Khang Tangthu Masa 10

 

Saul leh A Tapate' Sihna

(1 Samuel 31:1-13)

1Filistia mite in Israel mite sim uh hi. Filistia mite mai-ah Israel mite tai uh a, Gilboa Mual tungah tuk zeizai uh hi. 2Filistia mite in Saul leh a tapate pha uh hi. Filistia mite in Saul' tapate Jonathan leh Abinadab leh Malkhishua that uh hi. 3Gal kidona in Saul neh mahmah a, thal tawite in amah pha-in liamsak uh hi. 4Tua ciangin Saul in a galvan puapa kiangah, “Na namsau dok in la tua tawh kei hong sun let in. Tua hi kei leh hih dawibia mite hong pai-in kei hong khelbawl khading hi,” a ci hi. Ahih hangin a galvan puapa in hih ngamlo hi; bang hang hiam cih leh amah lau mahmah hi. Tua ahih ciangin Saul in ama namsau la-in tua tungah puk hi. 5A galvan puapa in Saul a sihna a muh ciangin amah zong a namsau tungah kipuksuk sakin a si hi. 6Tua bangin Saul a si hi. Amah leh a tapa thumte leh a innkuan khempeuh a sikhawm uh hi. 7Kuam sungah a om Israel mite khempeuh in galkapte tai khinin, Saul leh a tapate a sihna a theih uh ciangin amaute in a khuapite uh nusia-in a tai uh hi. Tua ciangin Filistia mite hong pai-in tua khuate sungah a teng uh hi.

8A zing ciang, a kithatte' nate a hawkkhia dingin Filistia mite hong pai uh ciangin Saul leh a tapate Gilboa Mual tungah a sihna mu uh hi. 9Tua ciangin amaute in ama nate hawkkhia-in a lutang leh a galhiam la uh a, a milimte uh leh mite kiangah hih thuthak a ko dingin Filistia gamsung khempeuhah kamtaite a sawl uh hi. 10Amaute in amau' pasian' biakinn sungah ama galhiam koihin Dagon biakinn sungah ama lutang a suang uh hi. 11Ahih hangin Jabeshgilead mi khempeuh in Saul' tungah Filistia mite' hihsa thu khempeuh a zak uh ciangin 12a thahat mi khempeuh kithawi-in Saul leh a tapate' luanghawmte lakhia-in Jabesh-ah a paipih uh hi. Tua ciangin amaute in Jabesh-a tawsaw nuai-ah amaute' guhte vui uh a, ni sagih sung an a tang uh hi.

13Tua ahih ciangin Saul a thumanlohna hangin a si hi. Amah in Topa' thupiakna a zuihlohna, leh vankah khat thu dongin a lamlah ding a zon'na, * 14leh Topa' tung panin lamlahna a zon'lohna-ah Topa' tungah a thumanlo ahi hi. Tua ahih ciangin Topa in amah that a, Jessi' tapa David tungah kumpi gam a hei hi.