Samuel Masa 4

 

Filistia Mite in Thuciamna Singkuang Man

1Tu-in Filistia mite a sim dingin Israel-te kuankhia uh hi. Amaute in Ebenezer-ah phual sat uh a, Filistia mite in Afek-ah phual sat uh hi. 2Israel-te a do dingin Filistia mite kipan uh a, gal a kido uh ciangin Filistia mite in Israel-te zo-in galphual sungah mi tul li bang that uh hi. 3Mihonte giahphualah hong ciah ciangin Israel upate in, “Bang hangin Topa in tuni-in Filistia mite' mai-ah eite hong taisak ahi hiam? Eite' lakah amah hong pai-in a thahat i galte' khutsung panin amah in eite hong hotkhiat theihna dingin Shiloh panin Topa' Thuciamna Singkuang paipih ni,” a ci uh hi. 4Tua ahih ciangin mite in Shiloh-ah mi paisak uh a, kherub-te tungah a tu Vanglian Topa' Thuciamna Singkuang tua lai panin hong pua uh hi. Eli' tapa nihte, Hofni leh Finehas, Pasian' Thuciamna Singkuang tawh tua lai-ah om uh hi. *

5 Topa' Thuciamna Singkuang giahphual sung hong tun' ciangin Israel-te khempeuh nakpi takin awng uh a, lei a thawn hi. 6Filistia mite in otna gamlumna a zak uh ciangin amaute in, “Hebru mite' giahphualah nakpi-a hih bang otna bang a cihnopna ahi hiam?” a ci uh hi. Topa' Thuciamna Singkuang giahphual a tun' khitna a theih uh ciangin 7Filistia mite lau uh hi. Bang hang hiam cih leh amaute in, “Giahphualah a pasian-te uh tungzo hi,” a ci uh hi. Amaute in, “Gimna ngah hi ta hang! Bang hang hiam cih leh nidangin hih bang piang ngeilo hi. 8Gimna ngah hi ta hang! Kua in hih a thahat pasian-te' khutsung panin eite hong honkhiazo ding ahi hiam? Hihte pen gimna a tuamtuamte tawh gamlakah Egypt-te a vatgawp pasian-te ahi hi. 9Filistia mite aw, hang un la, pasal bangin gamta un. Tua hi kei leh amaute, note' sila hong hih mah bangin Hebru mite' sila na suak ding uh hi. Pasal lungsim nei-in do un,” a ci uh hi.

10Tua ahih ciangin Filistia mite in do uh a, Israel-te kizo-in mi khempeuh a inn ciatah tai uh a, mi tampi tak kithat hi. Bang hang hiam cih leh Israel-te khe galkap mi tul sawmthum puk hi. 11Tua ciangin Pasian' Thuciamna Singkuang zong kiman a, Eli' tapa nihte, Hofni leh Finehas zong kithat hi.

12Giahphual panin Benjamin mi khat hong tai-in a puan kikeksa leh a lu tungah leivui khu-in Shiloh hong tung hi. 13Amah a tun'in, lampi gei-ah a vilin ama tutna-ah Eli na tu hi; bang hang hiam cih leh Pasian' Thuciamna Singkuang hangin a lungsim ling hi. Mipa khuapi sung hong tungin a thu teng a gen ciangin khuapi mi khempeuh lau-in kiko uh hi. 14Eli in kikona awging a zak ciangin amah in, “Hih gamlumna bang ahi hiam?” a ci hi. Tua ciangin mipa manlangin hong pai-in Eli kiangah a gen hi. 15Tu-in Eli kum sawmkua leh kum giat pha a, a mitte maangin khua mu theilo hi. 16Mipa in Eli kiangah, “Keimah, galphual panin hong ciah ka hi a, tuni-in giahphual panin kong tai hi,” a ci hi. Tua ciangin amah in, “Ka tapa aw, bangci ahi hiam?” a ci hi. 17A thu hong puakpa in dawngin, “Filistia mite' mai-ah Israel-te tai uh a, mi tampi tak zong kithat hi; na tapa nihte, Hofni leh Finehas zong si uh a, Pasian' Thuciamna Singkuang kiman khin hi,” a ci hi. 18Amah in Pasian' Thuciamna Singkuang a gen ciangin kulhkongpi gei-a a tutna mun panin Eli thalpukin a ngawng kitanin a si hi. Bang hang hiam cih leh amah puteek hi-in gik hi. Amah in Israel-te kum sawmli sung thu khen hi.

19Tu-in a monu, Finehas' zi, naupaai-in a suak dektak ahi hi. Pasian' Thuciamna Singkuang a kimatna leh a pasal a sihna thu a zak ciangin amah kunin nausuak hi. Bang hang hiam cih leh a nat hun tung ta hi. 20Amah si dektak a, ahi zongin amah a don numeite in ama kiangah, “Lau kei in, tapa khat na nei hi,” a ci uh hi. Ahih hangin amah in dawnglo a, zong donlo hi. 21Tua ciangin amah in, “Israel-te' sung panin minthan'na paikhia khinta!” ci-in a naungek min Ikhabod a phuak hi. Bang hang hiam cih leh Pasian' Thuciamna Singkuang a kimatna hang leh a teekpa leh a pasal' hang ahi hi. 22Amah in, “Pasian' Thuciamna Singkuang kiman khin ahih manin Israel-te' sung panin minthan'na paikhia khinta hi,” a ci hi.