Thukhente 6

 

Gideon a Kisapna

1 Topa' muhna-ah Israel-te a sia gamta uh a, Topa in Midian-te' khutsungah amaute kum sagih sung a pia hi. 2Israel-te tungah Midian-te gualzo uh hi. Midian-te' kiang panin a bukna dingun leihawmte leh munmuan'huaite a bawl uh hi. 3Bang hang hiam cih leh Israel-te in khai a tuh peuhmah uh ciangin Midian-te leh Amalek mite leh Nisuahna lam mite hong pai-in amaute sim uh hi. 4Amaute a simna dingun giahphual satin Gaza kiim ciangciang dong lei pana piangte susia uh a, Israel mite a nuntakna ding bangmah nusia loin, tuu ahi a, bawngtal ahi a, la ahi zongin sit neilo uh hi. 5Bang hang hiam cih leh amaute a ganhingte leh a puanbukte uh tawh kauphe honpi bangin tamin hong pai uh a, amau leh a kalaohte uh kisim zolo hi. Tua ahih ciangin amaute hong tun' ciangin gamteng beisak uh hi. 6Midian-te' hangin Israel-te kiniamkoih mahmah a, Israel mite in Topa' tungah huhna ngenin kiko uh hi.

7Midian-te' hangin Israel mite Topa' tungah a kiko uh ciangin, 8 Topa in Israel mite kiangah kamsang khat a sawl hi. Amah in amaute kiangah, “Israel-te' Pasian, Topa in hih bangin ci hi: Salsuahna Egypt panin note kong paikhiatpih hi. 9Egypt mite leh note hong nengniam mi khempeuh khutsung panin note kong honkhia a, note' mai-ah amaute hawlkhia-in, amau' leitang note kong pia hi. 10Tua ciangin note kiangah, ‘Kei pen Topa na Pasian uh ka hi hi. Na ten'na uh Amor mite' pasian-te zahtakna na pia kei ding uh hi,’ kong ci hi. Ahih hangin note in ka thu na ngai kei uh hi, ci hi,” a ci hi.

11Tua ciangin Ofrah khua-ah Topa' vantung mi hong pai a, Abiezer mi Joash neihsa tawsaw nuai-ah hong tu hi. Tua laitakin Joash' tapa Gideon in Midian mite' muhloh dingin leenggah sukna-ah mangbuh cil simin na om hi. 12 Topa' vantung mi ama tungah kilangin ama kiangah, “ Topa in nang hong ompih hi, a thahat a vanglian mipa aw,” a ci hi. 13Gideon in ama kiangah, “Kong thum hi, sia aw, Topa in kote hong ompih ahih leh, bang hangin hih thu khempeuh ko tungah hong tung ahi hiam? Ka pate un kote tungah hong genin, ‘ Topa in Egypt panin eite hong paipih hilo ahi hiam?’ a cih uh a lamdang ama sepnate khempeuh koi-ah om ta ahi hiam? Ahih hangin tu-in Topa in kote hong paaikhia-in Midian-te' khutsungah hong pia khin hi,” a ci hi. 14Tua ciangin ama lamah Topa kihei-in, “Hih nangma thahatna tawh pai in la, Midian-te' khutsung panin Israel-te honkhia in. Nangmah hong sawl khin hilo ka hi hiam?” a ci hi. 15Tua ciangin Gideon in ama kiangah, “Kong thum hi, Topa aw, Israel-te bangci hotkhiat zawh ding ka hi hiam? En in, Manasseh minam sungah keima behte a hatlo pen hi a, ka innkuan sung panin kei a neupen ka hi hi,” a ci hi. 16 Topa in ama kiangah, “Nang kong ompih ding a, nangmah in mihing khat bang lelin Midian-te na vatgawp ding hi,” a ci hi. 17Tua ciangin amah in, “Tu-in nong hehpih zawh leh, kei tawh a kiho mipa pen nang na hihna lim khat hong lak in. 18Kong thum hi, letsong puakin nang kiangah hong pai-in nangma mai-ah kong koih mateng hih lai panin na paikhia kei in,” a ci hi. Amah in, “Nong tun'kik mateng ka na om ding hi,” a ci hi.

19Tua ahih ciangin Gideon a inn-ah pai-in keelno khat, leh annel seu khat silngo sawhloh moh a bawl hi. A sa ciang sung khatah koihin a satui beel sung khatah koih a, tawsaw nuai ama kiangah tuate hong paipihin a pia hi. 20Tua ciangin Pasian' vantung mi in ama kiangah, “Sa leh silngo sawhloh moh la-in hih suang tungah koih in la, a tungah satui sung in,” a ci hi. Tua bangmahin amah in a hih hi. 21Tua ciangin Topa' vantung mi in a khutsunga om ciangkhut dawn dawksakin, sa leh silngo sawhloh mohte a su hi. A suang panin mei piangkhia-in, sa leh silngo sawhloh moh a kangtum hi. Tua ciangin ama muhna panin Topa' vantung mi a mang hi. 22Tua ciangin Gideon in amah pen Topa' vantung mi ahihlam a thei hi. Gideon in, “Ala, Topa Pasian! Topa' vantung mi mai kituahin ka mukha khin hi,” a ci hi. 23Ahih hangin Topa in ama kiangah, “Nopna na tungah hong om ta hen; lau kei in, na si kei ding hi,” a ci hi. 24Tua ciangin Gideon in Topa-a' dingin biakna tau khat tua lai-ah lamin tua pen, “ Topa in nopna ahi hi”, ci-in min a phuak hi. Tua pen, Abiezer mite' neihsa Ofrah khua-ah tuni dongin a dinglai hi.

25Tua zanin Topa in ama kiangah, “Na pa' bawng sung pan kum sagih a pha a bawngtal nih la in la, na pa' neih Baal biakna tau phelin, a gei-a om Asherah milim phuk in. 26Tua ciangin hih lai munmuan'huai dawnah Topa na Pasian-a' dingin biakna tau khat lamin, a suangte a ngeina ding bangin koih in. Tua ciangin a bawngtal nih la-in, na phuk Asherah milim sing tawh meihal biakna-in pia in,” a ci hi. 27Tua ahih ciangin Gideon in a nasemte mi sawm paipihin, Topa in ama tungah a gen bangin a hih hi. Ahih hangin sunin a hih ding a innkuanpihte leh a khuamite kihta lua ahih manin zanin a hih hi.

28Tua khuamite zingsang tungin a thawh uh ciangin, Baal biakna tau kiphelkhia-in a gei-a om Asherah milim kiphuk a, a kilam thak biakna tau tungah bawngtal a nihna a kipia a mu uh hi. 29Amaute khatlekhat kiangah, “Hih na kua in hih ahi hiam?” kici uh hi. Amaute in a thu kanin a dot uh ciangin, “Joash' tapa Gideon in hih hi,” kici uh hi. 30Tua ciangin tua khuamite in Joash kiangah, “Na tapa in Baal biakna tau phelkhia-in a gei-a om Asherah milim phuk ahih manin ka thah theihna dingun amah hong paikhiatpih in,” a ci uh hi. 31Ahih hangin Joash in ama langkhatah a pang mite khempeuh tungah, “Baal pan'pih ding a, ama tupna hutpih ding na hi uh hiam? Amah a pan'pih peuhmah zingsang ciangin kithat ding hi. Amah pasian ahih leh amahmah kihu tawm ta hen. Bang hang hiam cih leh ama biakna tau a kiphelsak ahi hi,” a ci hi. 32Tua ahih ciangin tua ni-in Gideon, “Keima langkhatah Baal pangsak un,” a cihnopna ahi Jerubbaal min kiphuak hi. Bang hang hiam cih leh Gideon in a biakna tau a phel hi.

33Tua ciangin Midian mite, Amalek mite, leh Nisuahna lam mite khempeuh hong paikhawm uh a, amaute in Jordan kantanin Jezreel Kuam-ah giahphual a sat uh hi. 34Ahih hangin Gideon' tungah Topa' kha hong tung hi. Amah in peengkul gingsak a, amah a zui dingin Abiezer mite kisamkhia hi. 35Amah in Manasseh gam khempeuhah kamtaite sawl a, amaute zong amah a zui dingin kisam hi. Amah in Asher, Zebulun, leh Naftali minamte kiangah kamtaite sawl a, amah a pawm dingin amaute zong paito uh hi.

36Tua ciangin Gideon in Pasian kiangah, “Na gensa bangin keima tha tawh Israel-te na hotkhiat ding leh, 37en in, ancilna sual tungah tuumul lom khat ka koih hi. Tuumul tung bekah daitui omin leilak dang khempeuh a keu leh, na gensa bangin keima tha tawh Israel-te na honkhia ding hi, cih ka thei ding hi,” a ci hi. 38Tua bangmahin a piang hi. A zing ciangin tho baihin a tuumulte a tui suk a, tuumul panin tui hai khat dim a sukkhia hi. 39Tua ciangin Gideon in Pasian kiangah, “Kei tungah hong heh kei in, tu-a khatvei bek hong pausak lai in, kong thum hi; tuumul tawh hih khatvei bek hong sinsak lai in, kong thum hi. Tuumul tung bek keusak in la, mun dang leitung khempeuhah daitui omsak in,” a ci hi. 40Tua bangmahin Pasian in tua zanin a hih hi. Bang hang hiam cih leh tuumul tung bek keu a, mun dang leitung khempeuhah daitui a om hi.