Nehemiah 9

 

Israel-te' Mawhna Ezra' Pulakna

1Tua kha mah a ni sawmnihleli ni-in an tang dingin Israel mite kikhawm uh a, puanhampi silhin a lu tung uhah lei kibuak uh hi. 2Tua hi a, gamdangmi khempeuh panin Israel mite tuam om uh a, amaute in din'sa-in amau' khialhnate leh a pu a pate uh mawhnate a pulak uh hi. 3Tua ciangin amau' omna mun ciat uhah dingin Topa amau' Pasian' thukham laibu nai thum sung sim uh a, adang nai thum sung amaute in mawhna pulakin Topa a Pasian uh zahtakna a bawl uh hi. 4Levi mite' kahlei tungah Jeshua, Bani, Kadmiel, Shebaniah, Bunni, Sherebiah, Bani, leh Khenani ding uh a, Topa amaute' Pasian' tungah nakpi takin kiko uh hi. 5Tua ciangin Levi mi Jeshua, Kadmiel, Bani, Hashabneiah, Sherebiah, Hodiah, Shebaniah, leh Pethahiah-te in, “Ding un, Topa na Pasian uh phat un la, ‘A tawntung pan a tawntung dongin a minthang na min in thupha ngah a, thupha khempeuh leh phatna dang khempeuh sangin a sangzaw hi. 6Nang bek Topa na hi hi. Nangmah in a sang pen vantung leh vana om khempeuh, leitung leh a tunga om khempeuh, leh tuipi leh a sunga om khempeuh na bawl hi. Nangmah in tuate khempeuh na omsak a, vantung mihonpi in nang hong bia uh hi. 7Nang pen Abram teelin Khaldea gam Ur khuapi panin paikhiatpihin Abraham min a phuak Pasian, Topa na hi hi. * 8Nangma tungah amah a cihtakna na mu a, Kanaan mite gam, Hit mite gam, Amor mite gam, Perez mite gam, leh Girgash mite gam, amah leh a suanlekhakte tungah piak dingin ama tungah thuciamna khat na bawl hi. Nang thuman na hih manin na thuciamna na tungsak hi. *

9“ ‘Nangmah in Egypt gamsunga ka pute ka pate uh' gimna mu-in San Tuipi-ah hong kikona uh na za a, * 10amaute in ka pu ka pate uh kihihsakna tawh a hih gawpna thei na hih manin Faro leh a nasemte leh a gammi khempeuh langpangin lim leh na lamdang na bawl hi. Tua hi a, tuni dongin a kip minphatna khat nangma-a' dingin na ngah hi. * 11Amaute' mai-ah tuipi phelkham na hih manin tuipi laizang lei keu tungah amaute paisuak uh a, ahi zongin tuihual sunga suanglot bangin tui thukna sungah amau a delhte na lawn hi. * 12Sunin meii khuam khat tawh amaute lam na lak a, amau' lampaina khua a vaksak dingin zanin mei khuam khat tawh lam na lak hi. * 13Sinai Mual tungah kumsukin, vantung panin amaute hopihin, amaute tungah a man thukhenna, thukham taktak, a hoih ngeinate leh thupiaknate na pia a, 14na nasempa Moses tung tawnin amaute tungah na Sabbath siangtho na theisak a, thupiaknate, ngeinate, leh thukhamte na pia hi. * 15A gilkialna uh a vahsak dingin vantung panin an na pia a, a dangtakna uh a phasak dingin suangpi panin tui na phulsak a, amaute tungah piak dingin na kiciamsa gamah lutin a luahna dingun amaute na sawl hi. *

16“ ‘Ahi zongin kote' pute pate kihisakin lungkhauh uh a, na thupiaknate manglo uh hi. 17Amaute in thu mang nuamlo uh a, amaute lakah na bawl na lamdangte ngaihsun khalo uh hi. Amaute lungkhauh niloh uh a, a salsuahna uh Egypt-ah a paipih kik dingin makai khat seh uh hi. Ahi zongin nang pen mawhna a maisak nuam, dikin hehpihna a nei, lungduai-in itna kip a nei Pasian na hi a, amaute na nusia tuan kei hi. * * 18Amaute in a kisung bawngno khat amau mah-a' dingin bawlin, “Hih pen Egypt panin note a hong paikhiatpih na pasian uh ahi hi,” ci-in gendai mawhna lianpi a bawl uh ciangin zong, * 19nang in na hehpih mahmah manin amaute gamlakah na nusia kei hi. Sunin lam a lak meii khuam in amaute nusialo a, zanin a paina ding uh lampi a vaksak dingin mei khuam in zong amaute nusialo hi. 20Amaute hoihtakin thu na hilh a, na manna an zong amaute kiang panin na lakik kei a, a dangtakna uh a phasak dingin tui na pia hi. 21Kum sawmli tawntung gamlakah amaute na vak a, amaute in bangmah tangsapna neilo uh hi. A puante uh zong sialo a, a khe uh zong bawk beeklo hi. * 22Nangmah in amaute tungah kumpi gamte leh mite na pia a, tuate pen galsung van ngah dingin na piak ahi hi. Tua ahih ciangin amaute in Heshbon kumpipa Sihon' gam leh Bashan kumpipa Og' gam luah uh hi. * 23Nangmah in amau' suanlekhakte vana aksi zahin simzawh lohin na tamsak a, a pu a pate un a luah dingin na piak dingin na ciamsa gamah amaute na paipih hi. * 24A suan a khakte uh tua gamah lutin a lak uh ciangin, amau' mai-ah tua gama teng Kanaan mite na nuaisiah a, a ut bang bangun a bawl dingun a kumpite leh a mite amau' khutsungah na pia hi. * 25Tua hi a, amaute in kulhnei khuapite leh gam hoihte la uh a, na hoih tampi tawh a kidim innte, suang kikhuak tuibemte, leenggui lote, oliv lote, leh nek theih singgah kung tampi a luah uh hi. Amaute in tuate ne-in gilvahin thau uh a, nangma hoihna hangin nuamsa mahmah uh hi. *

26“ ‘Ahi zongin amaute in demnopna lungsim nei-in nang hong lehdo uh hi. Amaute in na thukham nungngat uh a, nangma lamah hong ciahkikna dingun amaute a hilh na kamsangte that uh a, amaute in gendai mawhna lianpi bawl uh hi. 27Hih thu hangin a galte uh khutsungah amaute na ap a, a galte un amaute hih gawpgawp uh hi. Ahi zongin amau a kihih gawpgawp hun ciangin nang tungah hong ko uh a, nangmah in vantung panin na za a, na hehpihna lianpi tawh amau' galte' kiang panin amaute a honkhia ding honkhiate na puak hi. 28Ahi zongin a tawldam khit uh ciangin nangma muhna-ah a sia gamta zel uh a, nangmah in amau' galte' khutsungah amaute na nusia a, a galte un amaute a ukgawp uh hi. Ahi zongin amaute in nang tungah huhna hong nget uh ciangin vantung panin amau' ngetna za-in na hehpihna tawh amaute tam veipi na honkhia hi. * 29Tua hi a, na thukham lamah amaute hong kihei kikna ding limtakin na hilh a, ahi zongin amaute kihisakin na thupiaknate donlo uh hi. A zuite tungah nuntakna a pia thei ahi na ngeina kip tungah amaute khial uh hi. Lungkhauhin phengphi-in amaute kiheikhia uh a, thu mang nuamlo uh hi. * 30Kum tampi sung lungduaina tawh amaute na thuak a, na kamsangte tung tawnin amaute na hilh hi. Ahi zongin amaute in ngai nuamlo uh hi. Tua ahih ciangin gamdang mite' khutsungah amaute na pia hi. * 31Ahi ta zongin na hehpihna lian hangin amaute beisak loin, zong na nusia kei hi; bang hang hiam cih leh dikna leh hehpihna a nei na hi hi.

32“ ‘Tua ahih ciangin tu-in a lian, a vanglian, a kihtakhuai, thuciamna kiptakin a len kote' Pasian aw, Assiria kumpite' huna kipan tuni dongin ka kumpite uh, ka uliante uh, ka siampite uh, ka sanggamte uh, ka pu ka pate uh leh ko mi khempeuh tungah hong tung gimnate hong neu ngaihsutsak kei in. * 33Kote tungah hong tungsa thu khempeuhah nang a thutang na hi a, nang citakin a om na hi a, kote a khial gamtatkha ka hi uh hi. 34Ka kumpite uh, ka uliante uh, ka siampite uh leh ka pu ka pate un nangma thukham zuilo uh a, amaute tungah na piak ahi na thupiaknate leh na hilhkholhnate zong donlo uh hi. 35Amaute tungah na piak gamzai lei hoihah omin, amaute tungah na piak hauhna lianpi tawh nuamsa-in amau' kumpite' khutnuai-ah a om laitak nangawnun amaute in nangma na hong semlo uh a, a gamtat hoihlote uh nusialo uh hi. 36Tu-in kote sal ka hi uh hi. Ka pu ka pate un a leitang pana piangte ne-in a na hoih khempeuhte nuamtakin a ngahna dingun na piak gam hih lai munah kote sal ka hi ta uh hi. 37Tu-in leitang tunga piang khempeuh pen kote' mawhna hangin kote' tungah nong koih kumpite tungah tung ta hi. Tua kumpite in kote tungah thu hong nei-in, ka ganhingte uh a ut utun hong hihsak uh a, kote lungkham mahmahin ka om uh hi,’ ci un,” a ci uh hi.

Thukham Zui Dingin Mite Kiciam

38Hih thute khempeuh hangin a kip thuciamna khat bawlin lai-in ka gelh uh a, ka uliante uh, ka Levi mite uh leh ka siampite un zong tua lai tungah a min uh a gelh uh hi.