Rom Laikhak 7

 

Nupa Tawh Gentehna

1Lawmte aw, note khempeuh in thukham thei na hih manun tu-a kong gen dingte na tel mahmah ding uh hi. Mi khat a nuntak sungteng bek thukham in uk thei hi. 2Gentehna-in, pasal nei numei khat pen a pasal a nuntak sungteng bek, tua thukham in a pasal tawh lencip hi. Ahi zongin a pasal a sih ciangin tua a pasal tawh a lencip thukham panin a suakta hi. 3Tua ahih manin a pasal a nuntak hun sungin pasal dang tawh a lupkhawm leh mi tawh a mawh kici hi. Ahi zongin a pasal a si hi leh thukham tawh kisai-in a suakta hi a, pasal dang a ten'pih hangin mi tawh a mawh hilo hi. 4Sanggamte aw, note zong tua mah tawh a kibang na hi uh hi. Khrih tawh pumkhat na hihna uh hangin thukham tawh kisai thu-ah a sikhin na hi uh a, Pasian' nasepna-ah eite a man nei i suahtheihna dingin sihna panin a kithosak kik Khrih tawh nupa na hi uh hi. 5I leitung lungsim tawh i nuntak laiteng, thukham hangin i hihnop semsem mawhnopnate i gamta a, tuate khempeuh sihna tawh a kizom ahi hi. 6Ahi zongin nidangin a hong lencip thukham panin Pasian in eite hong suaktasak khin ahih manin tua thukham tawh kisai-ah eite a sikhin ihi hi. Lai sungah a kigelh thukham lui sungah nungta nawnloin, Kha Siangtho' hong piak nuntakna thakah a nungta ihi hi.

I Sunga Om Mawhna

7Tua ahih leh Thukham mahmah pen a siahuai ahi hiam? A sia hilo hi. Mawhna bang hiam cih Thukham in hong theitel sak hi. Thukham in, “Hazatna lungsim nei kei in,” ci-in genlo hi leh, haza i cih bang ahi hiam, ci-in ka thei kei ding hi. * 8Thukham a omna hangin mawhna in nuamtak sa-in hazatna a tuamtuam ka neihtheihna ding hong piangsak hi. Thukham om kei leh mawhna in bangmah sem theilo hi. 9Thukham ka theih ma-in mi nungta ka hi ngei a, thukham ka theih ciangin mawhnopna lungsim hong khangin kei ka si hi. 10Nuntak ngahna dingin a kibawl thukham pen keima-a' dingin sihna hong hi zawsop hi. 11Bang hang hiam cih leh thukham a om manin mawhna in nuamtaksa a, kei hong khemin tua thukham tawh a hong that hi. *

12Tua ahih ciangin Thukham mahmah hita leh thupiaknate hita leh hoihin man a, siangtho hi. 13Tua ahih leh a hoih na khat in kei' sihna ding hong piangsak ahi hiam? Hilo hi. Tua sihna pen mawhna' nasepna hi a, mawhna pianzia bangci bang taktak hiam, cih a kitheihna dingin a hoih na khat zangin kei tungah sihna a hong piangsak ahi hi. Tua ahih manin thukham a om manin mawhna a siahuai mahmah ahihna hong kilangzaw kan lai hi.

14Thukham pen i kha thu tawh kisai hi, ci-in i thei hi. Ahi zongin kei pen leitung pumpi tawh a nungta mi ka hi a, mawhna thu mangin a sal a suak ka hi hi. 15Ka hihnopteng hihkha loin ka hih noplohteng keek mah hih zawsop ka hih manin keima gamtatna mahmah zong ka tel thei kei hi. * 16Ka hih noplohteng ka hih veve ciangin Thukham a deihhuai khat hi, ci-in ka ngaihsutna hong langsak hi. 17Tua ahih manin tua bangin a gamta taktak pen kei hiloin ka sunga om mawhna hizaw hi. 18Ka leitung pumpi sungah a hoih na khat beek omlo hi, ci-in ka thei hi. Ka sungah a hoih gamtatnopna lungsim a om hangin ka hihzo kei hi. 19A hoih ka gamtatnop teng gamta loin, ka hihnoploh siatnate ka gamta zawsop hi. 20Ka gamtat noplohteng ka gamtat veve ciangin tua a gamta pen kei hi nawnloin ka sunga om mawhna a gamta ahihna a hong kilang hi.

21Tua ahih ciangin a hoih gamta nuam hinapi-in a sia bekbek a gamtakha ka hihna ka thei hi. 22Ka lungsim tawng taktakah Pasian' thukham hoih ka sa hi. 23Ahi zongin kei' deihloh thudang khat in ka lungsimah na hong sem hi. Tua ka sunga na hong sem pen in mawhna thu-ah kei hong mancip hi. 24Kei pen a lungkham mi ka hita hi. Kei a hong sisak ding hih lungsim lui panin kua in kei hong honkhiazo ding ahi hiam? 25I Topa Jesuh Khrih in hong honkhiazo ding ahih manin Pasian tungah ka lung a dam hi. Kei' omzia taktak ahih leh: Ka lungsim tawh Pasian' thu ka zui a, ka pumpi in mawhna a piangsak thu a zui hi.