Joshua 13

 

Lak Lai Ding Gam

1Tu-in Joshua teekin a kum tampi pha hi. Topa in ama kiangah, “Nang teekin na kum tampi pha a, ahi zongin leitang lak ding tampi tak omlai hi. 2A omlai leitang: Filistia gamsung khempeuh, leh Geshur gam khempeuh 3(Kanaan mite' gam ci-a a kiciamteh, leilu lam Ekron gamgi lam, Egypt nisuahna lama om Shihor pan Filistia gam Gaza, Ashdod, Ashkelon, Gath, leh Ekron gamte a uk mi nga om hi), leh Avvim gam, 4leitaw lamah, Kanaan mite leitang khempeuh, leh Sidon mite gam ahi Mearah gam Amor mite gamgi ahi Afek ciang, 5leh Gebal mite' leitang, leh Lebanon gam khempeuh, nisuahna lamah, Hermon Mual nuai-a Baalgad panin Hamath tumna ciang, 6Lebanon leh Misrefothmaim kikalah a teng Sidon mite khempeuh ahi hi. Keimahmah in Israel mite' mai panin amaute ka hawlkhia ding a, nang kong thupiaksa bangin Israel mite tungah a luah dingun leitang hawm in. * 7Tua ahih ciangin tu-in minam kua leh Manasseh minam alangte tungah luah dingin hih leitang hawm in,” a ci hi.

Manasseh, Reuben, leh Gad a Kipia Gam

8Reuben mite leh Gad mite in Manasseh minam alang dang khatte tawh Topa' nasem Moses in amaute a piaksa ahih manin nisuahna lam Jordan galkhatah gamh ngah khin uh hi. * 9Arnon kuam monga om Aroer pan, leh kuam laizanga om khuapi, leh Dibon ciangdong Medeba mualzang khempeuh; 10leh Ammon mite' gamgi ciangdong Heshbon-ah a uk Amor kumpi Sihon' khuapi khempeuh; 11Gilead, leh Geshur mite leh Maakath mite' gam, leh Hermon Mual khempeuh, leh Salekah dong Bashan gam khempeuh; 12Ashtaroth leh Edrei-ah a uk Bashan gam sunga Og kumpi gam khempeuh (Refaim-a a suak tate lakah amah bek om hi); Moses in hihte zo-in a hawlkhia hi. 13Ahi zongin Israel mite in Geshur mite ahi a, Maakath mite ahi zongin hawlkhia lo uh a, tuni dongin Geshur mite leh Maakath mite Israel-te lakah a teng uh hi.

14Levi minamte tung bekah Moses in gamh pialo hi. Topa in Moses kiangah a gensa mah bangin Israel-te' Topa Pasian' tungah a kipia mei tawh kihal biaknate pen amau' gamh ahi hi. *

15Tua ciangin Moses in Reuben minamte tungah amau' beh tawh kizui-in gamh pia hi. 16Tua ahih ciangin amau' gamh pen Arnon kuam gei-a a om Aroer pan, leh kuam laizanga om khuapi, leh Medeba kianga mualzang khempeuh, 17Heshbon tawh, leh mualzang tunga om a khuapite khempeuh; Dibon, Bamothbaal, Bethbaalmeon, 18Jahaz, Kedemoth, Mefaath, 19Kiriathaim, Sibmah, leh tua kuam mualtunga om Zereth-shahar, 20Bethpeor, Pisgah pang suk, leh Bethjeshimoth hi a, 21mualzang khuapite khempeuh, leh Heshbon-ah a uk, Moses in Midian makaite Evi, Reke, Zur, Hur, leh Reba, tua gama teng Sihon' uliante tawh a zawh khop ahi Amor kumpi gam khempeuh a huam ahi hi. 22Beor' tapa, aisanpa Balaam zong, Israel mite in adang a thahte lakah namsau tawh thatkhawm uh hi. 23Reuben mite' gampi pen Jordan ahi hi. Hihte pen amau' beh tawh kizui-in a khuapite leh a khuaneute tawh Reuben mite' gamhluah ahi hi.

24Tua ciangin Moses in Gad minamte tungah zong amau' beh tawh kizui-in gamh pia hi. 25Amau' gam pen Jazer, leh Gilead khuapite khempeuh, leh Rabbah nisuahna lamah a om Aroer ciangdong Ammon mite' leitang kimkhat, 26leh Heshbon panin Ramathmizpeh leh Betonim ciang, leh Mahanaim panin Debir gam ciangdong, 27leh Bethharam kuam sungah Bethnimrah, Sukkoth, leh Zafon, Jordan galkhat nisuahna lam, Khinnereth Tuipi a niamna lam mong ciang, Jordan gamgi-in a nei, Heshbon kumpipa Sihon' kumpi gam a omlai teng ahi hi. 28Hihte pen amau' beh tawh kizui-in a khuapite leh a khuaneute tawh Gad mite' gamhluah ahi hi.

29Tua ciangin Moses in Manasseh minam alangte tungah amau' beh tawh kizui-in gamh a pia hi. 30Amau' gam pen Mahanaim pan kipanin Bashan gamsung khempeuh, Bashan kumpipa Og' kumpi gamsung khempeuh, leh Bashan gamsunga om Jair khuapi sawmgukte, 31leh Gilead alang, Ashtaroth, leh Edrei, Bashan gama Og' kumpi gam khempeuh ahi hi. Hihte amau' innkuan tawh kizui-in Makhir mi alangte-a' dingin Manasseh' tapa Makhir mite tungah kipia hi.

32Hihte pen Jerikho nisuahna lam Jordan galkhat, Moab zanglei-ah Moses in a hawm gamhte ahi hi. 33Ahih hangin Levi minamte tungah Moses in gamh pialo hi. Israel-te' Topa Pasian in amaute kiangah a gensa mah bangin amah pen amau' gamh ahi hi. *