Khang Thangthu Nihna 5

 

1Tua bangin Topa' biakinn ding a hih nasep khempeuh kizo hi. Tua ciangin a pa David in a apsa nate Solomon in paipihin, Pasian' biakinn sung vanmanpha koihnate sungah a ngunte, a khamte, leh umlebeel khempeuh a seng hi. *

Solomon in Thuciamna Singkuang Biakinn sungah Paipih

(1 Kumpite 8:1-11)

2Tua ciangin Zion a kici David khuapi sung panin Topa' Thuciamna Singkuang a paipihto dingin Kumpi Solomon in Israel upate, minam lutang khempeuh, leh Israel beh makaite, Jerusalem-ah kaikhawm hi. * 3Tua ciangin a kha sagihna-a pawi hun sungin kumpipa' mai-ah Israel mi khempeuh kikhawm uh hi. 4Tua ciangin Israel upate khempeuh hong pai uh a, Levi mite in Thuciamna Singkuang la uh hi. 5Tua ciangin amaute in Thuciamna Singkuang, leh kikhopna buk, leh puanbuk sunga om a siangtho umlebeel khempeuh puato uh a, siampite leh Levi mite in tuate puato uh hi. 6Tua ciangin Kumpi Solomon leh ama mai-ah a kikhawm Israel-te khempeuh Thuciamna Singkuang mai-ah om uh a, biakna-in tuu leh bawngtal tampi tak pia uh ahih manin a phazah kisim zolo hi. 7Tua ahih ciangin siampite in kherub-te' kha nuai, siangtho pen mun sung, biakinn sungnung sung ama munah Topa' Thuciamna Singkuang a paipih uh hi. 8Kherub-te in Thuciamna Singkuang tungah a khate uh zak uh ahih manin kherub-te pen Thuciamna Singkuang leh a zawlte tungah khuhna khat a suak uh hi. 9A zawlte sau ahih manin siangtho mun panin biakinn sungnung mai-ah a mongte kidawk a, ahih hangin a pualam panin kimu theilo hi; tuni dongin tua lai-ah tuate om hi. 10Egypt panin amaute hong paikhiat lai-in Topa in Israel mite tawh thuciamna a bawlna mun Horeb-ah Moses in suangpeek nihte a koih simloh Thuciamna Singkuang sungah bangmah dang omlo hi. * 11Siangtho mun panin siampite hong pusuakin (bang hang hiam cih leh amau' pawlte cihtuam omloin tua lai-a om siampite khempeuh amau mahmah kisian'suah uh hi. 12Tua ciangin Levi mi lasate Asaf, Heman, leh Jeduthun, amau' tapate leh a behte, saihadial puan tawh kizemin, daltuahte, harp lasaknate, leh laia lasaknate tawi-in peengkul tum siampite za leh sawmnih tawh biakna tau nisuahna lamah ding khawm uh hi. 13Aw kikhatin phatin Topa' tungah lungdam koh ding pen peengkul tumte leh lasate' nasep ahi hi) peengkulte leh daltuahte leh adang lasaknate tawh,

• “ Topa' tungah
  • lungdam koh ding hoih hi;
• bang hang hiam cih leh
  • ama itna kip tawntung hi,”
    ci-in Topa phatna-in la a kisak ciangin, Topa' biakinn sung meii tawh kidim a, *

14meii hangin siampite in na sem zolo uh hi; bang hang hiam cih leh Topa' minthan'na vangtaang Pasian' biakinn sung a dim hi. *