Thesalonika Masa 2

 

Thesalonika khua-ah Paul' Nasepna

1Sanggamte aw, note kiangah ka hong painasa thu a mawkna a suahlohna thu nomau mahmah in na thei uh hi. 2Note in na theihsa uh mah bangin Thesalonika khua ka hong tun' ma-un Filippi khua-ah simmawh bawlna leh maizumna ka thuak uh hi. Tua bangin nakpi takin hong kilangbawlna hangin Pasian kiang panin a hong pai Lungdamna Thu note kiangah gen ngamna dingin i Pasian in kote sungah lungsim han'na a hong guan' hi. * 3Kote in thu ka hong hilh uh ciangin thumanlo, ngimna hoihlo leh khemnopna lungsim tawh a hong hilh ka hi kei uh hi. 4Pasian in kote hong thei-in Lungdamna Thu a hilh dingin kilawm hong sa ahih mah bangin mite' lungdam theihna dingin thu a hilh hiloin kote' lungsim ngimna a hong thei Pasian' lungkimna dingin thu a hilh ka hizaw uh hi. 5Tua ahih manin note in na theih uh mah bangin mite' lungdam theihna ding phatna kamte ka zang kei uh a, kote' phattuamna ding ngaihsutna tawh zong bangmah ka sem het kei uh hi. Hih bang ka hihna uh Pasian in hong thei hi. 6Khrih sawltakte ka hihna uh hangin phatna ka ngahding uh a kilawm hinapi-in note leh midangte, a kuamah peuh' hong phatding a zong ka hi kei uh hi. 7Note kiangah ka hong om lai-un nupite in a tate uh itna tawh a bawl bangin note ka hong bawl uh hi. 8Note hong it mahmah ka hih manun Pasian kiang panin a hong pai Lungdamna Thu bek hong genloin, kote' nuntakna mahmah zong note-a' dingin a pia ngamin ka om uh hi. Tua ahih manin kote' hong muhna-ah note a manpha mahmah na hi uh hi.

9Sanggamte aw, ka nasep ka silbawnate khempeuh uh note in na thei uh hi. Pasian kiang panin a hong pai Lungdamna Thu note kiangah ka hong hilhna hangun note in themkhat beek na gimlawhkhak lohna dingun a sun a zanin nakpi takin na ka sem uh hi. 10Note in hih thu na theih uh mah bangin Pasian in zong hong thei hi. Thu um note tungah kong gamtatnate uh siangtho-in thuman a, paubaan'na ding bangmah om hetlo hi. 11Pa in a tate a bawl bangin note ka hong bawlna uh na thei uh hi. 12Note hong hehnemin ka hong hanthawn uh a, amah tawh ukna leh minthan'na a ngahkhawm dingin a hong sam Pasian' lungkimna bangin na gamtat theihna dingun ka hong gengen uh hi.

13Note kiangah Pasian' thu ka hong gen uh ciangin no thu um mite sungah ama thu tawh kisai-in Pasian in na hong sem ahih manin kote' thugente pen Pasian' thu taktak ahih mah bangin kote' thugenna na zak uh ciangin mihing' thu bangin ngaihsun loin Pasian' thu taktak mahin hong sang na hih manun, hih thu hangin zong Pasian' tungah ka lungdamna uh ka ko uh hi. 14Tua ahih manin sanggamte aw, Judea gamsunga om, Khrih Jesuh thu a um, Pasian' mi ahi mite in a thuak bangin note in zong a thuak na hi uh hi. Amaute in Jew mite' bawlsiatna a thuak uh mah bangin note in zong note' gam mite mah' bawlsiatna na thuak uh hi. * 15Tua Jew mite in Topa Jesuh leh kamsangte that uh a, kote zong hong bawlsia uh hi. Pasian' lungkimlohna dingin gamta uh a, mi khempeuh langbawl uh hi. * 16Gentail mite tungah hotkhiatna thu ka gen ding uh hong khaktan uh ahih manin amau' mawhnasate a behlap niloh a suak uh hi. Ahi zongin a tawpna-ah Pasian' hehna amaute tungah a tungta hi.

Pawlpite kiangah Paul a Hawhkik Nopna

17Sanggamte aw, kote ahih leh no tawh i lungsim a kikhenloh hangin tawlkhat sung i pumpi a kikhen sungin note ka hong phawk mahmah uh a, note kiangah hawhkik ding nakpi takin ka hanciam uh hi. 18Note kiangah hong hawhkik nuam ka hih manun note kiangah hawhkik ding ka hanciam zelzel hangun kong pai ding uh Satan in hong khaktan hi. 19Tua banga kong painopna uh pen, note bek mah kote' lamet, ka lungdamna uh leh kote' gualzawhna lukhu na hi uh a, Topa Jesuh hong pai ciangin ama mai-ah kong kisialhpih ding uh na hi uh hi. 20Kote' thupi suahna leh lungdamna pen note bek mah na hi takpi uh hi.