Khang Tangthu Masa 14

 

Hiram in David a Theihna

(2 Samuel 5:11-12)

1Tua ciangin Taia kumpipa Hiram in David kiangah kamtaite, taamtak singte, ama-a' dingin inn khat a lamsak dingin leilesuang innlam a siamte, leh khutsiamte zong a puak hi. 2Tua ciangin David in Israel-te tungah kumpi-in Topa in amah a kipsak khitna leh ama mi Israel-te' hangin ama kumpi gam nakpi takin a lianin a kibawlna a phawktel hi.

Jerusalem-ah David' Tate Suak

(2 Samuel 5:13-16; 1 Khang Tangthu 3:5-9)

3David in Jerusalem-ah zi nei thuahin tapate leh tanute a nei hi. 4Jerusalem-ah a neih a tate' min: Shammua, Shobab, Nathan, Solomon, 5Ibhar, Elishua, Elpelet, 6Nogah, Nefeg, Jafia, 7Elishama, Beeliada, leh Elifelet ahi uh hi.

David in Filistia mite Zo

(2 Samuel 5:17-25)

8Israel mi khempeuh tungah kumpi-in David sathau a kinilhna thu Filistia mite in a zak uh ciangin David a zong dingin Filistia mi khempeuh kuanto uh hi. David in zong tua thu za ahih manin amaute a do dingin a kuankhia hi. 9Tu-in Filistia mite hong pai-in Refaim kuamsung a luh uh hi. 10Tua ciangin David in Pasian kiangah thu dong a, “Filistia mite a do dingin ka kuanto ding hiam? Keima khutsungah amaute nong pia ding hiam?” a ci hi. Tua ciangin Topa in ama kiangah, “Kuanto in; nangma khutsungah amaute kong pia ding hi,” a ci hi. 11Tua ciangin Baalperazim-ah David paito a, amah in tua lai-ah amaute a zo hi. Tua ciangin David in, “Tuikhang in a phulkhap bangin Pasian in keima khut tawh ka galte phukham hi,” a ci hi. Tua ahih ciangin tua mun a min Baalperazim kici hi. 12Filistia mite in tua lai-ah a pasian-te uh nusia uh a, David' thupiakna tawh tuate kihal hi.

13Tua ciangin Filistia mite hong kuanin kuam sung hong luhkik lai uh hi. 14David in Pasian kiangah thu a dotkik ciangin Pasian in ama kiangah, “Amaute' nungah na kuanto kei ding hi. Kual pai in la lungli kungte' galkhat lam panin amaute hih in. 15Lungli kungte dawnah kalsuan huging na zak ciangin galsim dingin pai in; bang hang hiam cih leh Filistia galkapte a vat dingin nangma mai-ah Pasian kuan khin hi,” a ci hi. 16Pasian in amah a thupiak bangin David gamta a, amaute in Gibeon panin Gezer ciangdong Filistia galkapte vatgawp uh hi. 17Tua ciangin David' minthan'na in gam khempeuh zel a, Topa in minam dang khempeuh tungah amah kihtakna a tungsak hi.