Khang Thangthu Nihna 12

 

Shishak in Judah a Simna

(1 Kumpite 14:21-31)

1Rehoboam' ukna kipin a thahat ciangin, amah-a kipan amah tawh a om Israel mi khempeuh in Topa' thukham nusia uh hi. 2-3 Topa tungah amaute citaklo uh ahih manin Rehoboam' kum ngana kumin Jerusalem a sim dingin Egypt kumpipa Shishak, leeng galkap tul leh za nih, leh sakol tung tuang galkap tul sawmguk tawh hong kuanto hi. Egypt panin amah tawh a hong kuan mite pen Libya mi, Sukkiim mi, leh Ethiopia mite hi a, a tamna simzawh hilo hi. 4Amah in kulhnei khuapite la-in Jerusalem ciangdong hong tung hi.

5Tua ciangin Shishak' huhau-in Jerusalem-ah a kikhawm Rehoboam leh Judah uliante kiangah kamsang Shemaiah hong pai-in amaute kiangah, “ Topa in hih bangin ci hi: ‘Note in kei nong nusia uh hi. Tua ahih ciangin Shishak' khutsungah note kong pia khin hi,’ ci hi,” a ci hi.

6Tua ciangin Judah uliante leh kumpipa kiniamkhiatin, “ Topa thuman hi,” a ci uh hi.

7Amaute a kiniamkhiatna thu Topa in a muh ciangin Shemaiah' tungah Topa' thu hong tung hi: “Amaute kiniamkhiat ahih manin ka susia kei ding hi. Amaute ka suaktasak liailiai tei ding a, Shishak' khut tawh Jerusalem tungah ka hehna a cingin ka tungsak kei ding hi. 8Ahi zongin amaute in keima nasepna leh leitung kumpite' nasepna a kilamdan'na a theihna dingun amaute pen Shishak' nasemte suak ding uh hi,” a ci hi.

9Tua ahih ciangin Jerusalem a simin Egypt kumpipa Shishak hong kuanto hi. Amah in Topa' biakinn-a vanmanphate leh kumpipa' inn-a vanmanphate-a kipan na khempeuh a lakhia hi. Amah in Solomon' bawlsa kham lumte zong lakhia hi. * 10Tua ciangin Kumpi Rehoboam in tuate' tangin sumngo lum bawl a, kumpipa' kongcing ahi inncing a ukte' khutsungah tuate a ap hi. 11 Topa' biakinn-ah kumpipa a pai simin a cingte hong pai-in tuate keng uh a, tua ciangin cin'na inndei sungah tuate koihkik uh hi. 12Amah a kiniamkhiat ciangin siat cimitna a pian'lohna dingin ama tung pan Topa' hehna kiheikhia hi. Tua thamloin Judah gamsungah thu paizia zong hong hoihsak hi.

13Tua ahih ciangin Kumpi Rehoboam amahmah Jerusalem-ah kikipsakin a uk hi. Rehoboam in uk ding a kipatin kum sawmnihlekhat pha a, Israel minam khempeuh sung panin a min koihna dingin Topa in a teelkhiat khuapi Jerusalem-ah amah in kum sawmlesagih sung a uk hi. Ama nu' min Naamah hi a, Ammon mi ahi hi. 14Amah in Topa zon' ding a lungsimah koihlo ahih manin a sia a gamta hi.

15Tu-in Rehoboam' gamtatnate, a kipatna pan a tawpna dong, Kamsang Shemaiah leh Thumupa Iddo' Khang Tangthu sungah kigelh hi. Rehoboam leh Jeroboam kikalah galkidona om tawntung hi. 16Tua ciangin Rehoboam si a, David' khuapi sungah kivui hi. Tua ciangin a tapa Abijah in ama tangin a uk hi.