Khang Thangthu Nihna 36

 

Judah Kumpi Jehoahaz' Ukna A Zakiatna

(2 Kumpite 23:31-35)

1Tua gam mite in Josiah' tapa Jehoahaz la-in Jerusalem-ah a pa' tangin kumpi-in a koih uh hi. 2Jehoahaz in uk ding a kipatin kum sawmnihlethum pha a, amah in Jerusalem-ah kha thum sung uk hi. 3Tua ciangin Egypt kumpipa in Jerusalem-ah amah zakiasak a, siah ngun talen za khat leh kham talen khat, tua gam kipiasak hi. 4Tua ciangin Egypt kumpipa in Judah leh Jerusalem tungah a ukin Jehoahaz' sanggampa Eliakim koih a, ama min Jehoiakim-in khelsak hi. Ahih hangin Neko in a sanggampa Jehoahaz la-in Egypt-ah a paipih hi. *

Judah Kumpi Jehoiakim' Ukna

(2 Kumpite 23:36—24:7)

5Jehoiakim in uk ding a kipatin kum sawmnihlenga pha a, amah in Jerusalem-ah kum sawmlekhat sung uk hi. Topa a Pasian mai-ah amah a sia gamta hi. * 6Babylon kumpipa Nebukhadnezzar amah a simin hong kuanto a, Babylon-ah a paipih dingin amah kol bulh hi. * 7Nebukhadnezzar in Topa' biakinn-a umlebeel pawlkhatte zong Babylon-ah pua-in Babylon-a a kumpi inn-ah tuate a koih hi. 8Tu-in Jehoiakim' gamtatna a omlaite, leh ama hih a kihhuaite, leh amah a hoihlohna a kimute, Israel leh Judah Kumpite' Tangthu Laibu sungah kigelh hi. Tua ciangin a tapa Jehoiakhin in ama tangin a uk hi.

Judah Kumpi Jehoiakhin Galmatin Babylon-ah Kila

(2 Kumpite 24:8-17)

9Jehoiakhin in uk ding a kipatin kum sawmlegiat pha a, amah in Jerusalem-ah kha thum leh ni sawm sung uk hi. Topa' muhna-ah amah a sia gamta hi. 10Tua kum khuakhal sungin Kumpi Nebukhadnezzar in mi sawlin Topa' biakinn-a umlebeel manphate tawh amah Babylon-ah lasak a, Judah leh Jerusalem tungah Jehoiakhin' sanggampa Zedekiah kumpi-in a koih hi. *

Judah Kumpi Zedekiah' Ukna

(2 Kumpite 24:18-20;Jeremiah 52:1-3)

11Zedekiah in uk ding a kipatin kum sawmnihlekhat pha a, amah in Jerusalem-ah kum sawmlekhat sung uk hi. * 12 Topa a Pasian' muhna-ah amah a sia gamta hi. Topa' kammal a gensawn kamsang Jeremiah mai-ah amah kiniamkhiat lo hi.

13Pasian tawh amah a kiciamsak kumpi Nebukhadnezzar zong amah in lehdo hi. Israel Pasian, Topa' kiang zuankik nuamlo a, zong kisik nuamloin a lung khauhsak hi. * 14A makai siampite leh mi khempeuh zong tua bangmahin citaklo mahmah uh a, minam dangte' kihhuainate zui uh hi. Amah in Jerusalem-ah a siangtho-in a koih Topa' biakinn amaute in ninsak uh hi. 15A mite leh ama ten'na mun khasiat ahih manin amau' pute pate' Pasian, Topa in a kamtaite amaute kiangah sawl teitei hi. 16Ahih hangin a mite tungah Topa a heh ciangdong, a hehna a kidamsak zawh nawnloh ciangdongin amaute in Pasian' kamtaite zahpihin, a thute simmawhin, a kamsangte thusimlo niloh uh hi.

Judah a Kilakna

(2 Kumpite 25:8-21;Jeremiah 39:8-10; 52:12-30)

17Tua ahih ciangin Topa in Khaldea mite' kumpipa amaute' langkhatah paipih a, tua kumpipa in amau' Pasian' biakinn sung nangawnah namsau tawh a tangvalte uh that a, numei pasal, a moi a ham, a dam a na, kuamah khasiat lo hi. Pasian in a vekpi-in ama khutsungah a pia hi. * 18Tua ciangin Topa' biakinn-a umlebeel khempeuh a lian a neu, leh Topa' biakinn-a vanmanphate, leh kumpipa leh a uliante' vanmanphate khempeuh amah in Babylon-ah paipih hi. 19Tua ciangin amaute in Pasian' biakinn halin Jerusalem khua susia uh a, a kumpi inn khempeuh mei tawh halin umlebeel a manpha khempeuh a susia uh hi. * 20Amah in namsau panin a suakta mite Babylon-ah salin la a, Persia kumpi in a uk hun mateng amah leh a suanlekhakte' nasem a suak uh hi. 21Tua sungin Israel leitang in a sabbath-te a kicingin na tang hi. Kamsang Jeremiah tung tawnin Topa' thugen a tun'na dingin kum sawmsagih a cin'na dingin leitang a kinusiat sung khempeuh leitang in sabbath tawlngakna a nei ahi hi. *

Sairas' Taangkona

(Ezra 1:1-4)

22Tu-in Persia kumpipa Sairas' kum khatna kumin, Jeremiah' kam pana Topa' thugen a tun' theihna dingin, Topa in Persia kumpipa Sairas' lungsim hanthawn a, amah in a kumpi gamsung khempeuhah taangkona khat bawl a, lai-in zong a gelh hi. A lai gelhna-ah,

23“Persia kumpipa Sairas in hih bangin ci hi: ‘Vantung Pasian, Topa in leitung kumpi gam khempeuh kei hong pia khin a, Judah gamsung Jerusalem khua-ah ama-a' dingin biakinn khat ka lamsak ding hong sawl hi. Note lakah ama mi ahi khempeuh, Topa a Pasian uh in ompih ta hen. Biakinn lam dingin Jerusalem-ah amaute paito sak un,’ ci hi,” a ci hi. *