Peter Masa 4

 

Pasian' Piak Na A Zatsiamte

1Khrih in ama pumpi-in thuak ahih manin note in zong tua bang lungsim mah nei-in na kithakhauhsak ding uh ahi hi. Bang hang hiam cih leh pumpi-in a thuak mite peuhmah, mawhna tawh kisawhkha nawnlo uh hi. 2Tua ahih manin tu-a kipanin na leitung nuntak sung uh mihingte' deihna bangin gamta loin Pasian' deihna bangin na gamtat ding uh ahi hi. 3A beisa hunah dawibiate' gamtat bangin a hoihkhop khat na gamta khinta uh a, a kilawm loin gamtatna, hukna lanna, zunekna, uangtatna, zukham luatna leh a muhdahhuai milim biakna-in na hun uh na beisak uh hi. 4Tu-in note in dawibiate pawlpih nawnloin ut utin na phengtat loh uh ciangin lamdangsa-in note hong kosia uh hi. 5Ahi zongin amaute in a site leh a hingte' thu a khen dingin a om Pasian' mai-ah thudotna thuak ding uh hi. 6Tua thu hang mahin, midang khempeuh thu a khen mah bangin a leitung nuntakna uhah Pasian in thu a khen khit tei hangin kha nuntakna-ah Pasian mah bangin a nuntak theihna dingun mi sisate kiangah Khrih in Lungdamna Thu a hilh ahi hi.

7Na khempeuh a beina ding hun hong naita hi. Nomau pumpi ki-uktawm thei-in pilvang un la, hoihtakin thu a ngen thei-in om ta un. 8Itna in mawhna tampi khuhcip thei ahih manin lungsim takpi tawh khatlekhat ki-it ding thupi ngaihsut pha pen un. * 9Khatlekhat maitaii takin zinleleeng na kido un. 10Pasian' piak na a zatsiamte bangin Pasian' kiang panin na ngah uh nate, midangte' phattuamna dingin na zang un. 11Minthan'na leh vangliatna a nei tawntung Pasian in Jesuh Khrih hangin thu khempeuhah phatna a ngahtheihna dingin thuhilhte in Pasian' thu na hilh un la, na a semte in Pasian' piak thahatna tawh na sem un. Amen.

Khristian Hihna Hangin Thuakna

12Ka itte aw, note' upna hong kize-etna-in gimna haksate na thuak manun a thu lamdangpi-in ngaihsun kei un la, na lungkham ngaihsut kei un. 13Tua bangin Khrih tawh thuakkhawm le uh cin ama minthan'na hong kilat ciangin note lungdam mahmah ding na hih manun, tua banga na thuakna uhah na lungdamzaw un. 14Khrih nungzui hihna hangin mite' kosiatna na thuak uh leh note sungah a minthang Kha Siangtho ahi Pasian' Kha Siangtho hong om ahihna lim ahih manin a hampha mahmah na hi uh hi. 15Ahi zongin mi thahna, guktakna, gamtat khialhna, leh thusia bawlna hangin gimna a thuakte na hikha kei un. 16Ahi zongin Khristian hihna hangin gimna na thuak uh leh kuamah in maizum ngaihsut kei un la, Khrih min hangin na thuak manun Pasian tungah na lungdam un. 17Tu-in thukhen kipat hunding hong tungta-in Pasian' mi eite tungah hong kipan ahih leh Pasian kiang panin hong pai Lungdamna Thu a umlo mite-a' dingin bangzahin lungkhamhuai ding ahi hiam? 18Lai Siangtho in,

• “Mi hoihte kihonkhia zo
  • liailiai bek ahih leh
• Pasian a umlo mawhnei mite
  • bang suak ding ahi hiam?”
    na ci hi. *

19Tua ahih ciangin Pasian' deihna bangin gimna a thuak mite gamtat hoihin, a kamciam a tangtungsak tawntung hong Piangsakpa muangin ama khutsungah a ki-ap ding uh ahi hi.