Joshua 6

 

Jerikho a Pukna

1Tu-in Israel mite' hangin Jerikho kulhkongpi kikhakcip a, kuamah pusuak theilo, sungtum theilo hi. 2Tua ciangin Topa in Joshua kiangah, “Thei in, na khutsungah a kumpipa leh a mi thahatte tawh Jerikho khua kong pia khin hi. 3Khuapi kimkotah galkap mi khempeuh khatvei na pai ding uh hi. Tua bangin ni guk sung na pai ding uh hi. 4Siampi sagih in Thuciamna Singkuang mai-ah tuutal ki peengkul sagih tawi ding uh hi. A ni sagih ni-in khuapi kimkotah sagihvei na pai ding uh a, siampite in peengkul tum ding uh hi. 5Amaute in tuutal ki sauveipi a gin'sak khit uh ciangin, peengkul aw na zak phetun nakpi takin mi khempeuh awng ding uh hi. Khuapikulh cimmai ding a, mi khempeuh amau mai ciatah tangtakin khuapi sungah paisuak ding uh hi,” a ci hi. 6Tua ahih ciangin Nun tapa Joshua in siampite samin amaute kiangah, “Thuciamna Singkuang la un la, tua Topa' Thuciamna Singkuang mai-ah siampi sagihte tuutal ki peengkul sagih tawisak un,” a ci hi. 7Tua ciangin amah in mite kiangah, “Mai nawtin pai un. Khuapi kimkotah pai un la, Topa' Thuciamna Singkuang mai-ah hiam tawi mite paisak un,” a ci hi.

8Joshua in mite a thupiak bangin Topa' mai-ah a pai tuutal ki peengkul a tawi siampi sagihte mai nawtin pai-in peengkul tum uh a, Topa' Thuciamna Singkuang in amaute zui hi. 9Tua ciangin peengkul a tum siampite' mai-ah hiam tawi mite pai uh a, peengkulte a kitum suak hun laitakin Thuciamna Singkuang nungah a nungdalte a pai uh hi. 10Ahih hangin Joshua in mite thu pia-in, “Awng un, ci-a kong sawl hun matengin note awngloin, na aw uh zong na kizasak kei ding uh a, na kam panun aw khat beek gingkhia lo ding hi. Awng un, kong cih ciangin na awng bek ding uh hi,” a ci hi. 11Tua ahih ciangin amah in Topa' Thuciamna Singkuang khuapi kimkotah khatvei paisak a, amaute hong ciahkikin giahphualah a zan giak uh hi.

12Tua ciangin zingsangin Joshua tho baih a, siampite in Topa' Thuciamna Singkuang a la uh hi. 13 Topa' Thuciamna Singkuang mai-ah a pai tuutal ki peengkul sagih a tawi siampi sagihte paisuakin peengkulte tumsuak uh hi. Amaute' mai-ah hiam tawite pai-in, peengkulte a kitum suak hun laitakin Topa' Thuciamna Singkuang nungah a nungdalte a pai uh hi. 14A ni nih ni-in khuapi kimkotah khatvei pai uh a, giahphualah ciahkik uh hi. Tua bangin ni guk sung a hih uh hi.

15A ni sagih ni-in khuavak tungin tho baih uh a, tua bangmahin khuapi kimkotah sagihvei a pai uh hi. Tuani bekin khuapi kimkotah amaute sagihvei pai uh hi. 16A sagih veina-ah, siampite in peengkul a tum ciangin Joshua in mite kiangah, “Awng un; bang hang hiam cih leh Topa in khuapi note hong piazo hi. 17Khuapi leh a sunga omte khempeuh pen Topa' tungah biakna-in kisusia ding hi. Amah in i sawl kamtaite na seel ahih manin numei paktat Rahab leh ama inn sungah amah tawh a omkhawmte khempeuh bek hing ding hi. 18Ahih hangin suksiat dingin a kiseh nate panin nomau mah na kikem ding uh hi. Tua hi kei leh tuate na suksiat ding uh ciangin a kisusia ding nate khat peuhpeuh iplahin la kha-in Israel-te' giahphual sungah siatna ding na khat suaksakin haksatna na tun' khading uh hi. 19Ahih hangin ngun leh kham, sumngo leh sik tawh kibawl nazatte Topa-a' dingin a siangtho ahi hi. Topa' sumkoihna-ah tuate tung ding hi,” a ci hi. 20Tua ahih ciangin mite awng a, peengkulte kitum hi. Mite in peengkul aw a zak phetun nakpi takin awng uh a, kulhpi cimmai-in, mi khempeuh amau mai ciatah tangtakin khuapi sungah pai uh a, khuapi a la uh hi. * 21Tua ciangin amaute in khuapi sunga om khempeuh numei leh pasal, a moi a ham, bawngtalte, tuute, leh late khempeuh namsau tawh thatmang khin uh hi.

22Tua ciangin Joshua in tua gam thu a va kansim mi nihte kiangah, “Numei paktatnu' inn-ah va pai un la, tua lai panin a numei leh amah tawh a kizom khempeuh, ama tungah na ciamsa bangun hong paikhiatpih un,” a ci hi. 23Tua ahih ciangin thu kansim tangvalte va tum uh a, Rahab, a nu, a pa, a sanggamte, leh amah tawh a kizom khempeuh a paikhiatpih uh hi. Amaute in tuanu' tanau teng khempeuh paipih uh a, Israel-te' giahphual pualamah a koih uh hi. 24Amaute in khuapi leh a sunga om khempeuh mei tawh hal uh a, ngun leh kham, sumngo leh sik tawh a kibawl nazatte bek Topa' inn-a sumkoihna-ah a koih uh hi. 25Ahih hangin numei paktat Rahab, leh tuanu tawh a kizomte khempeuh Joshua in a hingkhawi hi. Jerikho khua thu a kansim dingin Joshua in a sawl kamtaite tuanu in na seel ahih manin tuni dongin Israel mite lakah a suanlekhakte a teng uh hi. *

26Tua hun laitakin Joshua in amaute tungah thuciamna khat koih a, “Mi khat kipanin hih Jerikho khuapi a lamkikpa in Topa' mai-ah samsiatna thuak ta hen.

• A tacil luang khaamin
  • tua khuapi bulpi phut ding a,
• a tapa neupen luang khaamin
  • a kulhkongpite phut ding hi,”
    a ci hi. *

27Tua bangin Topa in Joshua ompih a, gam khempeuhah ama min a thang hi.