. 13Amram' tapate: Aaron leh Moses ahi uh hi. Amah leh a tapate in Topa' mai-ah paknamtui a hal tawntung ding leh ama na semin ama min tawh thupha a piak tawntung theihna dingin a siangtho pen nate a ap dingin Aaron kituam koih hi. * 14Ahih hangin Pasian' mipa Moses' tapate ahih leh Levi minamte lakah kisim hi. 15Moses' tapate: Gershom leh Eliezer ahi uh hi. 16Gershom' tapate lakah Shebuel a ukpi ahi hi. 17Eliezer' tapa Rehabiah zong a ukpi ahi hi. Eliezer in tapa dang neilo a, ahih hangin Rehabiah' tapate tam mahmah hi. 18Kohath' tapa nihna Izhar' tapate lakah Shelomoth a ukpi ahi hi. 19Kohath' tapa thumna Hebron' tapate lakah: Jeriah a ukpi, Amariah a nihna, Jahaziel a thumna, leh Jekameam a lina ahi hi. 20Kohath' tapa lina Uzziel' tapate lakah: Mikah a ukpi, leh Isshiah a nihna ahi hi.

21Merari' tapate: Mahli leh Mushi ahi hi. Mahli' tapate: Eleazar leh Kish ahi hi. 22Eleazar in tapa neiloin si a, tanu bek nei hi. Amau' tanau, Kish tapate in amaute ten'pih uh hi. 23Mushi' tapate: Mahli, Eder, leh Jeremoth, thum pha uh hi.

24Hihte pen Topa' biakinn nasepna-ah na a sem ding, kum sawmnih panin a tungsiah, a milipin a minin a mi phazah zui-in a kiciamtehna bangin beh lutangte, a behbehin Levi suante ahi hi. 25Bang hang hiam cih leh David in, “Israel Pasian, Topa in a mite tungah lungnopna piazo a, Jerusalem-ah amah om tawntung ta hi. 26Tua ahih ciangin Levi mite in puanbuk hita leh tua tawh kisai nasepna ding nate khat peuhpeuh hita leh a puak ding uh kisam nawnlo hi,” a ci hi. * 27Bang hang hiam cih leh David' thupiakna a nunung pen tawh a kisim hihte pen kum sawmnih panin a tungsiah Levi mi a phazah ahi hi. 28“Ahih hangin amaute' nasep ding pen Topa' biakinn nasepna-ah Aaron' suante huhin, biakinn tualte leh biakinn deite kemin, biakna na khempeuh a siangtho sak ding, leh Pasian' biakinn nasepna-ah hih ding khat peuhpeuh a sem ding uh ahi hi. 29Ompihna Anlum, an tawh biakna dingin annel, silngo sawhloh anlum moh, a ki-em piakna, sathau tawh a kihel piakna, leh a tam tehna ahih kei leh a lian tehna nasep khempeuh zong a huh ding uh ahi hi. 30Tua ciangin amaute zingsang simin ding ding uh a, lungdamna ko-in Topa phatin, nitakin zong tua bangmahin hih ding uh a, 31a mal zah a kisam bangin Sabbath nite, Khadet nite, leh pawi nite-in Topa tungah meihal biakna a kipiak peuhpeuh ciangin a tawntungin Topa' mai-ah om ding uh hi. 32Tua bangin amaute in kikhopna puanbuk leh biakinn kemin, Topa' biakinn nasepna-ah amau' behte ahi Aaron' suante huh ding uh hi,” a ci hi. *