Ezekiel 39

 

1Topa Pasian in kei kiangah, “Mihing ahi Ezekiel aw, Gog mawhsakna thu gen in la, Topa Pasian in hih bangin ci hi, ci-in gen in: Meshek leh Tubal minamte a ukpipa Gog aw, kei pen nangma langkhatah a pang ka hi hi. 2Mundang khatah nang kong paisak ding a, leilu lam gam pek panin Israel mualtung gamah kong tun'pih ding hi. 3Tua lai mun panin na veilam khutah na tawi na thal hong betkhiatsakin, na taklam khutah na tawi na thaltangte zong kong betkhiatsak ding hi. 4Nang leh na galkap honte leh nang hong pan'pih minam khempeuhte pen Israel mualtung gamah na simang ding uh a, vasa nam khempeuh leh gamsate in na sa uh ne ding uh hi. 5Topa Pasian in hih thu gen khin ka hih manin gamlakah na tuk zeizai ding uh hi. 6Kuamah in nawngkaisak loin nuamtakin mite a om hithiatna Magog gamsung leh tuipi gei-a gamte ka hal ding a, tua ciangin Topa ka hihna thu mi khempeuh in hong thei ding uh hi. 7Keima mi Israel-te lakah ka min siangtho ka kitheisak ding a, keima min a dai dingin ka omsak nawn kei ding hi. Tua ciangin keimah pen a Siangtho, Israel-te' Pasian ahi Topa ka hihna thu minam khempeuh in hong thei ding uh hi,” hong ci hi.

8Topa Pasian in, “Tua ka gengen ni hong tung takpi ding hi. 9Israel gam khuapite-ah a teng mite kuankhia-in, tua a kinusia galhiamte ansing dingin khawm ding uh hi. Tua a kinusia lumte, thal leh thaltangte, molhtumte leh teipite, mei-in cih ding uh a, kum sagih sung kikhom ding hi. 10Amaute in mei cih dingin a kinusia galhiamte nei uh ahih manin gamlakah sing tom kullo ding a, tulakah sing phuk ding zong kisamlo ding hi. Amaute in amau' na a sutte' na sutin, a suksiatsakte' na suksiatsak ding uh hi. Topa Pasian in hih thu ka gen khin hi,” hong ci hi.

11 Topa in, “Hih thu hong pian' ni ciangin Israel gamsung Si Tuipi nisuahna lamah a om Khualzin Mite' Kuam a cihna sungteng, a kivuina dingun Gog ka pia ding hi. Gog leh a galkap honpite, tua lai munah kivui ding ahih manin khualzin mite' lampi khaktan ding a, tua mun pen, ‘Gog Galkapte' Kuam,’ kici ding hi. 12Israel mite in a gamsung uh a sian'sak kikna dingin misi vuina-in kha sagih sung hun bei ding hi. 13Gamsunga om mi khempeuh in misi vuina-ah huh ding uh a, tua bangin a huhna hangun ka gualzawh ni-in pahtawina ngah ding uh hi. Topa Pasian ahi keimah in hih thu ka gen khin hi. 14Kha sagih a cin' khit ciangin, a gamsungteng uh a siangthosak theihna dingun a kimangngilhkha siluanghawmte zongin a phum dingin gamsungteng a zong kawikawi ding mi pawlkhat a seh ding uh hi. 15Gamsungteng a zon' kawikawina uhah misi guh a muh simun, misi vuite in hong tawmin Gog Galkapte' Kuam-ah a vui hun ma sungteng uh a kitheihna dingin a gei-ah ciamtehna khat bawl pahpah uh hi. 16(Tua galkap honpite' min tamin a gei-ah khuapi khat om hi.) Tua bangin gamsung siangsak ding uh hi,” hong ci hi.

17Topa Pasian in kei kiangah, “Mihing ahi Ezekiel aw, amaute-a' dingin ka bawlsak biakpiakna sa a ne dingin mun khempeuh panin vasa khempeuh leh ganhing khempeuh hong paina dingun sam in. Israel mualtung gamah pawi lianpi khat om ding a, a duh zahzahun sa ne-in si dawn ding uh hi. 18Tuutalte, tuunote, keelte leh bawngtal thaute a kigawh bangin a kigo ahi galkapte' sate ne-in, leitung gam ukte' site a dawn ding uh ahi uh hi. 19Biakna dinga gawh bangin hih mite ka gawh ciangin vasate leh ganhingte in a nekzawh zahzah uh a thaute ne ding uh a, a kham dongun a si dawn ding uh hi. 20Amaute in ka sabuai tungah, sakolte leh a tunga tuangte, galkapte leh galkapmangte' sa, a nekzawh zahzah uh ne ding uh hi. Topa Pasian in hih thu ka gen khin hi,” hong ci hi. *

21 Topa in kei kiangah, “Minamte lakah ka minthan'na ka lak ding a, thu a tangin ka khennate ka sepkhiat theihna dingin ka vangliatna ka zatna dan amaute tungah ka lak ding hi. 22Tua khita kipanin amaute' Topa Pasian ka hihna thu, Israel mite in hong thei ding uh hi. 23Tua ciangin kei tungah hong khialhna uh hangin Israel mite sal suak uh a, amaute nungngatin, a galte uh khutsungah pia-in galsungah a vekun a sisak ka hihna, 24leh amaute' nitna leh a gitlohna uh tawh kituakin amaute tungah bawlin, amaute a nungngat ka hihna thu, minam dangte in thei ding uh hi,” hong ci hi.

25Topa Pasian in kei kiangah, “Tu-in Jakob suanlekhak Israel mite ka hehpih ding a, amaute a cithei-in ka bawlkik ding hi. Keima min siangtho ka hu ta ding hi. 26Amaute' gamsungah kuamah in suloin lungmuangin a omkik uh hun ciangin, kei hong lehbawlnate uh leh a mindainate uh mangngilh theita ding uh hi. 27Kei a siangtho ka hihna thu, minam tampite tungah ka lahna dingin a galte uh a omna gamdang khempeuh panin amaute lakhia-in ka kaikhawm kik ding hi. 28Tua ciangin, minam dangte' khutsungah salin amaute puakin, tua khit ciangin amaute khat zong sitloin kaikhawm kikin a gamsung uh ka tun'pih kimna hangin amaute' Topa Pasian ka hihna thu, keima mite in hong thei ding uh hi. 29Israel mite tungah ka kha ka sung ding a, amaute ka nungngat nawn kei ding hi. Topa Pasian in hih thu ka gen khin hi,” hong ci hi.