Korin Masa 7

 

Nupa Thu

1Tu-in nong laigelhna uh thu tawh kisai-in: Pasal in zi nei kei leh hoihzaw loding ahi hiam, na ci uh hi. 2Ahi zongin numei tawh paktatna tamlua ahih manin pasal in ama zi tuam nei hen la, numei in ama pasal tuam nei leh hoih hi. 3Pasal in a zi a luppih dingin a kilawm zahin luppih ding a, a zi in zong a pasal a luppih dingin a kilawm zahin a luppih ding ahi hi. 4Zi in ama pumpi a ut bangin zangthei nawnloin a pasal' zat ding hi a, tua mah bangin a pasal in zong ama pumpi a ut bangin zangthei nawnloin a zi' zat ding ahi hi. 5Thungetna-in hun na zattheihna dingun tawlkhat sung tuam om ding thukim khawm masa lopi-in lupkhop ding kinialkha kei un. Tua bangin tawlkhat sung na tuam om khit uh ciangin note' pumpi' deihna hangin Satan' ze-etna sungah na pukkhak lohna dingun a ngeina bangin lupkhawm ding kipan kik un. 6Hih bangin kong gen ciangin a hoihpen hi, ci-in thugenna hilo a, note' pianzia tawh kizui-in hithei tei hi, cihna lel ahi hi. 7Mi khempeuh keimah bangin om ciat le uh hoih ka sa hi. Ahi zongin mi khempeuh in Pasian' piak hihzawhna a tuamtuam nei a, khatlekhat kibanglo hi.

8Pasal nei nailote leh meigongte pen keimah bangin tanggawl om paisuak le uh hoih ka sa hi. 9Ahi zongin a pumpi uh a ki-ukzawh kei ding uh leh pasal nei le uh hoihzaw hi. Nei nuampipi-a neihloh tentan sangin pasal neih hoihzaw hi.

10A neisate tungah, kei' ngaihsutna hilo, Topa' ngaihsutna ka gennop thu in: Zi in a pasal ciahsan kei ta hen. 11A ciahsan leh zong pasal neiloin om paisuak hen. A om paisuakzawh kei leh a pasal ngei mah zuankik hen. Pasal in a zi ma kei ta hen. *

12Adangte tungah, Topa' cih hilo, keima ngaihsutna ka gennop thu in: Mi khatpeuh in thu umlo mi khat zi-in a neih leh, pasal mahin neihding a zi a lungkim ahih nak leh ma kei ta hen. 13Numei khat in thu umlo mi khat pasalin a neih leh, zi mahin neihding a pasal a lungkim ahih nak leh ma tuan kei ta hen. 14Bang hang hiam cih leh thu umlo pasal pen a zi' hangin thu um mi suakthei ding a, thu umlo zi pen a pasal' hangin thu um mi suakthei ding hi. Tua bang hi leh a tate uh thu um mi suakthei ding uh hi. Ahi zongin tua bang hi kei le uh a tate uh thu um mi suaktheilo ding uh hi. 15Ahi zongin thu umlo zi in ahi a, thu umlo pasal in ahi zongin kikhen ding a ut leh kikhen ta uh hen. Tua bang thute-ah thu um zi ahi a, thu um pasal ahi zongin a awkna ding thu omlo hi. Pasian in nuamtakin a nungta dingin a hong sap ahi hi. 16Thu um zi in, “Ka pasal honkhiazo kei ning,” bangci-in cithei ding a, thu um pasal in, “Ka zi honkhiazo kei ning,” bangci-in cithei zenzen ding ahi hiam?

Pasian' Hong Sehsak Nuntakna

17Mi khempeuh, Pasian in amau' nuntakna dingin a sehna, leh Pasian in a sap laitakin a omzia bangbangun nungta uh hen. Hih bangzia-in om ding pen pawlpi khempeuhah hilhin ka neih ngeina khat ahi hi. 18Vun ki-atsa mi khat Pasian in a sap leh, a vun ki-atna lim phiat tuan kei ta hen. 19Bang hang hiam cih leh vun atna leh vun atlohna a thupi hilo a, Pasian' thupiakte zuihding a thupi ahi hi. 20Tua ahih manin a kuamah peuh, Pasian in a sap laitakun a omzia bangbangun a om paisuak ding uh ahi hi. 21Sila ahi mi khat Pasian in a sap leh phamawhlo hi; sila mahin ki-om thei veve hi. Ahi zongin suahtak theihna ding lampi a om leh tua hunhoih hamphatna zang ta hen. 22Bang hang hiam cih leh Topa in a sap sila ahi mi pen Topa-a' dingin mi suakta hi a, tua mah bangin Khrih in a sap a suakta mi pen Khrih-a' dingin sila ahi hi. 23Note pen Pasian' hong leisa na hih manun mite' sila suak kei un. 24Tua ahih manin sanggamte aw, hong kisap laitakin na omzia uh mah bangin Pasian' sungah na om paisuak un.

Nungak-tangvalte leh Meigongte Thu

25Tu-in a nungak lai a tangval laite thu tawh kisai-in: Topa kiang panin thu ngahna ka neihloh hangin Topa' hehpihna tawh a muan'taak ahi keima ngaihsutna ka hong gen ding hi. 26Tu laitakin a om bangun om paisuak leh hoihzaw ding hi, cihna thu tawh kisai-in, tu laitak a lungkhamhuai thu ka ngaihsut ciangin tu laitakin a om bangun om paisuak leh hoihzaw mah dingin ka ngaihsun hi. 27Ahi zongin zineite in kikhen ding ngaihsutin nei kei ta hen. Nungak lai tangval laite in lawm zong kei ta hen. 28Ahi zongin pasal in zi a neih hangin a khial hilo a, numei in zong pasal a neih hangin a khial hilo hi. Ahi zongin zinei, pasalneite in leitung lungkhamna tampi thuak uh ahih manin tuate tawh kipelhzaw le uh hoih ka sa hi. 29Sanggamte aw, tua bang ka cih ciangin a kiseh hun hong nai mahmah ta hi, ka cihnopna ahi hi. Tua ahih manin zineite pen zineilo mah bangin kingaihsun uh hen la, 30a dahte pen a dahlo mah bangin kingaihsun uh hen la, a lungdamte pen a lungdamlo mah bangin kingaihsun uh hen la, na a leite pen bangmah a neilo mah bangin kingaihsun uh hen la, 31leitung na nuamtakin a zangte pen a zanglo mah bangin kingaihsun ta uh hen. Bang hang hiam cih leh hih leitung pen sauveipi kip nawnlo ding hi.

32Note, lunghihmawhna tawh na kipelhding uh ka hong deihsak hi. Zi a neilote in Topa a lungdamsak theihna dingun Topa' thu bek kinin nei uh hi. 33Ahi zongin zineite in a zi a lungdamsak theihna dingun hih leitung vai kinin nei uh a, 34a ngaihsutna uh khen nih pha hi. Pasal a neilo numeite in a lungsim leh a pumpi uh Topa-a' dingin zangnuam uh ahih manin Topa' nasep bek kinin nei uh hi. Ahi zongin pasal a nei numeite in a pasal uh a lungdamsak theihna dingun hih leitung vai kinin nei uh hi. 35Hih bangin ka hong gen ciangin note' haksatna ding deihna hiloin note' hoihna ding ka deihna ahi hi. Note a kilawm a kituakin gamta-in, lungsim leh thatang siit neiloin Topa' na na septheihna ding uh ka hong deihsakna ahi hi.

36Ten'pih dingin lawm dongkhin napi-in kiten' nawnlohding a ngaihsunte' thu panin: Ten'pih kei leng a numei tungah a thumanlo hi ding cihna ahi a, zi a deihna lungsim a lianlua ahi a, ten'pihding mah hoih hi, ci-in ngaihsutna ahi zongin a neih leh a lungkimna bangun gamta-in ten'pih uh hen. Tua thu-ah bangmah khialhna omlo hi. 37Ahi zongin kuama sawl hiloin zi neilo dingin a lungsimah khauhtakin khentatin, a lungsim ki-ukzo taktakin a ngaihsutsa ahih nak leh a neihloh hangin phamawhlo hi. 38Tua ahih manin a neite zong hoih a, a neiloin a kikem zote hoihzaw lai hi.

39Pasalnei numei pen a pasal a nuntak laiteng suaktalo hi. A pasal a sih leh a deih peuhpeuh tawh kitengthei ding a, ahi zongin thu um mi bek ten'pih ding hi. 40Ahi zongin keima ngaihsutna-ah pasal a neihse sangin tuaci om leh lungdamzaw dingin ka um a, Pasian' Kha Siangtho' ngaihsutna mah zong hi-in ka um hi.