Thukhente 18

 

Mikah leh Dan Mite

1Tua hun lai-in Israel-te sungah kumpi omlo hi. Tua hun lai-in Dan minamte in a ten'na ding uh leitang zong uh hi. Bang hang hiam cih leh tua hun dong mateng Israel minamte sung panin amau-a' ding gamhluah bangmah kialo hi. 2Tua ahih ciangin Dan mite in gam ensimin a va zong dingin amau' minam bup khempeuh lak panin mi siam nga Zorah leh Eshtaol panin a sawl uh hi. Amaute in tua mite kiangah, “Pai un la gam va zong un,” a ci uh hi. Amaute Efraim mualtung gam, Mikah' inn-ah hong tung uh a, tua lai-ah a taam uh hi. 3Amaute Mikah' inn-ah a om uh ciangin Levi mi tangval' aw khat khenthei uh hi. Amaute kihei-in ama kiangah, “Kua in hih lai-ah nang hong paipih ahi hiam? Hih lai munah bang hih na hi hiam? Hih lai-ah na nasep bang ahi hiam?” a ci uh hi. 4Amah in amaute kiangah, “Tua bang tua bangin Mikah in kei hong bawl hi. Amah in kei hong cialin kei pen ama siampi ka suak hi,” a ci hi. 5Tua ciangin amaute in ama kiangah, “Kote' kuankhiat khualzinna a tangtung ding hiam cih ka theihna dingun Pasian hong dotsak in, kong thum uh hi,” a ci uh hi. 6Tua ciangin siampipa in amaute kiangah, “Lung nuamin pai un. Note' khualzinna thu-ah Topa in hong pan'pih hi,” a ci hi.

7Tua ciangin mi ngate paikhia-in Laish tung uh a, tua lai-a om mite, Sidon mite' ombang danin daitakin omin bangmah a upmawh lohna, leitungah bangmah kisam loin a hauhna, leh amaute Sidon-te' kiang panin gamla omin kuamah tawh kizopna a neihlohna, lungmuang taka a ten'na uh a mu uh hi. 8Amaute Zorah leh Eshtaol-a a sanggamte uh kiangah hong tun'kik uh ciangin, a sanggamte un amaute kiangah, “Bang thu gen ding nong nei uh hiam?” a ci uh hi. 9Amaute in, “Ding un, amaute a sim dingin paito ni. Bang hang hiam cih leh a leitang ka mu khin uh a, a lei hoih mahmah hi. Bangmah hihloin ommawk ding na hi uh hiam? Pai ding zekai kei un; lutin leitang va luah ni. 10Na pai uh ciangin bangmah a ummawhlo mite kiang na tung ding uh hi. Leitang zai mahmah hi. Pasian in na khutsung uhah leitungah bangmah a kisap lohna mun hong pia khinzo takpi hi,” a ci uh hi.

11Tua ciangin Dan minamte galhiam a tawi mihing za guk Zorah leh Eshtaol panin kuankhia uh a, 12amaute paito-in Judah gamsung Kiriathjearim-ah giahphual sat uh hi. Hih thu hangin tuhun dongin tua mun pen Mahanehdan kici hi. Tua pen Kiriathjearim nitumna lamah om hi. 13Amaute tua lai mun panin Efraim mualtung gamah paisuakin Mikah' inn-ah a tung uh hi.

14Tua ciangin Laish gam a ensim dingin a pai mi ngate in a sanggamte uh kiangah, “Hih innte khat sungah siampipuan khat, innsung pasian-te, a kisek milim khat, leh a kisung milim khat a omlam theilo na hi uh hiam? Tua ahih ciangin tu-in na hih ding uh ngaihsun un,” a ci uh hi. 15Tua ciangin amaute kihei-in Mikah' inn-a Levi tangvalpa' omna-ah tung uh a, ama omzia dong uh hi. 16Tua hun sungtengin galhiam a tawi Dan mi za gukte kulhkongpi lutna-ah ding uh hi. 17Tua ciangin, galhiam a tawi mi za gukte tawh kulhkongpi lutna-ah siampipa a din' khawm laitakin gam ensim dingin a kuankhia mi ngate tumin a kisek milim, a siampipuan, a innsung pasian-te, leh a kisung milim la uh hi. 18Hih mite Mikah' inn sungah tumin a kisek milim, a siampipuan, a innsung pasian-te, leh a kisung milim a lak uh ciangin siampipa in amaute kiangah, “Bang hih na hi uh hiam?” a ci hi. 19Amaute in ama kiangah, “Pau kei in; na khutin na kam hum in la, kote tawh hong pai-in kote-a' dingin pa leh siampi hong hi in. Nang-a' dingin mi khat' innsungah siampi hih ding hoihzaw ahi hiam, tua ahih kei leh Israel-te' sungah minam leh beh siampi hih ding hoihzaw ahi hiam?” a ci uh hi. 20Tua ciangin siampipa a lungkim hi. Amah in a siampipuan, a innsung pasian-te, leh a kisek milim la-in mite' lakah a pai hi.

21Tua ahih ciangin amaute' mai-ah a taneute leh a ganhingte leh a vante uh omsakin, amaute paikhia uh hi. 22Amaute Mikah' inn panin a gamla khopkhat a tun' uh ciangin Mikah' innvenga om mite kikaikhawm uh a, Dan mite delhin a pha uh hi. 23Amaute in Dan mite a otsan uh ciangin Dan mite hong kihei-in Mikah kiangah, “Hih bang mihon tawh nong delhna ding bang thu om ahi hiam?” a ci uh hi. 24Amah in, “Note in keima bawlsa ka pasian-te leh ka siampipa la-in na paikhia uh hi. Keimah in bang nei nawn ka hi hiam? Tua ahih ciangin, ‘Bang thu ahi hiam?’ bang hangin hong ci thei na hi uh hiam?” a ci hi. 25Dan mite in ama kiangah, “Kote' lakah na aw hong kizasak kei in; tua hi kei leh ka lawmte uh hehin nang hong hih ding uh a, na innkuanpihte tawh na si khading uh hi,” a ci uh hi. 26Tua ciangin Dan mite pai uh hi. Mikah in ama-a' dingin amaute thahat lua hi, ci-in a muh ciangin amah kihei-in a inn-ah a ciahkik hi.

27Dan mite in Mikah' bawlsate leh a siampipa paipihin, gamdai-in a om, bangmah a ummawhlo mite' omna Laish tung uh a, namsau tawh amaute vatin mei tawh a khuapi a hal uh hi. 28Amaute pen Sidon panin gamla uh ahih manin a honkhia ding omlo a, amaute in kuamah tawh kizopna neilo uh hi. Tua mun pen Bethrehob-te' neihsa kuam sungah om hi. Amaute in khuapi lamkikin a sungah teng uh hi. 29Amaute in tua khuapi min pen Israel' suan amau' pian'na Dan tamin Dan a phuak uh hi. Ahih hangin a masa-in tua khuapi min pen Laish ahi hi. 30Tua ciangin Dan mite in a kisek milim amau-a' dingin phut uh a, Moses' tupa, Gershom' tapa Jonathan leh ama tapate pen tua gam a kilak hun dong Dan minamte-a' dingin siampi ahi uh hi. 31Tua ahih ciangin Shiloh-ah Pasian' biakbuk a om sungteng Mikah' bawlsa a kisek milim tua lai-ah a om hi.