Nehemiah 8

 

Ezra in mite tungah Thukham Sim

1Kha sagihna hong cin' ciangin Israel mite amau' khuapi ciatah teng khin uh hi. Tua ciangin Tui Kongpi mai tualpi-ah mi khempeuh khekhat khai bangin hong kikhawmtuah diam hi. Tua ciangin Topa in Israel mite tungah a piak ahi Moses thukham laibu pen laitheipa Ezra in hong paipihna dingin a gen uh hi. 2Tua hi a, a kha sagihna a ni khat ni-in numei pasal, leh thu theitel thei ding a kikhawm khempeuh mai-ah siampi Ezra in thukham laibu hong paipih hi. 3Tua ciangin amah in Tui Kongpi mai-a om tualpi lam mai ngatin zingsang tunga kipan sun ciangdong, numei pasal leh thu a tel thei ding mite' zakin tua laibu sunga thute sim a, mi khempeuh in tua thukham laibu sunga thu kisimte limtakin a ngai uh hi.

4Tua ciangin thugenna dinga sing tawh kibawl tau tungah laitheipa Ezra dingto a, ama taklam pangah Mattithiah, Shema, Anaiah, Uriah, Hilkiah, leh Maaseiah ding uh a, a veilam pangah Pedaiah, Mishael, Malkhijah, Hashum, Hashbaddanah, Zekhariah, leh Meshullam a ding uh hi. 5Mi khempeuh sangin a sangzaw munah amah om ahih manin mi khempeuh' muh theih dingin Ezra in a laibu a hong hi. A laibu a hon' ciangin mi khempeuh a ding uh hi. 6Tua ciangin Ezra in a lian Pasian, Topa thupha pia a, mi khempeuh in a khut uh lamto-in, “Hi ta hen. Hi ta hen,” ci-in a dawng uh hi. Tua ciangin a lu uh kunin leilam maingatin Topa a bia uh hi. 7Mite amau' omna san ciatah a om sungun mite in thukham a tel theihna dingun Levi mi Jeshua, Bani, Sherebiah, Jamin, Akkub, Shabbethai, Hodiah, Maaseiah, Kelita, Azariah, Jozabad, Hanan, leh Pelaiah-te in a khiatna a gen uh hi. 8Amaute in Pasian' thukham laibu sung panin a kitel takin sim uh a, a cihnopna a kitelin gen uh a, tua a kisim thute a telna dingun a hilh uh hi.

9Tua ciangin a gam ukpa Nehemiah, laitheipa lah hi-in siampi lah ahi Ezra, leh mite a hilh Levi mite in amaute khempeuh kiangah, “Tuni pen Topa note' Pasian-a' dingin biakna ni siangtho ahi hi; a kap a mau om kei un,” a ci hi. Bang hang hiam cih leh thukham kammalte a zak uh ciangin mi khempeuh kap uh hi. 10Tua ciangin amah in amaute kiangah, “Tu-in ciah un. Anlim tuilim ne-in thadim un la, a nei zolote zong va kholh un; bang hang hiam cih leh i Topa-a' dingin tuni pen biakna ni siangtho ni ahi hi; dah kei un, bang hang hiam cih leh Topa' hong piak lungdamna in note hong thahatsak ding hi,” a ci hi. 11Tua ahih ciangin Levi mite in mite gamdaisak a, “Daitakin om un; bang hang hiam cih leh tuni pen biakna ni siangtho ni ahi hi; dah kei un,” a ci uh hi. 12Tua ahih ciangin mi khempeuh anne tuidawnin midangte a kholh ding leh lungdama om dingin a ciah uh hi; bang hang hiam cih leh amaute tungah a kigen thute amaute in a theitel uh hi.

13A ni nih ni-in thukham sin dingin siampite leh Levi mite tawh beh lutang khempeuh laitheipa Ezra kiangah hong kikhawm uh hi. 14-15Tua ciangin, a kha sagihna pawi hun sungin sawlbuk sungah Israel mite a omna ding thu, leh amaute in a khuapi khempeuh uh leh Jerusalem-ah taangko-in, “A kigensa bangin sawlbuk lamna dingin gamlakah pai un la oliv hiangte, gamlak oliv hiangte, mui sing hiangte, leh a teh tam singhiang dangte va sat un,” ci-in a gen ding uh, Moses tung tawnin Topa in a thupiakna pen thukham sungah a kigelh lam a mu uh hi. *

16Tua ahih ciangin mite kuankhia-in tua singhiangte hong pua-in amau' innkhumzang ciat, leh a inntual uh leh Pasian' biakinn tual, Tui Kongpi tual, leh Efraim Kongpi tualah sawlbuk a lam uh hi. 17Tua hi a, salsuahna panin a hong ciahkik a kikhawm mite khempeuh in sawlbuk lamin tuate sungah om uh hi; bang hang hiam cih leh Nun' tapa Joshua' huna kipanin tua ni dongin Israel mite in tua bangin hih ngeilo uh hi. Tua hi a, amaute lungdam mahmah uh hi. 18Tua hi a, a kipat ni-a kipan a bei ni dong Ezra in ni simin Pasian' thukham laibu a simkhia hi. Amaute in ni sagih sung tua pawi kham uh a, a ngeina om bangin a ni giat ni-in pawi khupna thupi kikhopna khat a om hi.